काठमाडौं- काठमाडौँको शङ्खरापुर नगरपालिकाको इन्द्रेणी र खुलालटारमा सार्वजनिक जग्गा अतिक्रमण गरेर ‘प्लटिङ’ गरेको पाइएको छ। नगरपालिकाको वडा नम्बर ९ खुलालटारमा सार्वजनिक खोल्साे रहेको स्थानमा अतिक्रमण गरी ह्युमपाइप राखेर जग्गा प्लटिङ गरिएको हो।
साँखुका स्थानीय दिलीपकुमार श्रेष्ठ भन्छन्, 'यो क्षेत्रमा पहिला ठूलो खोल्सो थियो। अहिले खोल्साेमा ह्युमपाइप राखेर खोल्सा पुर्दै व्यक्तिले सार्वजनिक जग्गा नै प्लटिङ गर्न थालेका छन्।
स्काभेटरको प्रयोगले खोल्सा पुरेर प्लटिङ थालेको भए पनि सम्बन्धित निकायले बेवास्ता गरेको स्थानीयले आरोप लगाएका छन्। त्यस्तै वडा नम्बर ९ इन्द्रेणीको साना गाउँमा इन्द्रेणी सामुदायिक वन नै अतिक्रमण गरेर प्लटिङ थालिएको छ। व्यक्तिको निजी जग्गा प्लटिङका लागि सामुदायिक वन मासेर जग्गामा बाटो लगिएको देखिन्छ।
अतिक्रमण भएको भन्ने सूचनाको आधारमा इलाका वन कार्यालयले सोही क्षेत्रकोे मुचुल्कासमेत उठाएको स्थानीयवासी बताउँछन्। नगरपालिकामा वन तथा सार्वजनिक क्षेत्र अतिक्रमण गरेर प्लटिङ गर्ने भू-माफिया सक्रिय रहेको भन्दै स्थानीयवासीले अतिक्रमण गर्नेलाई कारबाही गरी यस्ता कानुन विपरीतका कार्य बन्द गराउन नगरपालिका समक्ष माग गरेका छन्।
सार्वजनिक जग्गाको अतिक्रमणको विषयमा वडा नम्बर ९ का वडाध्यक्ष घनश्याम थापाले सार्वजनिक जग्गा अतिक्रमणको विषयलाई गम्भीरतापूर्वक लिएको बताए। थापाले भने, 'प्लटिङका लागि अतिक्रमण गरेर खोल्सामा राखिएको ह्युमपाइप निकाल्दै छौँ। बाँकी रहेका ४/५ वटा पनि तत्काल निकाल्ने छौं।'
इन्द्रेणी सामुदायिक वन मासेर जग्गा प्लटिङको लागि बाटो लगेको विषयमा वडाध्यक्ष थापाले बाटो तत्काल बन्द गर्ने बताउँदै वनबाट बाटो लैजानु गलत भएको स्वीकार गरे। वन मासेर सडक बनाएको क्षेत्रमा वडा कार्यालयले वृक्षारोपण गर्नेसमेत अध्यक्ष थापाले जिकिर गरे। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791692981.webp)
-1786602170.png)
