जनकपुर- डकैती गर्न जनकपुर आएका भारतीय डाकाको एक गिरोहलाई पक्राउ गर्न प्रहरी सफल भएको छ।
जिल्ला प्रहरी कार्यालय धनुषाले पक्राउ परेकाहरुलाई बिहीबार पत्रकार सम्मेलन गरी सार्वजनिक गरेको छ। गएराति जनकपुरधामस्थित विहारकुण्ड मन्दिरमा डकैती गर्न पुगेका ती भारतीय डाकालाई प्रहरीले गोप्य सूचनाका आधारमा घटनास्थलमा पुगी पक्राउ गर्न सफल भएको थियो।
डाका पक्राउ गर्ने क्रममा प्रहरी र डाकाबीच गोली हानाहानसमेत भएको थियो। सो क्रममा प्रहरीको गोली लागि एक डाका घाइते भएका छन्। घाइतेको उपचार जनकपुर अञ्चल अस्पतालमा भइरहेको पत्रकार सम्मेलनमा धनुषाका प्रहरी उपरीक्षक शेखर खनालले जानकारी दिएका छन्।
पक्राउ परेका डाकाका साथबाट प्रहरीले यूसए मेड पेस्तोल एक थान, कटुवा पेस्तोल एक थान र त्यसमा प्रयोग हुने गोलीसहित खुकुरी एक थानसमेत जफत गरिएको छ। यसका साथै डाकाहरुले प्रयोग गरेका ३ थान मोटरसाइकल समेत बरामद गरेको छ।
बीआर ३२ एस ०८९५ नम्बर भएको पल्सर मोटरसाइकल, बीआर ३२ आर ८२१३ नम्बरको ग्यालमर मोटरसाइकल, बीआर ०७ एजी १५८१ नम्बरको स्कुटर बरामद गरेको हो।
पक्राउ पर्नेहरुमा भारत बिहार राज्य समस्तीपुर जिल्ला गदोपुर वर्ष २० का रवि मल्लिक डोम, सोही जिल्लाका सिमरी विद्यापति नगरका वर्ष २० का साहिल रजक, पटौरीका वर्ष २४ का अजितकुमार सिंह, भगवानपुरका वर्ष २८ का सुजितकुमार राय, महोदीनगर वर्ष ३० का अमितकुमार सिंह, सोही ठाउँका वर्ष २० का अमितकुमार यादव, मधुबनी जिल्ला साहरघाटका वर्ष ३२ का रञ्जितकुमार भगत र ३८ वर्षिय सञ्जयकुमार सुमन छन्।
पक्राउ परेकामध्ये मध्ये रवि मल्लिक डोम प्रहरीको गोली लागि घाइते भएका छन्। उनलाई हाल प्रहरी निगरानीमा जनकपुर अञ्चल अस्पतालमा उपचारत छन्।
घटनाबारे जानकारी दिँदै प्रहरी उपरीक्षक खनालले भने, ‘विहारकुण्ड मन्दिरका महन्थ नारायण शरण दासले जमिन बेचेर पैसा मन्दिरमा राखेका थिए। यो खबर पाएपछि बुधबारै दिउँसो ती डाँका डकैती गर्न जनकपुरधाम आएका थिए।'
जनकपुर पुगेपछि महावीर चोकस्थित लभ्ली होटलमा उनीहरु बसेका थिए। केही क्षण बजार घुम्नका उनीहरु फेरि होटलमै आएर कसरी डकैती गर्ने भन्ने योजना बनाइरहेका थिए।
यसैबीचमा प्रहरीलाई गोप्य सूचना आयो, भारतबाट डाँका समूह विहार कुण्ड मन्दिरमा डकैती गर्न लाग्दैछन् भनेर।
डाका समूह पुग्नुअघि नै सूचनाको आधारमा जिल्ला प्रहरी कार्यालय धनुषा र प्रदेश प्रहरी कार्यालयको संयुक्त टोली घटनास्थलमा तैनाथ भइसकेको थियो। योजनाअनुसार डाँका समूह मन्दिरभित्र प्रवेश गर्न लाग्दा प्रहरीले नियन्त्रणमा लिन खोजेको थियो। डाकाहरुले फायर खोल्दै भाग्न खोजेका थिए।
हामीले जवाफी फायरिङ खोलेको थियौँ। कारबाहीमा प्रहरीले पनि गोली फायर गर्यो। सोही क्रममा रवि भन्ने डाका गोली लागी घाइते भए। अन्य ६ डाकालाई पनि व्यापक संख्यामा रहेका प्रहरीले पक्राउ गरे।
पप्पु भन्ने संजयकुमार भगत भने घटनास्थलमा नभई होटलमै थिए। डाका पक्राउ परेको हल्ला फैलिएपछि भाग्न लाग्दा महोत्तरीको मटिहानीबाट प्रहरीले पक्राउ गरेको थियो। पक्राउ परेकाविरुद्ध चोरी डकैती मुद्दा दायर गरी अनुसन्धान प्रक्रिया अघि बढाइएको प्रहरी उपरीक्षक खनालले बताए।
'मन्दिरमा पैसा छ भन्ने कुरा भारतीय डाकाहरुलाई कसरी खबर पुग्यो भन्ने कुरा हामी पत्ता लगाउँदै छौं। यसको अर्थ घटनामा स्थानीय व्यक्तिको पनि संलग्नता हुन सक्छ। छानबिनपछि त्यस्ता व्यक्तिलाई पनि कानुनबमोजिम कारबाही गर्छौंऽ' प्रहरी उपरीक्षक खनालले भने।
अनुसन्धानका क्रममा होटल सञ्चालक प्रह्लाद साहलाई पनि नियन्त्रणमा लिइएको छ। 'मन्दिरमा कुन जग्गा बिक्रीबाट पैसा आएको हो भन्ने कुराको पनि हामी छानबिनमा छौं,' उपरीक्षक खनालको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821303.jpg)
-1786602170.png)
