विराटनगर- प्रदेश १ को स्थायी राजधानी विराटनगर घोषणा भएको छ। सोमबार बसेको प्रदेशसभा बैठकले प्रदेशको स्थायी राजधानीको टुंगो लगाएको हो।
स्थायी राजधानीका लागि प्रदेशसभामा मतदान हुने चर्चा चले पनि विपक्षी नेपाली कांग्रेसले समेत आफ्नो प्रस्ताव फिर्ता लिएर नेकपाको प्रस्तावलाई समर्थन जनाएपछि सर्वसम्मतिमै राजधानी तोक्न सम्भव भएको हो।
प्रदेशसभाको सोमबारको बैठकमा ६ जना सांसदहरु भने अनुपस्थित थिए।
प्रदेश १ मा कुल ९२ जना प्रदेशसभा सदस्यहरु छन्। तीमध्ये ८६ जनाको उपस्थितिमा स्थायी राजधानी विराटनगरलाई राख्ने प्रस्ताव पारित भएको प्रदेशसभा सचिवालयले जानकारी दिएको छ।
विराटनगरलाई स्थायी राजधानी तोकिए पनि विराट क्षेत्रको अवधारणाअनुसार संसद र कार्यपालिकाका कतिपय संरचना इटहरी र गोठगाउँसमेतलाई समेटेर बनाइने प्रस्ताव नेकपाले संसदमा लगेको थियो।
नाम र राजधानीलाई एकैपटक टुंगो लगाउँदा आन्दोलन तीव्र बन्न सक्ने भन्दै अर्को अधिवेशनमा नाम टुंगो लगाउने गरि मिलाएको आन्तरिक मामिला तथा कानुन मन्त्री हिक्मत कार्कीले जानकारी दिए।
उनका अनुसार प्रदेशको कार्यपालिका, व्यवस्थापिका लगायतका संरचनाहरु भने बृहत विराट क्षेत्र अन्तर्गतका विराटनगर, इटहरी र सुन्दरहरैचा क्षेत्र आसपासका क्षेत्रमा रहनेछ।
आइतबार संसदमा दर्ता भएको प्रस्ताव सोमबारको संसद बैठकले सर्वसम्मत अनुमोदन गरेको हो।
अघिल्लो अधिवेशनमै टुंगो लाग्ने बताइएको नाम र राजधानीको विषयले भर्खरै प्रवेश पाएको हो।
मन्त्री कार्कीका अनुसार केही नियमावली र कार्यविधि नमिलेका कारण राजधानी तोक्न ढिला भएको हो।
ठुला दलको चासोको विषय रहेको राजधानीको टुंगो लागेपनी पहिचानवादी साना दलको चासोको नामांकनको विषय भने अझै अन्योलमै छ।
प्रदेशको नाम तय नगरी सोमबारदेखि प्रदेश अधिवेशन अन्त्य भएको छ।
प्रदेशको राजधानी धनकुटा वा धरान हुनुपर्ने भन्दै नेकपा र कांग्रेसका केही सांसदहरुले माग गर्दै आएका थिए।
यता विराटगरबासीहरुले विराटनगरमै सबै प्रशासनिक संरचनाहरु राख्नुपर्ने माग गर्दै सोमबार विराटनगर बन्दको समेत घोषणा गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
