काठमाडौं- आगामी १४ जुनदेखि ७ जुलाई सम्म हुने कोपा अमेरिका फुटबल प्रतियोगिता २०१९ का लागि अर्जेन्टिनाले राष्ट्रिय टिम घोषणा गरेको छ। टिममा स्पेनिस क्लब बार्सिलोनाका सुपरस्टार लिओनल मेसी र म्यानचेस्टर सिटीका फरवार्ड सर्जियो अग्युरो फर्किएका छन्।
मंगलबार घोषणा गरिएको २३ सदस्यीय राष्ट्रिय टिममा इटालियन क्लब युभेन्ट्सका फरवार्ड पाब्लो डिबाला पनि समावेश छन्। डिबालाका लागि यो सिजनको लागि राम्रो हुन सकेको थिएन। उनले ३० खेल खेल्दा ५ गोल मात्र गर्न सके।
यता इन्टर मिलानका स्ट्राइकर मार्को इकार्डी टिममा समावेश छैनन्। उनले सिजनमा ११ गोल गरेका थिए।
यसअघि टिममा नपरेका सर्जियो अग्युरोले सिजनमा उत्कृष्ट प्रदर्शन गरेका थिए। उनले म्यानचेस्टर सिटीलाई च्याम्पियन बनाउने क्रममा ३३ खेलमा २१ गोल गरेका थिए।
यता सेभिल्लाका डिफेन्डर गाब्रियल मर्कारडो टिममा पर्न असफल भएका छन्। घाइते भएका कारण ग्रिमिरोका डिफेन्डर वाल्टर कानेमान र रेसिङका विङगर मार्टिया जाराचो टिममा छैनन्।
कोपा अमेरिकामा यसपटक १२ टिमबीच प्रतिस्पर्धा हुँदैछ। एसियाका जापान र कतारलाई आमन्त्रित टिमको रुपमा कोपा अमेरिकामा स्थान दिइएको छ। यी बाहेक १० वटा दक्षिण अमेरिकी टिमबीच प्रतिस्पर्धा हुँदैछ।
समूह 'ए' मा आयोजक ब्राजिलसहित बोलिभिया, भेनेजुएला र पेरु छन्। समूह 'बी' मा अर्जेन्टिना, कोलम्बिया, पाराग्वे र कतार छन्। यसैगरी समूह 'सी' मा उरुग्वे, इक्वेइडर, जापान र चिली छन्। तीन समूहमा शीर्ष २ र उत्कृष्ट तेस्रो हुने २ टिम क्वार्टरफाइनलमा पुग्नेछन्।
४६ औं संस्करणको कोपा अमेरिकाको उद्घाटन खेल १४ जुनमा आयोजक ब्राजिल र बोलिभियाबीच प्रतिस्पर्धा हुनेछ। यसअघि सन् २०१६ मा भएको पछिल्लो संस्करणको विजेता चिली हो। चिलीले फाइनलमा अर्जेन्टिनालाई हराएर लगातार दोस्रो पटक उपाधि जितेको थियो।
अर्जेन्टिनी टिम
गोलकिपर- फ्रान्को अर्मानी (रिभर प्लेट), अगुस्टिन मार्चेसिन (क्लब अमेरिका), इस्टाबन एन्ड्राडा (बोका जुनियर्स)
डिफेन्डर- जुवान फोयथ (टोटनह्याम), निकोलास ओटामेन्टी (म्यानचेस्टर सिटी), जर्मन पेज्जेला (फ्लोरेन्टिना), निकोलास टाग्लिफिको (अयाक्स), रामिरो फुन्स मोरी (भिल्लारियल), रेन्जो सराभिया (रेसिङ क्लब), मार्कोस अकुना (स्पोर्टिङ लिस्बन), मिल्टन कास्को (रिभर प्लेट)
मिडफिल्डर- लिएन्द्रो परेडेस (सेन्ट जेनिथ), गिइडो रोद्रिगेज (क्लब अमेरिका), गिओभानी लो सेल्सो (रियल बेटिस), एक्सक्युल पलासिओस (रिभर प्लेट), रोबर्टव पेरेर्या (वाटफोर्ड), रोद्रिगो डे पाउल (युडिनेसे), एन्जल डि मारिया (पिएसजी)
फरवार्ड- लिओनल मेसी (बार्सिलोना), सर्जियो अग्युरो (म्यानचेस्टर सिटी), लउटारो मार्टिनेज (इन्टर मिलान), पाब्लो डिबाला (युभेन्ट्स), मार्टियस सुआरेज (रिभर प्लेट)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
