काठमाडौं- शनिबार बिदाको दिन। भेटघाट गर्ने भन्दै चन्द्रप्रसाद आचार्य श्रीमतीसँगै ससुराली गए। ससुराली पुगेका चन्द्रप्रसादलाई सन्चो भएन। उनी श्रीमती हरिकला आचार्यसहित घर फर्किए।
सुर्खेतको वीरेन्द्रनगरको जुम्ला रोडमा आफ्नै चियानास्ता पसलमा आइपुगेपछि चन्द्रसादले श्रीमतीलाई घर पठाए। भोलि बिहानलाई तरकारी लिएर आउने बताएपछि चन्द्रप्रसादकी श्रीमती हरिकला एक्लै घरतर्फ लागिन्।
चन्द्रप्रसादले पसल खोले। तरकारी लिएर घर आउने बताएका चन्द्रप्रसाद राति अबेरसम्म पनि घर फर्किएनन्। श्रीमानकै पर्खाइमा बसेकी चन्द्रप्रसादकी श्रीमती त्यतिबेला अर्धचेत अवस्थामा पुगिसकेकी थिइन्, जतिबेला चन्द्रप्रसादको शव घरमै आइपुगेको थियो।
श्रीमानको पखाइमा बसेकी हरिकलाले २४ घन्टापछि अर्थात् भोलिपल्ट फागुन १९ गते साँझ ५ बजे श्रीमानको शव आफ्नै घरको आँगनमै देखिन्। त्यसबेला केही प्रहरी र आफन्तले चन्द्रप्रसादको शव उनको घर पुर्याएका थिए।
चन्द्रप्रसाद आचार्य अर्थात् चियानास्ता पसले। सुर्खेतको वीरेन्द्रनगर-१ का ४५ वर्षीय व्यापारी चन्द्रप्रसाद अर्यालको हत्या भएको आज (मंगलबार) ६६ दिन पुगेको छ। उनको गत फागुन १८ गते हत्या भएको थियो।
वीरेन्द्रनगर-६ जुम्ला रोडमा चन्द्रप्रसादले चियानास्ता पसल सञ्चालन गर्दै आएका थिए। उनका एक छोरी र छोरा काठमाडौं बसेर पढ्छन्। चन्द्रप्रसाद र उनकी श्रीमती भने सुर्खेतमै चियानास्ता पसल सञ्चालन गर्दै आएका थिए।
सरकारी कार्यालय नजिक उनको पसल थियो। हत्या भएको दिन उनलाई ८ बजे पसल वरपर देख्नेमान्छे पनि छन्। उनको हत्या भएको ठाउँ नजिकै रहेको एउटा डेरी पसल र अस्पतालको सीसी टीभी फुटेजमा राति ८ बजेर ४६ मिनेट जाँदा चन्द्रप्रसाद कैद भएका छन्। त्यसपछिको १ घन्टा १४ मिनेटभित्र अर्थात् १० बजेर ३ मिनेटमा उनको हत्या भएको थियो। अहिले त्यही १ घन्टा १४ मिनेट अवधिको अनुसन्धान गर्न प्रहरीलाई निकै कठिन भएको छ।
त्यो बीचमा उनी कहाँ गए? को-को आए? कसले हत्या गर्यो? किन गर्यो? जस्ता अनेकौं प्रश्नको उत्तर त्यही १ घन्टा १४ मिनेटभित्र मात्र फेला पर्न सक्छ। तर प्रहरीलाई यति छोटो समयको अनुसन्धान गर्न समेत निकै गाह्रो परेको अवस्था छ।
फागुन १८ गते राति १० बजेर ३ मिनेटमा चन्द्रप्रसादको शव प्रहरीले अथिति होटल नजिकै बीच बाटोमा फेला पारेको थियो। उक्त सडक बजारको शाखा रोड हो। जहाँ दिउँसो मान्छे र गाडीको राम्रै ओहोरदोहोर हुन्छ। त्यहाँको भित्ता र कपडामा समेत रगतको टाटा लागेको थियो।
चन्द्रप्रसादको शव भेटिएपछि प्रहरीले तत्कालै उनको शव पोष्टमार्टमको लागि सुर्खेतकै प्रदेश अस्पताल कालागाउँ पठाएको थियो। पोस्टमार्टम रिपोर्टअनुसार उनको छातिको एक भागको तीन वटा र अर्को भागको चार वटा गरी ७ वटा करङ भाँचिएको थियो।
मुटु फुटेर इन्टर्नल ब्लडिङ भएकाले मृत्यु भएको जनाइएको छ। त्यस्तै गर्धनको हड्डी र एक वटा हात भाँचिएको थियो। बाहिर शरीरभर नीलडाम, टाउकाको पछाडि पट्टी दुई वटा गहिरो चोट छ। निकै दर्दनाक देखिन्थ्यो चन्द्रप्रसादको शव।
पोस्टमार्टमा चन्द्रप्रसादका आफन्तको उपस्थिति थियो। पोस्टमार्टम सकिएपछि फागुन १९ गते दिउँसो ५ बजे शव घर लगिएको चन्द्रप्रसादकी छोरी संगिताले बताइन्।
अनुसन्धान चित्त बुझ्दो भएन : परिवार
