काठमाडौं– प्रधानमन्त्री केपी शर्मा ओलीले बुधबार दक्षिणी कोरियाली विश्वविद्यालयको 'मानार्थ विद्यावारिधि' उपाधि ग्रहण गरे। तर, उनले मानार्थ विद्यावारिधिको उपाधि ग्रहण गरेको यो पहिलो पटक होइन। यसअघि नै उनले तीनपटक यस्तो उपाधि पाएका छन्।
पहिलो उपाधि
२०६७ असोज ११ मा ओलीले पहिलो पटक मानार्थ विद्यावारिधिको उपाधि पाएका थिए।
मध्य अमेरिकाको बेलिजमा रहेको बताइएको र काठमाडौंको शंखमूलमा सम्पर्क कार्यालय रहेको ग्रिनफोर्ड इन्टरनेसनल युनिभर्सिटीले राष्ट्रियसभामा एक समारोह गरी धेरैलाई मानार्थ विद्यावारिधिको उपाधि दिइएको थियो।
तत्कालीन सभामुख सुवास नेम्वाङ प्रमुख अतिथि रहेको सो समारोहमा उपप्रधानमन्त्री विजयकुमार गच्छदार र एमालेका प्रभावशाली नेता रहेका ओलीलाई मानार्थ विद्यावारिधिको उपाधि प्रदान गरिएको थियो। सोही कार्यक्रममा कलाकारहरु मदनकृष्ण श्रेष्ठ र हरिवंश आचार्यलाई पनि विद्यावारिधि उपाधि प्रदान गरिएको थियो। कान्तिपुर पत्रिकाका तत्कालीन निर्देशक रामेश्वर थापाले समेत यो उपाधि पाएका थिए।
तत्कालै युनिभर्सिटी नै नक्कली रहेको सार्वजनिक भएपछि कलाकारद्वय श्रेष्ठ र आचार्यले उपाधि फिर्ता गरेको सार्वजनिक घोषणा गरेका थिए। थापाले पनि ‘विद्यावारिधि सम्मानबारे विवाद उत्पन्न भएकाले त्यसलाई ग्रहण गर्न सहज महसुस नगरेको बताउँदै सम्मान फिर्ता गरेको’ बताए।
तर, ओली र उपाधि पाउँदा उपप्रधानमन्त्री रहेका विजयकुमार गच्छदारले भने यो उपाधि फिर्ता गरेको सार्वजनिक गरेका छैनन्। सार्वजनिक नगर्ने मात्रै होइन, ओलीले त्यसलाई गर्वका साथ प्रयोग पनि गरेका छन्।
०७० सालमा सभासद् (सांसद) निर्वाचित भएपछि उनले संसद सचिवालयलाई बुझाएको आफ्नो वैयक्तिक विवरणमा शैक्षिक योग्यता ‘अनररी पिएचडी’ उल्लेख गरेका थिए।
दोस्रो उपाधि
दोस्रो पटक प्रधानमन्त्री भएको केही सातामै भारत भ्रमणमा गएका बेला ओलीले दोस्रो मानार्थ विद्यावारिधि उपाधि पाएका थिए।
तीनदिने भारत भ्रमणका बेलामा ओलीलाई २०७४ चैत २५ गते उत्तराखण्डको डा गोविन्द बल्लभ कृषि तथा प्रविधि विश्व विद्यालयले एक समारोहबीच सो उपाधि प्रदान गरेको हो। सो विश्वविद्यालयमा कृषि प्रविधिमा अध्यान र अनुसन्धान हुँदै आएको छ।
समारोहलाई सम्बोधन गर्दै ओलीले नेपाल र भारतबीचको मैत्रिपूर्ण सम्बन्धलाई थप बलियो बनाउन लागिपर्ने बताएका थिए।
तेस्रो उपाधि
अघिल्लो वर्ष असोज १६ मा मध्य अमेरिकी मुलुक कोस्टारिकाको युनिभर्सिटी फर पिसले ओलीलाई तेस्रो मानार्थ विद्यावारिधि उपाधि दिएको हो। नेपालमा शान्ति स्थापना तथा प्रजातन्त्रलाई संस्थागत गर्न महत्त्वपूर्ण भूमिका खेलेको भन्दै उपाधि दिएको थियो।
उपाधि ग्रहण गरेपछि प्रधानमन्त्री ओलीले आफूलाई दिइएको उपाधि नेपालको शान्ति प्रक्रियाको सफलता तथा शान्ति चाहने नेपाली जनताको सम्मान भएको बताएका थिए।
संयुक्त राष्ट्रसंघको ७३औं महासभामा भाग लिएर फर्कने बेला ओली कोस्टारिका पनि पुगेका थिए। सोही अवसरमा उनलाई उपाधि दिइएको थियो।
प्रधानमन्त्री ओलीलाई मानार्थ विद्यावारिधि प्रदान गरिएपछि परराष्ट्रमन्त्री प्रदीप ज्ञवालीले शान्तिका लागि विश्वविद्यालय स्थापना सम्बन्धी अन्तराष्ट्रिय सन्धिमा हस्ताक्षर गरेका थिए। नेपाल उक्त सन्धिमा सहमति जनाउने ४१औँ राष्ट्र हो।
चौथो उपाधि
ओलीले चौथो उपाधि ०७६ जेठ १५ गते पाएका हुन्। दक्षिण कोरियाको काङनाम युनिभर्सिटीले प्रधानमन्त्री एवं त्रिभुवन विश्वविद्यालयका कुलपति ओलीलाई मानार्थ उपाधि प्रदान गरेको हो। नेपाली सेनाको सानो भर्याङस्थित स्वास्थ्य विज्ञान संस्थानमा आयोजित कार्यक्रममा ओलीले सो उपाधि पाएका हुन्।
सन् १९४६ मा स्थापित यो विश्वविद्यालय क्रिस्टियानिटी र मानवताको सिद्धान्तमा आधारित भएर सत्य, स्वतन्त्रता, समभाव र मानव कल्याणमा आधारित शिक्षा प्रदान गर्ने उद्देश्य रहेको उक्त विश्वविद्यालयको वेबसाइटमा उल्लेख छ।
काङनाम युनिभर्सिटीका प्रेसिडेन्ट सिनिल युनले ओलीलाई उपाधि हस्तान्तरण गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786184812.png)
