काठमाडौं। युक्रेनको जापोरिज्जिया क्षेत्रमा रुसी हवाई आक्रमणमा परी कम्तीमा २० जनाको मृत्यु भएको छ। शनिबार आवासीय भवनमा रुसी बम खस्दा तीन बालबालिकासहित २० जनाको ज्यान गएको युक्रेनी अधिकारीहरूले बताएका छन्।
युक्रेनको राज्य आपत्कालीन सेवाका अनुसार आक्रमणमा कम्तीमा १८ जना घाइते भएका छन्। रुसी आक्रमणबाट आवासीय भवनमा क्षति पुगेको छ भने उद्धारकर्मीहरूले भग्नावशेष हटाउने काम गरेका छन्।
युक्रेनका राष्ट्रपति भोलोदिमिर जेलेन्स्कीले रुसी आक्रमणको आलोचना गर्दै रुसले ऊर्जा निर्यातबाट प्राप्त गर्ने आम्दानी युद्धमा प्रयोग गरिरहेको बताएका छन्। अमेरिकी राष्ट्रपति डोनाल्ड ट्रम्पले रुसबाट डिजेल खरिद गर्ने सम्झौता घोषणा गरेपछि जेलेन्स्कीले यस्तो प्रतिक्रिया दिएका हुन्।
जेलेन्स्कीका अनुसार रुसले ऊर्जा निर्यातबाट प्राप्त अतिरिक्त आम्दानी हतियारका उपकरण, ड्रोनको क्षमता वृद्धि, क्षेप्यास्त्र उत्पादन र भाडाका सैनिक भर्नामा खर्च गर्न सक्छ। रुसको युद्ध गर्ने क्षमता कमजोर नहुँदासम्म मस्को युद्ध रोक्न तयार नहुने उनको भनाइ छ।
रुसले युक्रेनमाथि पूर्णस्तरको आक्रमण सुरु गरेको साढे चार वर्षभन्दा बढी भइसकेको छ। पछिल्लो चार दिनमा रुसी आक्रमणमा ६० भन्दा बढी मानिस मारिएको विवरण छ। दुवै देशबीच लामो दूरीका हवाई आक्रमण जारी छन् भने स्थल मोर्चामा युद्ध धेरै हदसम्म गतिरोधमा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791692981.webp)
-1786602170.png)