व्यापारी चन्द्रप्रसाद अर्यालको हत्या भएको २ महिना बितिसक्दा समेत हत्यारा पत्ता लाग्न नसकेको भन्दै परिवारले गुनासो गरेका छन्। हत्या भएको आज (मंगलबार) ६६ दिन पूरा भएको छ। तर अहिलेसम्म पनि हत्याराको नजिक पुग्न प्रहरीलाई धौधौ परेको छ। प्रहरीले हत्याको प्रभावकारी अनुसन्धान गर्न नसकेको गुनासो चन्द्रप्रसादकी छोरी संगिताले गरेकी छन्।
‘यति लामो समय बितिसक्दा समेत प्रहरीले हत्यारा पत्ता लगाउन सकेको छैन,’ छोरी संगिताले भनिन्, ‘हत्यारा पत्ता लाग्नुको कुरा त परै जावस् प्रहरीबाट चित्त बुझ्दो जवाफ समेत हामीले पाउन सकेका छैनौं।’
उनले प्रहरी प्रतिको विश्वास पनि कमी हुँदै गएको गुनासो गरिन्। घटनाको सत्यतथ्य यथाशीघ्र बाहिर ल्याई दोषीलाई कारबाही गर्नुपर्ने पीडित संगिताले माग गरिन्।
शव भेटिने बित्तिकै परिवारलाई जानकारी नदिइएको, पोस्टमार्टम गर्दा समेत परिवारका कुनै सदस्य नभएको र बल प्रयोग गरेर गरेजस्तो देखिएको उनको आरोप छ।
कसैसँग रिसिइबी नभएकाले किन हत्या भयो भन्नेसमेत आफूहरुले केही भन्न सक्ने अवस्था नरहेको परिवारको भनाइ छ।
‘कसले हत्या गर्यो भन्ने अहिलेसम्म हामी आफैं आश्चर्यमा परेका छौं,’ छोरी संगिताले भनिन् ‘कसैप्रति पनि त्यस्तो सोच्न सकेका छैनौं।’
‘आधा निद्रा अनुसन्धानमै सकियो, केही दिनमै नतिजा आउँछ’
चन्द्रप्रसादको दर्दनाक हत्या भएपछि उक्त घटनाको अनुसन्धानमा तीन वटा प्रहरी टोली खटिएका छन्। देशभरका जघन्य अपराधको अनुसन्धान गर्ने जिम्मा पाएको केन्द्रीय अनुसन्धान ब्युरो (सिआइबी), कर्णाली प्रदेश प्रहरी र जिल्ला प्रहरी कार्यालय सुर्खेतले घटनाको अनुसन्धान गरिरहेको छ।
अनुसन्धान भएको छैन भन्ने पीडितको गुनासाको उत्तर दिँदै सुर्खेतका डिएसपी प्रदीप क्षेत्रीले भने, ‘आधा निद्रा अनुसन्धानमै सकियो, केही दिनमै नतिजा आउँछ।’
अनुसन्धान प्रगति उन्मुख रहेको र न्याय पाउनेमा ढुक्क हुन पीडितलाई डिएसपी क्षेत्रीले आग्रह गरे। अहिलेसम्म २ सय जनाभन्दा बढीसँग सोधपुछ भइसकेको डिएसपी क्षेत्रीले बताए।
त्यसैगरी, १० जानको पोलिग्राफ परीक्षण भइसकेको छ भने अझै केही व्यक्तिको पोलिग्राफ गर्न बाँकी रहेको अनुसन्धानमा संलग्न प्रहरीले अधिकारीले जनाए। त्यस्तै बिटिएस लोकेशन हेरेर पनि अनुसन्धान गरिएको प्रहरीले जनाएको छ।
चन्द्रप्रसादले फोन समेत नबोक्ने भएकाले अनुसन्धानमा गाह्रो भएको प्रहरीले जनाएको छ। कसैसँग रिसइबी पनि नभएको, फोन पनि नबोक्ने परिवारका सदस्यले समेत कसैलाई शंका गर्न नसकेकाले जिरोबाट अनुसन्धान गर्नु परेकाले समय लागेको डिएसपी क्षेत्रीले बताए।
उक्त घटनाका लागि सिआइबीबाट सईको नेतृत्वमा दुई जनाको टोली खटिएको छ भने प्रदेश प्रहरी कार्यालयको टोलीले पनि अनुसन्धान गरिरहेको छ। कर्णाली प्रदेशका प्रहरी प्रमुख डिआइजी महेश विक्रम शाहले पनि अनुसन्धान प्रगति उन्मुख भएको र पीडितले न्याय पाउनेमा ढुक्क हुन आग्रह गरे।
प्रहरीले उनको रगतसमेत जाँचका लागि प्रहरीको सामाखुशीस्थित केन्द्रीय विधि विज्ञान प्रयोगशाला पठाएको थियो। त्यसको रिपोर्टबाट पनि अनुसन्धानमा केही कुराहरु खुल्दै गएको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788878240.jpeg)
-1786602170.png)
