डडेल्धुरा– डडेल्धुरामा ट्रायल सेन्टर व्यवस्था भएसँगै जेठबाट सवारी चालक अनुमति पत्र वितरण गर्ने तयारी पनि भइरहेको छ।
लाइसेन्स निकाल्न सकिने भएपछि सुदूरपश्चिम प्रदेशका पहाडी जिल्लालाई सहज हुने भएको छ।
डडेल्धुरामा स्थापना भएको यातायात व्यवस्था सेवा कार्यालयले जिल्लामै सवारी लाइसेन्सको परीक्षा सञ्चालन गरी लाइसेन्स वितरण गर्ने भएपछि ७ वटै पहाडी जिल्लाका नागरिकलाई सहज हुने यातायात व्यवस्था सेवा कार्यालय डडेल्धुराले जनाएको छ।
अहिले डडेल्धुरा बाहेकका सुदूरपश्चिमका पहाडी जिल्ला वैतडी, बझाङ, दार्चुला, बाजुरा, डोटी, अछामवासीले नयाँ सवारी चालक अनुमति पत्र लिन कैलाली र कञ्चनपुर जानुपर्ने बाध्यता छ।
सवारी चालक अनुमति पत्रका लागि सुरुमा फोटो खिच्न, लिखित परीक्षा र ट्रायल गरी ३ पटक कैलाली तथा कञ्चनपुर जाँदा हजारौं खर्च हुने गरेको छ।
अब ७ वटै जिल्जिलाका नागरिकले कैलाली र कञ्चनपुर गएर नयाँ सवारी चालक अनुमति पत्र निकाल्नुपर्ने बाध्यताको समेत अन्त्य हुने भएको छ।
यसअघि सवारी चालक अनुमति पत्र नवीकरण, सवारी दर्ता (ब्लुबुक) नवीकरण सेवा, सवारी जाँचपास सेवा सुरु गरेको डडेल्धुरा यातायात व्यवस्था सेवा कार्यालयले बताएको छ।
अब निर्माण भएको ट्रायल सेन्टर भाडामा लिइ लाइसेन्स वितरण गर्ने तयारी थालेको कार्यालय प्रमुख दिलीप लामाङले जानकारी दिए।
‘अब स्मार्ट लाइसेन्स जारी, सवारी साधनको दर्ता र नवीकरण गर्ने कामको तयारी गरिहेका छांै,’ लामाङले भने, ‘सवारी चालक अनुमति पत्र जारी गर्न हाम्रो आफ्नो ट्रायल सेन्टर नभएकाले उग्रतारा ड्राइभिङ एण्ड ट्रेनिङ सेन्टरलाई भाडामा लिएर काम गर्न हामी लागि परेका छौं।’
प्रदेशको भौतिक पूर्वाधार तथा विकास मन्त्रालयमा ट्रायल सेन्टर भाडामा लिन र अनुमति प्रदान गर्न पत्राचार गरेको उनले बताए। ‘मन्त्रालयबाट ट्रायल सेन्टरको निरीक्षण भइसकेको छ, अब जेठबाट काम सुरु हुन्छ,’ तामाङले भने।
करिब ५ महिना अघिबाट निर्माण थालिएको उग्रतारा ड्राइभिङ एण्ड ट्रेनिङ सेन्टरमा १ करोडको लगानी रहेको सञ्चालक तेजबहादुर ऐरले बताए। ‘फिल्डदेखि लेआउटको निर्माण गर्न १ करोडको लगानी लागेको छ र ट्रायल सेन्टरको लागि ५० लाखको सवारी साधन खरिद भएको छ,’ उनले भने।
डडेल्धुराबाटै नयाँ सवारी चालक अनुमति पत्र निस्किने भएपछि पहाडी जिल्लावासीलाई सहजतासँगै यहाँको व्यापार व्यवसाय समेत फस्टाउने अमरगढी नगरपालिकाका प्रमख विश्वेश्वर प्रसाद ओझाले बताए। उनले भने, ‘डडेल्धुराबाटै लाइसेन्स वितरण हुनेभएपछि तराई जाने सबै सेवाग्राही यहाँ आँउछन्। जसले गर्दा यहाँको व्यापार, यातायात तथा पर्यटन विकासमा समेत सहयोग गर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
