काठमाडौं– वैदेशिक रोजगारीका लागि कुवेत हिँडेका ४३ जना श्रमिकहरु त्रिभुवन अन्तर्राष्ट्रिय विमानस्थलबाटै फिर्ता भएका छन्।
रोजगारीका लागि भन्दै शुक्रबार घरबाट बिदा भएर विमानस्थलसम्म पुगेपछि भिसा तथा टिकट सबै नक्कली भएपछि उनीहरु फिर्ता हुन बाध्य भएका हुन्। उनीहरुलाई शुक्रबार बेलुका ८ बजेको उडान समय भनिए पनि दिउँसो ३ बजे नै उनीहरु विमानस्थल पुगेका थिए।
विमानस्थलको वैदेशिक रोजगारका लागि प्रस्थान कक्षको ढोकामा पुगेर आफ्ना सबै कागजपत्रहरु देखाउँदा नक्कली भएको खुलेपछि सबै ४३ जना फर्काइएका थिए।
यसरी ठगिए युवा
रोजगारीको खोजीमा भौँतारिरहेका अर्घाखाँचीका हरिप्रसाद श्रेष्ठलाई चिनेकै साथीले एकजना व्यक्तिले कुवेतको राम्रो कम्पनीमा कामका लागि धेरैलाई पठाउँदै आएको सुनाए। श्रेष्ठले साथीमाथि विश्वास गरे र उनले भनेअनुसार नै ति व्यक्तिलाई भेटे।
युवाहरुलाई राम्रो कमाइ हुने कम्पनीमा कुवेत पठाउने भन्ने व्यक्ति थिए स्याङ्जाका श्याम थापा। थापाले श्रेष्ठलाई कुवेतमा 'मार्केट'मा राम्रो काम भएकाले १ लाख २५ हजार रुपैयाँ लागत लाग्ने बताएका रहेछन्।
कुवेतमा मासिक कमाइ ४० हजार रुपैयाँभन्दा बढी हुने सुनाएपछि श्रेष्ठ कुवेत जान तयार भए। करिब ६ महिनाअघि कुवेत जान भन्दै भनिएअनुसार सबै पैसा बुझाएका श्रेष्ठलाई अहिले कुवेतका लागि भिसा आइसकेको भनेर सुनाएका रहेछन्।
'शुक्रबार बेलुका ८ बजेकाे 'फ्लाइट टाइम' भन्दै बोलाइयो। हामी फ्लाइट छुट्छ भनेर हामी सबैजना ३ बजे नै विमानस्थल पुगेका थियाैं', श्रेष्ठले घटनाबारे सुनाए।
३ बजे विमानस्थल पुगेका उनीहरु कुवेत उडाउने भन्दै पैसा बुझाएका व्यक्कति श्याम थापाको प्रतिक्षामा बसे। थापा नआएपछि उनीहरुले सम्पर्क गर्न खाेजे। तर, थापाकाे फोन 'स्विच अफ' थियो।
वैदेशिक रोजगार विभागबाहिर भेटिएका सलार्हीका राम कार्कीले भने, ‘हामी कुवेत जाने भनेर खुसी हुँदै विमानस्थल सम्म आयौँ, थुप्रै समय कुरियो तर मान्छे फोन अफ गरेर फरार।’ परिवारकाे आर्थिक अवस्था सुधार गर्न भन्दै विदेश जान लागेका उनीहरु ठगिएपछि अहिले चिन्तामा छन्।
‘हामी घरबाट बिदा भएर हिँडिसकेका अब कुन मुख लिएर घर फर्कनु?', विभागमै भेटिएका अर्गाखाँचीकै राजेन्द्र थारु भन्छन्, 'हाम्रो विजोग भयो, एकातिर पैसा पनि गयो अर्कातिर समय पनि गयो।’
५० लाखभन्दा बढी ठगी
उनीहरुलाई विभिन्न कम्पनी वा सुपर मार्केटमा सजिलो काम लगाइदिने भनेर आश्वासन दिइएकाे थियो। अर्घाखाँचीका हरिप्रसाद श्रेष्ठ, राजेन्द्र थारु, राम कार्की, प्रेम बलाल, कृष्णबहादुर रायमाझीलगायत अन्य ४३ जनाले श्याम थापालाई १ लाख देखि डेढ लाख रुपैयाँसम्म रकम बुझाएका थिए।
यसरी हेर्दा थापाले करिब ५० लाखभन्दा बढीकाे ठगी गरेका छन्।
थापा पक्राउ परेकाे २४ घण्टामै रिहा, फिर्ता भएन पीडितकाे रकम
विमानस्थलबाट फिर्ता भएपछि २ दिनसम्म श्याम थापा सम्पर्कमा आएनन्। युवाहरुले प्रहरीमा उजुरी गरेपछि थापालाई प्रहरीले पक्राउ गर्याे। ठगिएको केही प्रमाण नभएकाले नियन्त्रणमा लिएकाे २४ घण्टापछि लिएको रकम फिर्ता गर्ने कागज बनाएर श्याम थापालाई प्रहरीले छाड्यो।
अहिले सम्पर्क गर्दा थापाले रकम भोलि दिने भन्दै झुल्याइरहेको पीडित युवाहरुले बताए।
थापा कुनैपनि म्यानपावर कम्पनीको एजेन्ट नभएको र युवाहरुलाई विदेशमा राम्रो काम र कमाई भएको भन्दै मोटो रकम असुलेर ठगी गर्दै आएको थाहा पाएकाे पीडितहरुले दाबी गरे।
वैदेशिक रोजगारीका नाममा युवाहरुलाई ठगी गर्ने क्रम बढ्दै गइरहेको वैदेशिक रोजगार विभागले जनाएको छ। वैदेशिक रोजगारका नाममा ठगीएको प्रमाणका आधारमा विभागले पीडक र पीडित पक्षसँग छलफल गराई पीडितहरुलाई क्षतिपूर्ति उपलब्ध गराउँदै आएको छ। म्यानपावर कम्पनी र एजेन्टलाई कारबाही प्रक्रियामा समेल गराएपनि युवाहरु ठगिने क्रम भने घटेकाे छैन।
वैदेशिक रोजगार विभागका निर्देशक हरिप्रसाद ज्ञवालीले भने, ‘वैदेशिक रोजगारकै नाममा ठगिएका तर प्रमाण नभएका कामदारको उजुरी विभागले लिँदैन।’
पीडितहरुसँग ठगिएको प्रमाण नभएको खण्डमा भने यस्ता उजुरी लिएर पीडितहरु महानगरीय प्रहरी परिसर काठमाडौं तथा अपराध अनुसन्धान महाशाखासम्म पुग्ने गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791703930-1791704860.jpg)
-1786602170.png)
