काठमाडौं– वैदेशिक रोजगार व्यवसायीको छाता संगठन वैदेशिक रोजगार व्यवसायी संघभित्रै आरोप प्रत्यारोप चलेपछि निर्वाचन मितिको टुंगो लाग्न सकेको छैन।
निर्वाचनका सम्बन्धमा व्यवसायीहरूबीच नै दुई मत भएपछि निर्वाचन मितिको टुंगो लाग्न नसकेको हो।
संघले सरकारसामु ५ बुँदे माग अघि सार्दै निर्वाचन मिति तयका लागि समेत शुक्रबार विशेष भेला आयोजना गरेको थियो।
नेपाली कांग्रेस निकट नेपाल लोकतान्त्रिक वैदेशिक रोजगार व्यवसायी फोरम र नेपाल कम्युनिष्ट पार्टी (नेकपा) निकट प्रगतिशील वैदेशिक रोजगार व्यवसायी मञ्च नेपालबीच भेलामै आरोप प्रत्यारो चलेको थियो।
संघको नेतृत्व सम्हालिरहेका अध्यक्ष रोहन गुरुङ सत्तारुढ दल नेकपा निकट हुन्। सरकारमा उनकै पार्टी हुँदासमेत व्यवसायीको हकहित सम्बन्धमा अध्यक्ष गुरुङले आवश्यक कदम चाल्न नसकेका लोकतान्त्रिक फोरम पक्षका व्यवसायीहरू बताउँछन्।
आफ्नै पार्टीको सरकार नेतृत्वमा भएको बेला म्यानपावर व्यवसाय संकटमा पुगेको भन्दै यसैबेला निर्वाचनको कुरा ल्याएर बिचैमा अध्यक्ष गुरुङ पन्छिन नपाउने कांग्रेस निकट लोकतान्त्रिक फोरमका महासचिव तारानाथ अर्यालले बताए।
उनले भने, ‘संघको नेतृत्व गरिरहेका अध्यक्ष रोहन गुरुङकै निकट पार्टीको सरकार नै राज्य सत्तामा रहेको अवस्थामा पनि म्यानपावरलाई नै मारमा पर्नेगरी सरकारले काम गरिरहेको छ, यस्तो अवस्थामा व्यवसायीहरू निर्वाचनतिर जानुभन्दा पनि नगद धरौटीको ब्याजदर पाउने व्यवस्थामा सरकारसँग सहमति जुटाउन आवश्यक छ।’
लोकतान्त्रिक फोरमका व्यवसायीहरूले अध्यक्ष गुरुङले सरकारसँग राम्रोसँग व्यवसायीको कुरा राख्न नसक्दा म्यानपावर व्यवसाय धरापमा परेको आरोप समेत लगाएका छन्।
फोरमकै व्यवसायीहरूबीच संघको निर्वाचन सम्बन्धी फरक फरक मत रहेको छ।
फोरमका कार्यबाहक अध्यक्ष सुजित श्रेष्ठले आगामी असार ३० भित्र संघको निर्वाचन जुनसुकै हालतमा पनि हुनै पर्ने बताए।
उनले भने, ‘रोहन गुरुङको अध्यक्षतामा रहेको संघले व्यवसायीहरूको हकहितका सम्बन्धमा केही काम गर्न नसकेपछि आजै राजिनामा दिए पनि फरक पर्दैन।’
कम्युनिष्ट सरकारले म्यानपावर व्यवसायीमाथि सिण्डिकेट लादेको बताउँदै यसको जिम्मा संघको नेतृत्व गरिरहेका अध्यक्ष गुरुङले लिनुपर्ने दाबी गरे।
प्रगतिशील वैदेशिक रोजगार व्यवसायी मञ्च नेपालका कार्यवाहक अध्यक्ष चित्र गुप्त साँवा लिम्बुले व्यवसायी भित्रै पनि माफियाहरूको चलखेल रहेकाले सबै व्यवसायी एकजुट भएर अघि बढ्न आवश्यक भएको बताए।
संघको निर्वाचनमा कुनैपनि समस्या नरहेकाले सबै व्यवसायीको सहमतिमा निर्वाचन मितिको टुंगो लगाउनु पर्ने उनले बताए।
उनले भने, ‘निर्वाचन भएर, नयाँ नेतृत्वको टोली संघमा आउने बित्तिकै सबै समस्या समाधान भइहाल्छन् भन्ने छैन।’
वैदेशिक रोजगार व्यवसायी संघका अध्यक्ष गुरुङले आफू सधैं व्यवसायीकै पक्षमा रहेर काम गरिरहेको बताए।
उनले भने, ‘तपाईंहरू सबैको छनोटबाट म संघको अध्यक्ष पदमा पुगेको हुँ, हामी सबै मिलेर अगाडि बढ्नु जरुरी छ, मैले राजीनामा दिँदैमा सबै समस्या सुल्झिन्छन् भने म आजै राजीनामा दिन तयार छु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
