डडेलधुरा- डडेलधुराको गन्यापधुरा गाउँपालिका–१, भात्काँडामा रहेको सरस्वती माविमा छात्रावास नहुँदा विद्यार्थीले सास्ती खेप्नु परेको छ। गाउँपालिककामै पहिलो कृषि शिक्षालयका रुपमा सरस्वती मावि स्थापित भए पनि छात्रावासको व्यवस्था नहुँदा विद्यार्थीहरुले कोठा खोज्न भात्काँडा नजिकका गाउँघर धाउनु परेको हाे।
सरस्वती माविमा गत शैक्षिक सत्र देखि कृषि प्राविधिक भेटेनरीतर्फ डिप्लोमा तहमा कृषि विषयमा पढाइ हुँदै आएको छ। गत वर्षको नतिजामा शतप्रतिशत सफल रहेको विद्यालयका प्रधानाध्यापक कुलबहादुर रायले बताए।
विद्यालयले मंगलबार स्थापनाको ४२औं वार्षिकोत्सवसमेत मनाएकाे छ। विद्यालयले २०७४ देखि सिटिइभिटीबाट सम्बन्धन प्राप्त गरी कृषि प्राविधिक तर्फकाे पठनपाठन सञ्चालन गरे पनि छात्रावास नहुनु, उपयुक्त खेलमैदान नहुनु तथा विद्यालयमा तारबार नहुँदा समस्या उत्पन्न भएको शिक्षक, अभिभावक, विद्यार्थीको गुनासो छ। १६ रोपनीभन्दा बढी क्षेत्रमा रहेको विद्यालयको चौतर्फी पर्खाल वा तारबार, खेलकुद मैदान र छात्रावासका लागी शिक्षक, अभिभावक, विद्यार्थीहरुले स्थानीय, प्रदेश तथा संघीय सरकारसँग आग्रह गरेका हुन्।
सुदूरपश्चिम प्रदेशका ७ वटै पहाडी जिल्लाहरुबाट कृषि प्राविधिक विषय पढ्न विद्यार्थीहरु आउँछन्। शिक्षक तिलक भट्टले भने, 'विद्यालयमा छात्रावास नहुँदा गाउँका घर-घरमा पुगी कोठा खोज्नुपर्ने समस्या विद्यार्थीको छ। त्यसमाथि छात्रावासको व्यवथा नहुँदा विद्यार्थीकाे संख्यामा कमी आउन सक्छ।'
सेवासुविधाका आधारमा नै विद्यार्थी र अभिभावकले विद्यालय छनाेट गर्ने उनको भनाइ छ।
६ जना शिक्षक निजी स्रोतबाट परिचालन गरी कृषि प्राविधिक विषय सञ्चालनमा ल्याएको उनले बताए। अझै २ जना शिक्षककाे कमी रहेकाे पनि उनको भनाइ छ।
गन्याधुरा गाउँपालिकामा अहिले २४ वटा सामुदायिक विद्यालय छन्। जसमध्ये ६ वटा माध्यामिक विद्यालय छन्। गन्याधुरा गाउँपालिका अध्यक्ष नबल मल्लले सरस्वती माविकाे गुणस्तर सुधार्ने पहिलाे अभिभारा स्थानीय सरकारकाे रहेकाे बताउँदै आफूहरुकाे प्राथमिकतामा रहेकाे बताए। 'शिक्षा क्षेत्रमा क्रमिक रुपमा विकास हुँदै गएको छ। गाउँपालिकामा पहिलो कृषि शिक्षालयका रुपमा सरस्वती माविले कृषि विषय पठनपाठन गरिरहेकाेले यसका लागि आवश्यक पूर्वाधार र शैक्षिक गुणस्तरका लागी गन्यापधुरा सरकार प्रतिबद्ध छ,' उनले भने।
पठनपाठनको वातावरण र गुणस्तरीय शिक्षा आर्जनका लागी भौतिक संरचना लगायत दक्ष जनशक्ति आवश्यक पर्ने भएकाले उपयुक्त वातावरण बनाउन आफू प्रतिबद्ध रहेको सुदूरपश्चिम प्रदेशसभा सदस्य कर्णबहादुर मल्लले बताए। विद्यालयले आवश्यक ठानेका विषय पूर्तिका लागि आफ्नाे तर्फबाट पूर्ण प्रयास थाल्ने उनको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
