नेपालगञ्ज- नेपालगञ्जलाई उत्कृष्ट नमूना शहर बनाउने लक्ष्यका साथ नेपालगञ्ज उपमहानगरपालिकाले विकासका महत्वपूर्ण योजनालाई प्राथमिकीकरण गर्दै निर्माण कार्यसमेत अघि बढाएको छ।
'हामीले पहिलो चरणमा नगरका अधिकांश भागमा सडक, ढल, नाला, डम्पिङ साइट निर्माणलगायत पूर्वाधार निर्माणलाई प्राथमिकतामा राखेका छौँं, नगर प्रमुख डा धवल शमशेर राणाले भने। नगरमा थुप्रै विकास निर्माणका काम जारी रहेको जनाउँदै उनले विकासमा जनप्रतिनिधि, कर्मचारी र स्थानीय जनताबीचको सहकार्य पनि सौहार्दपूर्ण रहेको उल्लेख गरे।
नेपालगञ्ज–४ स्थित साढे ४ बिघा जमिनमा अत्याधुनिक बसपार्क निर्माण कार्य अन्तिम चरणमा पुगेको, नेपालगञ्ज–२ न्युरोडस्थित ८ कट्ठा जमिनमा अत्याधुनिक बहुउद्देश्यीय ७ तले भवन, नेपालगञ्ज–८ स्थित मङ्गलप्रसाद मावि परिसरमा महिला कलेजको भवन निर्माणलगायत आधा दर्जनभन्दा बढी योजना मुख्य प्राथमिकतामा रहेको जनाइएको छ।
महिला कलेजका लागि ८ करोड रुपैयाँ बजेट विनियोजन गर्नुका साथै डिपिआर तयार गरेर निर्माणका लागि ठेक्का आह्वान गर्न काम अगाडि बढाइएको नगर प्रमुख राणाले बताए। मुस्लिम, मधेशी र अल्पसङ्ख्यक समुदायका छात्रालाई उच्च शिक्षामा पहुँच बढाउन महिला कलेज स्थापना गर्न लागेको उनको भनाइ थियो।
यसैगरी भुइँतले पार्किङसहितको सुविधा सम्पन्न ‘सपिङ कम्प्लेक्स’ निर्माणका लागि डिपिआर तयार भएको र अब निर्माण प्रक्रिया पनि चाँडै सुरु हुने जनाइएको छ। उपमहानगरपालिकाले नगरको फोहर व्यवस्थापन र सरसफाइलाई पनि उच्च प्राथमिकतामा राखेर हिरमिनियामा निर्माण गरिएको ‘ल्यान्डफिल्ड साइट’ यही बैसाखदेखि सञ्चालनमा ल्याइने र यसमा दैनिक ३० टनसम्म फोहर विसर्जन गर्न सकिनेछ।
यस्तै उपमहानगरपालिका–२१ मा खुला 'काञ्जी हाउस' निर्माण गरेर १ सय २३ पशुलाई आश्रय दिइएको छ भने सोही क्षेत्रमा गौशाला निर्माण थालिएको छ। 'नगरमा भइरहेका विकास निर्माणको प्रगति र भावी योजना नियमित सार्वजनिक गर्ने प्रतिबद्धता व्यक्त गर्छौं र विकास निर्माणका काममा सबै नगरवासीको सहयोग, समन्वय र सहकार्य पनि हामीलाई आवश्यक पर्छ', नगर प्रमुख राणाले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771329290.png)
-1764146706.png)
