काठमाडौं– युवा, श्रम तथा रोजगार मन्त्री रामजी यादवले निजी क्षेत्रसँगको सहकार्यमा सरकारले सीपयुक्त जनशक्ति उत्पादन गर्ने बताएका छन् ।
आइतबार भक्तपुरमा एभरेष्ट मल्टिस्किल प्रा.लि.ले सञ्चालन गरेको सीपमूलक तालिम केन्द्रको उद्घाटन गर्दै उनले बजारको मागअनुसार सीपयुक्त जनशक्ति उत्पादन गरी रोजगारीसँग जोड्ने बताएका हुन् ।
सीपयुक्त जनशक्ति नहुँदा हाल युवाले रोजगारी र रोजगारदाताले दक्ष जनशक्ति पाउन नसकेको उनले बताए । उनले उद्योग, निर्माण, पर्यटन, कृषि, सूचना प्रविधि तथा सेवा क्षेत्रमा दक्ष जनशक्तिको आवश्यकता रहेको बताए । उनले तालिम केन्द्रहरुमार्फत युवाहरूलाई सीप सिकाएर बजारको मागअनुसार रोजगारीसँग जोड्नुपर्नेमा जोड दिए ।
सीप विकासलाई प्रभावकारी बनाउन सरकार, निजी क्षेत्र, तालिम प्रदायक संस्था र स्थानीय तहबीच सहकार्य आवश्यक रहेको उनको भनाई छ । उनले रोजगारदाता तथा उद्योगी व्यवसायीलाई प्रशिक्षार्थीलाई व्यावहारिक अनुभव प्रदान गर्न र सीपयुक्त युवालाई रोजगारीमा जोड्न आग्रह गरे । तालिम केन्द्रको सफलता तालिम लिने व्यक्तिको संख्यामा मात्र सीमित नराखी तालिमपछि रोजगारी प्राप्त गर्ने, उद्यम सुरु गर्ने र आयआर्जनमा सुधार ल्याउने व्यक्तिको संख्याको आधारमा मूल्यांकन गर्नुपर्ने उनको भनाई छ ।
उनले भने, ‘नेपालको प्रमुख चुनौती बेरोजगारी मात्र होइन, बजारले खोजेको सीप र हामीले उत्पादन गरिरहेको जनशक्ति बिचको अन्तर पनि हो । एकातिर युवाहरू रोजगारी खोजिरहेका छन् भने अर्कातिर उद्योग, निर्माण, पर्यटन, कृषि, सूचना प्रविधि तथा सेवा क्षेत्रमा दक्ष जनशक्तिको आवश्यकता पनि छ । त्यसैले हाम्रो प्राथमिकता के हुनुपर्छ भने बजारको मागअनुसार सिप र सिप अनुसारको रोजगारी र रोजगारीबाट आत्मनिर्भरता हुनुपर्छ । युवालाई प्रमाणपत्र मात्र होइन, काम गर्ने सिप दिनुपर्छ । तालिम मात्र होइन, रोजगारीसँग जोड्ने अवसर पनि दिनुपर्छ । तालिम केन्द्रको सफलता कति जनाले तालिम गरे भन्ने आधारमा मात्र होइन, कति जनाले रोजगारी पाए, कति जनाले उद्यम सुरु गरे र उनीहरूको आम्दानीमा कति सुधार आयो भन्ने आधारमा पनि मापन गर्नुपर्ने हुन्छ । यसका लागि सरकार, निजी क्षेत्र, तालिम प्रदायक संस्था र स्थानीय तह बीचको सहकार्य पनि आवश्यक छ । म रोजगारदाता तथा उद्योगी व्यवसायीहरूलाई पनि के भन्न चाहन्छु भने तालिम केन्द्रहरूसँग सहकार्य गर्न, प्रशिक्षार्थीहरूलाई व्यवहारिक अनुभव अनुभूति दिन र सीपयुक्त युवालाई रोजगारीमा जोड्न पनि आग्रह गर्न चाहन्छु । त्यसैगरी युवा साथीहरूलाई पनि सीप सिक्न कहिले नहिचकिचाउन पनि अनुरोध गर्न चाहन्छु । कुनै पनि इमान्दार श्रमको सानो हुँदैन । सीप, मेहनत, अनुशासन र निरन्तर सिक्ने बानी पनि तपाईँलाई आत्मनिर्भर बनाउन सक्छ । तालिमलाई प्रमाणपत्रको सीमितमा नराखी त्यसलाई आफ्नो भविष्य निर्माण गर्ने माध्यम बनाउनुपर्छ । हाम्रो लक्ष्य युवालाई विदेश जानबाट रोक्नु मात्र होइन, नेपालमै सम्मानजनक रोजगारीको अवसर सिर्जना गर्नु र विदेश जाने युवालाई पनि दक्ष, सुरक्षित र मर्यादित श्रमिकका रूपमा स्थापित गर्नु हो । श्रम, युवा तथा रोजगार मन्त्रालयको प्राथमिकता पनि वैदेशिक रोजगारीलाई मर्यादित र आन्तरिक रोजगारीलाई प्रवर्द्धन, सीप विकास, उद्यमशीलता र श्रमिकको सम्मानलाई जोड्दै अघि बढ्नु हो । हामीले यस्तो वातावरण निर्माण गर्नुपर्छ जहाँ सीप भएको युवाले अवसर पाओस्, मेहनत गर्नेले सम्मान पाओस् र उद्यम गर्न चाहनेले आवश्यक सहयोग पाओस् । सीपयुक्त युवा, सम्मानित श्रम, सिर्जनशील उद्यम र समृद्ध नेपाल, यही हाम्रो साझा सङ्कल्प हो ।’
उनले मन्त्रालयले सीपयुक्त जनशक्ति निर्माण गरी स्वदेशमा नै रोजगारीका अवसर सिर्जना गर्नेतर्फ काम गरिरहेको बताए । साथै मन्त्रालयले वैदेशिक रोजगारीमा जाने युवालाई पनि दक्ष, सुरक्षित तथा मर्यादित श्रमिकका रूपमा पठाउने उल्लेख गरे । उनले हालै शुभारम्भ गरिएको प्रशिक्षण केन्द्रले गुणस्तरीय तालिममार्फत दक्ष जनशक्ति उत्पादन, रोजगारी सिर्जना र स्थानीय आर्थिक विकासमा योगदान पुर्याउने विश्वास व्यक्त गरे । साथै, युवालाई तालिममा सहभागी हुन र सीप विकासका अवसरको उपयोग गर्न प्रोत्साहित गर्न उनले सबै पक्षलाई आग्रह गरे । सीपयुक्त युवा, सम्मानित श्रम, सिर्जनशील उद्यम र समृद्ध नेपाल निर्माण साझा संकल्प हुनुपर्ने उनको भनाई छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
