सुर्खेत– पूर्वगृहमन्त्री एवम् नेपाली कांग्रेसका पूर्वसहमहामन्त्री पूर्णबहादुर खड्काको अपराजित यात्रामा पूर्णविराम लागेको छ। प्रतिनिधिसभाको निर्वाचनमा सुर्खेत क्षेत्र नम्बर १ बाट नेकपा एमालेका उम्मेदवार ध्रुवकुमार शाहीसँग पराजित भएपछि खड्काको ०४८ यताको अपराजित यात्रा टुंगिएको हो।
एमाले सुर्खेतका अध्यक्ष समेत रहेका शाहीले ३६ हजार ७ सय ५९ मत ल्याएर विजयी हुँदा कांग्रेस नेता खड्काले ३३ हजार तीन सय ७७ मत मात्र प्राप्त गरे। यो सँगै लगातार छैटौं पटक सांसद बनेर ‘डबल ह्याट्रिक’ गर्ने खड्काको दाउमा ‘ब्रेक’ लागेको छ।
०४८ को आम निर्वाचनयता कांग्रेस नेता खड्काले कुनै पनि चुनावमा पराजय बेहोर्नुपरेको थिएन। पहिलो पटक ०४८ को निर्वाचनमा सुर्खेत क्षेत्र नम्बर १ बाट उम्मेदवार बनेर विजयी भएपछि ०५१ को मध्यावधि निर्वाचन, ०५६ को संसदीय निर्वाचन तथा ०७० को संविधानसभा निर्वाचनमा उनी सोही क्षेत्रबाट निर्वाचित भएका थिए। ०६४ सालको संविधानसभामा भने उनी समानुपातिक तर्फबाट सभासद बनेका थिए।
तर यस पटक भने उनलाई विगतमा जस्तो सजिलो भएन। पूर्वी सुर्खेतका पाँच वटा स्थानीय तहसहित वीरेन्द्रनगर नगरपालिकाको दुई वटा वडा मिलेर बनेको सो क्षेत्रमा यस पटक ‘हेभीवेट’ खड्कालाई वाम गठबन्धनका तर्फबाट उम्मेदवार बनेका ध्रुवकुमार शाहीले हराउँदै पहिलो पटक सांसद बने।
को हुन् ध्रुवकुमार शाही?
०२७ साल जेठ ११ गते सुर्खेतको मालारानीमा जन्मिएका शाही १८ वर्षको उमेरदेखि नै पूर्णकालीन राजनीतिमा होमिएका थिए। ०४५ सालमा राजनीतिक क्षेत्रमा प्रवेश गरेका शाही नेकपा एमाले सुर्खेतका अध्यक्ष हुन्। उनले ०५४ मा तत्कालीन मालारानी गाविसको अध्यक्षमा समेत जितेका थिए।
पहिलो पटक सांसद भएपछि शाहीले देश, जनता र सुर्खेतवासीको पक्षमा काम गर्ने प्रतिबद्धता जनाए। उनले आफूले जितेको निर्वाचन क्षेत्रका साथै समग्र सुर्खेत जिल्ला र प्रदेश नम्बर ६ को विकासमा काम गर्ने बताए। जनताको विश्वासलाई टुट्न नदिने शाहीको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
