राजविराज- सप्तरीको रुपनी गाउँपालिका-६ का भक्तबहादुर तामाङ हिजो–आज राति निदाउने छोडेका छन्।
घरबाहिरबाट आउने अनेक थरीका आवाज सुन्नमै उनको रात गुज्रने गरेको छ।
खस्रस्याक-खुस्रुक आवाज आएपछि उनी परिवारका सदस्यलाई सचेत गराउँछन र निदाएका सबैलाई उठाउँछन्।
उस्तै परे मध्यराति नै घर छोडेर भाग्नु उनको नियति बनेको छ।
भक्त मात्रै होइन, सप्तकोशी, कञ्चनरुप, शम्भुनाथ, हनुमाननगर–कंकालिनी, सुरुङ्गा तथा खडक नगरपालिकाका साथै अग्निसाइर कृष्णसवरण र तिरहुत गाउँपालिकाका दर्जनौं गाउँका बासिन्दाको साझा समस्या हो, यो।
एकहप्तादेखि जंगली हात्ती गाउँ पसेर उपद्रो मच्चाउन थालेपछि यस क्षेत्रका स्थानीयवासी ढुक्कसँग सुत्न पाएका छैनन्।
जंगली हात्तीको पीडा पूर्वपश्चिम राजमार्गभन्दा उत्तरतर्फ धेरै र दक्षिणतर्फ केही कम छ। ‘मध्यरातमा एक्कासि हात्तीले घरमा आक्रमण गर्छ।
भागाभाग गरेर ज्यान जोगाउछौं,’ भक्तबहादुर भन्छन्,‘घरपिच्छे आगो बालेर रातभर जाग्राम बस्नुको विकल्प छैन।’
हात्तीले कतिबेला कुल्चेर मार्ने हो भन्ने त्रासले रातभर अनिदो बस्नु परेको उनले दुखेसो पोखे।
गत सोमबार (जेठ ६ गते) सम्साँझै हात्तीले टाउकोमा कुल्चेर कञ्चनरुप नगरपालिका–६, जमुवाका ६५ वर्षीय गोसाई चौधरीको मृत्यु भएपछि स्थानीयवासी अझै त्रसित भएका छन्।
खेतमा काम गरेर घर फर्कँदै गरेका चौधरीलाई हात्तीले बाटोमै आक्रमण गर्यो। उनले घटनास्थलमै ज्यान गुमाए।
चैत २० गते हनुमाननगर कंकालिनी नगरपालिका–१, भारदहका ३५ वर्षीय पवन लौगी हात्ती आक्रमणमा घाइते भए। हात्तीले खेदेपछि रूख चढ्दै गर्दा उनलाई हात्तीले पक्रेर झटारो हानेको थियो।
कञ्चनरुपमा चौधरीको मृत्यु भएकै दिन सशस्त्र प्रहरी बलको बेसक्याम्मसँगै जोडिएको स्वास्थ्य चौकी सितापुरको भवनमा पनि हात्तीले क्षति पुर्याएको स्वाथ्य चौकी प्रमुख हरिनारायण चौधरीले बताए।
मंगलबार राति तीनवटा हात्तीको समूह प्रवेश गरी अग्निसाइर कृष्णासवरन गाउँपालिका–२ का दीपक विश्वकर्मा, मानबहादुर तामाङ, जाकिर मियाँ, आशिष चौधरी, बल बहादुर तामाङलगायतको घरमा हात्तीले लाखौंको क्षति गर्यो।
रुपनी गाउँपालिका-६ का जगरुप यादव र डिक बहादुर एस्माली मगरको घरमा पनि हात्तीले क्षति पुर्यायो।
शनिबार अग्निसाइर कृष्णसबरन गाउँपालिका–२ का डुब्जसिंह तामाङको भएको झुप्रो घरसमेत हात्तीले भत्काएपछि उनको ९ जनाको परिवार बिचल्लीमा परेको छ।
रात परेपछि हरेक दिन जंगली हात्ती गाउँमा प्रवेश गरी घर तोडफोड गर्ने, धानको भकारी उठाएर लाने, अन्नबाली खाने, किसानले लगाएको तरकारीमा क्षति गर्ने गर्न थालेपछि स्थानीयवासी आजित भएको अग्निसाइर कृष्णासवरन गाउँपालिका–२ की वडा सदस्य श्रीकुमारी चौधरीले बताइन्।
हात्ती प्रभावित क्षेत्रका बासिन्दाको ज्यान जोखिममा पर्दा समेत सुरक्षाको उपाय नगरिएको भन्दै स्थानीले गुनासो गरेका छन्।
कोशीटप्पु वन्यजन्तु आरक्षबाट निस्केका हात्ती, अर्ना, बँदेललगायतका जंगली जनावरले आक्रमण गरी सप्तरीमा धेरै मान्छेको मृत्यु छ। दर्जनौं घाइते भएका छन्।
२०७५ फागुन १ गते कञ्चनरुप नगरपालिका-५, पथरी टोलका नारायण साहकी पत्नी ३५ वर्षीया मन्जुदेवी र टिर्हा मुखियाकी पत्नी ४५ वर्षीया पत्नी दुर्गीदेवीको हात्तीकै आक्रमणबाट मृत्यु भयो।
यसअघि कञ्चनरुप नगरपालिका-१०, बदगामाकी ७० वर्षीया फुलवादेवी यादव, हनुमाननगरका सञ्जय साफी र रोशनकुमार झा, भारदहका रघुनाथ खंग, बैरवाका अल्लाउद्दिन खाँ, कमलपुरकी संगीता यादव, कन्चनरुप नगरपालिका-१० का सत्यनारायण यादवकी १३ वर्षीया छोरी संगीता यादवको मृत्यु भइसकेको छ।
पीडित परिवारले जंगली जनारको नियन्त्रण र सर्वसाधारणको सुरक्षा माग गरिरहेका छन्। सरकारले पीडित परिवारलाई राहत तथा क्षतिपूर्ति समेत नदिएको स्थानीयको गुनासो छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821303.jpg)
-1786602170.png)
