काठमाडौं– पहिलो चरणमा निर्वाचन भएका ३२ जिल्लामा बिहिबार ५ बजेबाटै मतगणना सुरु हुने भएको छ। सबैजसो जिल्लामा सर्वदलिय बैठक बसिसकेको छ। सर्वदलिय बैठकबाट सहमति गरी सबै जिल्लामा अपराह्न ५ बजेदेखि नै मतगणना सुरु गर्ने अन्तिम तयारी भइरहेको छ।
पहिलो चरणमा निर्वाचन भएका ३२ वटा जिल्लामा सर्वदलिय बैठक सम्पन्न भइसकेकेका र केहीमा जारी रहेको निर्वाचन आयोगका प्रवक्ता नवराज ढकालले बताए । ‘सायद ३२ जिल्लामै ५ बजेदेखि नै मतगणना सुरु हुने छ,’ उनले भने।
मंसिर ११ गते हिमाली तथा पहाडी ३२ जिल्लामा निर्वाचन भएको थियो। जिल्ला सदरकुमामहरुमा मतगणनाको अन्तिम तयारी भइरहेको छ। ३२ जिल्लामा ३७ प्रतिनिधिसभा सदस्य र ७४ प्रदेशसभा निर्वाचनका लागि पहिलो चरणमा निर्वाचन भएको थियो। सुरुमा प्रत्यक्षतर्फको मतगणना हुने निर्वाचन आयोगले जनाएको छ।
सबै गतगणनास्थलमा सिसिटिभी र जाली
मतगणनालाई विवादरहित बनाउन सुरक्षा व्यवस्था कडा बनाइएको छ। सबै जिल्लामा मतगणनास्थलमा सिसिटिभी र जाली राखिएको जिल्ला प्रहरी प्रमुखहरुले बताएका छन्। स्थानीय तहको निर्वाचनमा मतगणनामा खटिएका प्रतिनिधिहरुले मतपत्र च्यातेकाले त्यस्तो घटना हुन नदिन दलका प्रतिनिधिलाई जाली बाहिर राख्न लागिएको हो।
दोलखाका प्रहरी प्रमुख डिएसपी रामेश्वर कार्कीका अनुसार दोलखामा तीनस्थानमा मतगणना हुने छ। तिनै स्थानमा सिसिटिभी र जाली राखिएको छ। ‘सर्वदलिय बैठक सम्पन्न भइसकेको छ,’ उनले भने,‘५ बजेबाट नै मतगणना सुरु गर्न लागिरहेका छौं।’
सोलुखुम्बुमा पनि ५ बजेदेखि नै मतगणना सुरु हुने डिएसपी रेशम पराजुलीले जानकारी दिए। रोल्पामा पनि मतगणनाको सबै तयारी भइसकेको छ। ५ बजेदेखि नै मतगणनाको सहमति भएको डिएसपी ज्ञानेन्द्र फुँयालले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
