चिप्लेढुङगा- नेपालका लागि इजरायलका राजदूत बिनी ओमरले नेपालको कृषि क्षेत्रमा सघाउने बताएका छन्। पोखरा उद्योग वाणिज्य सङ्घले मङ्गलबार पोखरामा आयोजना गरेको 'नेपाल र इजरायलबीचको व्यावसायिक सहकार्यको सम्भावना' विषयक कार्यक्रममा उनले सो कुरा बताएका हुन्।
इजरायलले कृषिमा गरेको उन्नतिबाट नेपालले धेरै कुरा सिकेर कृषिमा निर्भर हुनसक्ने उनको भनाइ थियो। भारतमा इजरायलले अपनाएको आधुनिक कृषि प्रणालीको अनुशरण गर्दै तालीम केन्द्र नै बनेको प्रसङ्ग निकाल्दै उनले भने, 'नेपालले आवश्यक ठानेमा हामी यहाँ पनि त्यस्तो तालीम केन्द्र निर्माणका लागि सहयोग गर्न तयार छौँ।' उनले साना किसान बैंकमार्फत हरेक वर्ष ५ सय जनाको हाराहारीमा नेपाली कृषिबारे सिक्न इजरायल जाने गरेको जानकारी दिए।
इजरायलबाट फर्केकाहरुले कृषि क्षेत्रमा गरेको प्रगति लोभलाग्दो भएको उनको भनाइ थियो। राजदूत ओमरले नेपाली अर्थतन्त्र उकास्न कृषिमा आधुनिकीकरण महत्वपूर्ण हुने सुझाव पनि दिए। राजदूत ओमरले संसारभर व्यापारको भाषा एउटै हुन्छ भन्दै पोखरा र इजरायलका व्यवसायीबीच सहकार्यको क्षेत्र खोज्न सकिनेमा जोड दिए।
कार्यक्रममा पोखरा उद्योग वाणिज्य सङ्घका कार्यवाहक अध्यक्ष नारायण कोइरालाले इजरायलको कृषि र घरेलु क्षेत्रमा काम गरेका नेपालीले त्यहाँबाट फर्केपछि गरेको उन्नतिको चर्चा गरे। इजरायलको थोपा सिँचाइको प्रयोग, उत्पादकत्व बढाउन प्रयोग गरिने आधुनिक प्रविधि तथा कठिन श्रमको समिश्रण अनुकरणीय भएको कोइरालाको भनाइ थियो।
कार्यक्रममा सङ्घका वाणिज्यतर्फका उपाध्यक्ष पवनकुमार प्रजापतिले सानो देश भए पनि इजरायलले गरेको आर्थिक उन्नति सबैका लागि अनुकरणीय भएको धारणा राखे। प्रजापतिले शिक्षा, स्वास्थ्य, पर्यटन र कृषिको व्यावसायीकरणमा जोड दिँदै आएको पोखरा उद्योग वाणिज्य सङ्घ कृषि क्षेत्रमा इजरायलसँग साझेदारी गर्न तयार रहेको उल्लेख गरे।
सङ्घका महासचिव अर्जुन पोखरेलले राजदूतको पोखरा भ्रमणसँगै पोखरा उद्योग वाणिज्य सङ्घ र इजरायलबीचको सम्बन्धमा नयाँ आयाम थपिएको जिकिर गरे। (समाचार-रासस/तस्बिर-डिसी नेपाल)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791692981.webp)
-1786602170.png)
