युरोपियन फुटबल सिजनले बिट मार्दै गर्दा १९ वर्षीय जोएओ फेलिक्सको चर्चा चुलिएको छ। फुटबल बजारमा उनलाई भित्र्याउन ठूला क्लबले तछाडमछाड गरिरहेका छन्। सँगसँगै उनको मूल्य मोटो बनेको छ। उनको 'प्राइस ट्याग' १२० मिलियन युरो (१४ अर्ब ९८ करोड रुपैयाँ) छ।
पोर्चुगलका फरवार्डले २०१८ को सिजनको सुरुबाट व्यवसायिक खेलमा डेब्यू गरेका थिए। पोर्चुगिज क्लब बेन्फिकाका लागि उनले सिजनमा १५ गोल गरे भने ९ पटक गोलका लागि पास दिए। उनकै प्रभावशाली खेलमा लिस्बनको क्लब बेन्फिकाले लिगको उपाधि जित्यो।
उनले युरोपा लिगमा पनि आफ्नो छाप छाडे। जर्मन क्लब फ्रान्सफर्टविरुद्ध गत अप्रिलमा खेलिएको खेलमा उनले ह्याट्रिक गरेका थिए। उनी बेन्फिकाका लागि ह्याट्रिक गर्ने युवा खेलाडी बनेका थिए। यस्तै उनी युरोपियन फुटबलमा एकै खेलमा तीन गोल गर्ने पोर्चुगलका युवा खेलाडी थिए। यति मात्र होइन उनी युरोपा लिगमा ह्याट्रिक गर्ने युवा खेलाडी बने।
.jpg)
क्लब फुटबलमा लोभलाग्दो खेल देखाएपछि उनी पोर्चुगल राष्ट्रिय टिममा पर्न सफल भए। अब उनले निकट भविष्यमा आयोजना हुने युइएफए नेसन्स लिगको फाइनल चरण खेल्ने पक्का छ। जहाँ उनको अग्रपंक्तिमा पार्टनर हुनेछन् झन्डै दोब्बर उमेरका क्रिस्टियानो रोनाल्डो।
पहिलो सिजनमा लयमा देखिएका फेलिक्सलाई भित्र्याउन इंग्लिस क्लबद्वय म्यानचेस्टर युनाइटेड र म्यानचेस्टर सिटी आतुर छन्। म्यानचेस्टर शहरका दुई क्लबको दौडमा कसले बाजी मार्छ त्यो हेर्न लायक हुनेछ।
'पोर्चुगलका बेर्नान्डो सिल्भा अहिले विश्वका उत्कृष्ट खेलाडी मध्ये एक हुन्,' इंग्लिस क्लब स्वान्सीका पूर्व प्रशिक्षक कार्लोस कार्भाहलले भनेका छन्,'तर सिल्भाले १९ वर्षको उमेरमा आफ्नो खेल देखाइसकेका थिएनन्। फेलिक्सले भने १९ वर्षको उमेरमै प्रभावशाली खेल देखाइसकेका छन्। अब सोच्नुहोस् फेलिक्स कति राम्रो खेलाडी हुन्।'
.jpg)
फेलिक्सले एएफसी पोर्टोबाट युथ फुटबलमा आफ्नो करिअर सुरु गरेका थिए। तर सन् २०१५ मा उनी दुब्लो भएका कारण पोर्टोले रिलिज गरेको थियो। त्यसपछि उनी बेन्फिकामा पुगे।
सन् २०१६ मा १६ वर्षको उमेरमा उनी बेन्फिकाको रिजर्भ टिममा परे। सेप्टेम्बर २०१६ मा उनले रिजर्भ टिममा डेब्यू गरेर सबैभन्दा युवा खेलाडीको रेकर्ड बनाएका थिए।
२०१८–१९ को सिजनमा उनले ठूलो सफलता पाए। गत नोभेम्बरमा क्लबका लागि सम्झौता गरे त्यो पनि कीर्तिमानी रकममा। उनले सन् २०२३ सम्मका लागि १२० मिलियन रिलिज क्लजमा सम्झौता गरेका थिए।
उनले अगस्टमा बेन्फिकाका लागि बोएभिस्टाविरुद्धको खेलमा डेब्यू गरे। शहरी प्रतिद्वन्द्वी स्पोर्टिङ लिस्बनविरुद्धको अर्को खेलमा उनले गोल गरे। उनले ८६ मिनेटमा हेडरमार्फत क्लबका लागि पहिलो गोल गरेका थिए। त्यसपछि प्रशिक्षकको विश्वास जितेका उनले क्लबका लागि सिजनमा सबै प्रतियोगिता गरी ४३ खेल खेले भने २० गोल गरे। इंग्ल्यान्ड, इटाली, स्पेन, जर्मनी, पोर्चुगल र नेदरल्यान्डको लिग मध्ये उनी बढी गोल गर्ने दोस्रा टिनएजर खेलाडी हुन्। बढी गोल गर्ने टिनएजर जर्मन क्लब वायर लिभरकुजेनका १९ वर्षीय मिडफिल्डर काइ हाभेर्ट हुन्।
फेलिक्सलाई अहिले पोर्चुगिज सुपरस्टार रोनाल्डो र मिडफिल्डर बेर्नान्डो सिल्भासँग तुलना गर्न थालिएको छ। कतिपयले उनलाई ब्रजिलका काकासँग दाँजेका छन्।
.jpg)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787645626.png)
-1786602170.png)
-1786513116.png)
