काठमाडौं– गत शुक्रबार बेलुका प्रहरीको केन्द्रीय अनुसन्धान ब्युरो (सिआइबी), महानगरीय प्रहरी परिसर काठमाडौं र नेपाल राष्ट्र बैंकका प्रतिनिधि दरबारमार्गस्थित याक एन्ड यती होटल पुगे।
सूचना थियो, प्रतिबन्धित नेटवर्किङ व्यवसाय सञ्चालन गर्ने उद्देश्यले केही भारतीय व्यक्ति याक एन्ड यतीमा जम्मा भएका छन्।
साइन ग्रुपका म्यानेजिङ डाइरेक्टर ३४ वर्षीय रसिद नसिम, नेपाली मुलका महेन्द्र सिंह लगायतका व्यक्ति भएको सूचनामा प्रहरीले छापा हानेको थियो। साइन सिटी, साइन इन्फास्ट्रक्चर, साइन डाइमन्ड एन्ड गोल्ड र साइन साइन फोरेक्स जस्ता विभिन्न कम्पनीमार्फत उनीहरुले रियल स्टेट, हिरा, सुन र विदेशी मुद्रा बिक्रीमा लगानी गर्ने भन्ने भनेर ठगी गर्ने योजना रहेको प्रहरीले जनाएको छ।
त्यस्तै उक्त कम्पनीको मुख्य कार्यालय दुबई, शाखा कार्यालय लखनउ, सिंगापुर र मौरिससमा रहेको भन्दै नेटवर्किङ व्यवसायमार्फत १ हजार २ सय ५० अमेरिकन डलर लगानी गर्न लगाउने र सोही रकम बराबर कम्पनीले दुबईमा राखी खाता खोल्ने भन्दै ठगी गर्ने उनीहरुको योजना रहेको प्रहरीले जनाएको छ।
यसरी खाता खोलिसकेपछि जिमेलको आधारमा एउटै व्यक्तिको १ सय वटासम्म खाता खोल्न सकिने र मासिक १५ प्रतिशत कमिसन आफूले बनाएका अन्य सदस्यहरुबाट थप कमिसन बढ्दै जाने प्रलोभन देखाएर ठगी गर्ने योजना उनीहरुको थियो।
यसरी लगानी बढ्दै गएपछि १ करोड पुगेपछि उक्त व्यक्ति यस संस्थाको अधक्ष्य बन्नेसम्मका प्रलोभन उनीहरुले देखाएका थिए।
प्रहरीले पक्राउ गरेपछि उनीहरुको नाममा दुबईमा कुनै पनि साइन ग्रुपको कम्पनी नभएको पाइएको छ।
उनीहरुले ३ जना नेपालीबाट १ करोड २३ लाखसमेत ठगी गरिसकेको अनुसन्धानबाट खुलेको छ। ठगीका अन्य व्यक्ति पनि हुन सक्ने महानरीय प्रहरी परिसर काठमाडौंका डिएसपी होबिन्द्र बोगटीले बताए।
करोडौं ठग्ने योजना बनाउँदाबनाउँदै उनीहरु पक्राउ परेकाले थप ठगी हुन नपाएको प्रहरीले जनाएको छ। पक्राउ परेकाहरुलाई संगठित अपराधमा मुद्दा दर्ता गरेर प्रहरीले अनुसन्धान अघि बढाएको छ।
कोको पक्राउ परे?
पक्राउ पर्नेमा भारत इलाहाबादका ३१ वर्षीय मोहम्मद साइजिल, सोही ठाउँका ३३ का अजितकुमार सिंह, भारत छत्तीसगढका ४५ वर्षीय निरजकुमार मिश्र, उत्तरप्रदेशका ४३ वर्षीय अशोक कुमार, छत्तीसगढकै ४३ गिरिश उपाध्याय, भारतकै सोनभद्र ४० वर्षीय रमेश राम छन्।
त्यसैगरी भारत गुजरातका २२ वर्षीय आयुश उपाध्याय, उत्तरप्रदेशका ३८ का सुनिल उपाध्याय, लखनउका ३२ वर्षीय कसिफ सकिल, सोही ठाउँ सारामाइला बस्ने ३२ वर्षीय गजेन्द्रकुमार सिंह, नयाँदिल्लीका ४३ वर्षीय रसिद नसिम र बेङ्लोरका ३५ वर्षीय ३५ वर्षीय महेन्द्र सिंह छन्।
प्रहरीले उनीहरुको साथबाट १७ थान मोबाइल, १ थान आइप्याड, १ थान ल्यापटप, ३ थान मेमोरी कार्ड र १ थान हार्डडिस्क बरामद गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766743671.png)
-1766743434.png)
-1766740258.png)
-1764146706.png)
-1766648928.png)
-1763721444.png)
