काठमाडौं– नेपालको दुर्गम मानिने हुम्लामा सबैको आशा थियो, यसपालि प्रतिनिधिसभा निर्वाचनमा कि वाम गठबन्धनका उम्मेदवारले बाजी मार्नेछन् कि लोकतान्त्रिक मोर्चाका उम्मेदवारले नै।
तर, यी दुबै आँकलनलाई गलत सावित गर्दै स्वतन्त्र उम्मेदवार छक्कबहादुर लामा विजयी भए। उनले नेपाली कांग्रेसका मंगलबहादुर शाहीलाई ४७ मतले पराजित गर्ने क्रममा सबैलाई छक्क तुल्याए।
छक्कबहादुर हुम्लाका बौद्धिक नेता मानिन्छन्। २०४८ सालमा जनमोर्चाबाट राजनीति सुरु गरेका उनी तत्कालिन राजा ज्ञानेन्द्रको शाहीकालमा स्थानीय राज्यमन्त्री नियुक्त भएका थिए। उनी सातवटा भाषामा पोख्त मानिन्छन्।
हुम्लाको सडक विस्तारमा अग्रणी भूमिका निर्वाह गरेका कारण उनलाई शाहीकालको मन्त्री भए पनि स्थानीयहरूले रुचाउने गरेको हुम्ला नेकपा एमालेका पूर्वसचिव हस्त शाहीले जानकारी दिए।
‘उहाँ भिजन भएको मान्छे हो। हुम्ला–सिमिकोट र चीनको नाका जोड्ने लिमी–लाप्चा सडकखण्ड निमार्णमा उहाँको भूमिका छ,’ हाल युवा संघ, नेपालको केन्द्रिय सचिव र प्रचारप्रसार विभाग प्रमुख रहेका शाहीले नेपाल लाइभलाई जानकारी दिए।
छक्कले प्रत्यक्ष निर्वाचन पहिलोपटक जितेका हुन्। उनी २०४८ सालमा जनमोर्चाबाट उठेका थिए। त्यति बेला उनी नेकपा एमालेका गोरखबहादुर बोगटी र नेपाली कांग्रेसका चक्रबहादुर शाही पछि तेस्रो भएका थिए।
२०७० सालको दोस्रो संविधान सभा निर्वाचनमा उनी माओवादी केन्द्रबाट निर्वाचन उठेका थिए। यति बेला पनि उनी नेपाली कांग्रेसका जीवनबहादुर शाहीसँग पराजित भएका थिए।
यसपालि माओवादीका केन्द्रिय नेताहरूले उनको सट्टा २०७० सालमा समानुपातिकबाट सासंद बनेका छिमी दोर्ची लामालाई प्रत्यक्षमा उठाउने निर्णय गरेपछि उनले स्वतन्त्र उम्मेदवारको रुपमा उम्मेदवारी दिएका थिए।
‘स्थानीयस्तरमा राम्रो छवी भएका कारण एमाले र माओवादी कै कार्यकर्ताले उहाँलाई समर्थन गरेका कारण जित्न सफल हुनुभएको हो,’ एमालेका स्थानीय विद्यार्थी नेता रबिन कुमार शाहीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
