काठमाडौं– प्रधानमन्त्री केपी शर्मा ओलीले नेपालको राष्ट्रपतिसँग पनि कार्यकारी अधिकार भएको प्रस्ट पारेका छन्।
मंगलबार प्रतिनिधिसभा प्रधानमन्त्री ओलीले नीति तथा कार्यक्रममाथि उठेका प्रश्नको जवाफ दिने क्रममा भने, 'नीति तथा कार्यक्रममा 'मेरो सरकार' भन्ने शब्द भुलचुकले नभई जानीबुझी राखिएको हो।' त्यो आवश्यक शब्द भएको उनको तर्क थियो।
'साथीहरुले संविधानको धाराधारा प्रस्तुत गर्नुभयो। त्यो राम्रो हो। हामीले संविधान पढ्ने र त्यसको आड लिने गर्नुपर्छ। संविधान अनुसार चल्नुछ, त्यसलाई उद्धरण गर्ने बानी गर्नुपर्छ। एकदम ठिक छ', व्यंग्यमिश्रित भावमा उनले भने, 'तर, अर्कै अर्थ लाग्नेगरी व्याख्या गर्नु हुँदैन।'
'मेरो सरकार' भन्ने विषयलाई अन्तर्राष्ट्रिय चलन भन्दै उनले भारतीय अभ्यासको उदाहरण दिए। बेलायती महारानीको जस्तो भयो भन्ने टिप्पणीलाई भने उनले गैरकूटनीतिक अभिव्यक्तिको रुपमा अर्थ्याए।
'भारतको राष्ट्रपतिलाई पनि कार्यकारी अधिकार छैन। नेपालको राष्ट्रपतिमा चाहिँ कार्यकारी अधिकार किञ्चित छैन भन्ने होइन', प्रधानमन्त्रीले अघि भने, 'हाम्रो गरिमामय संसदले पारित गरेका कानुनलाई राष्ट्रपतिले दस्तखत गरेपछि कानुन बन्छ। राष्ट्रपति शासन, इमर्जेन्सी, सेना परिचालन जस्ता कुराहरु राष्ट्रपतिबाट हुन्छ। मन्त्रिपरिषद्ले सिफारिस गरेका कुराहरु राष्ट्रपतिबाट सदर भएपछि मात्रै अन्तिम हुन्छ।'
प्रधानमन्त्रीले राष्ट्रपति भनेको केही पनि होइन भन्ने नभएको प्रष्ट पारे।
'राज्य व्यवस्थाको सर्वोच्च र सम्मानित संस्था हो। अभिभावकीय भूमिका भएको संस्था हो। त्यो संस्था साझा हुन्छ। कुन पार्टीको सरकार बन्यो भनेर मेरो भन्ने कि नभन्ने भन्ने हुँदैन। जसको भए पनि राष्ट्रपतिको मेरो सरकार हुन्छ। कम से कम अन्तराष्ट्रिय अभ्यास बुझौं न', उनले आग्रह गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
