काठमाडाैं- भूमि व्यवस्था, सहकारी तथा गरिबी निवारण मन्त्रालयले चाबहिलस्थित मालपोत कार्यालयलाई स्थानान्तरण गर्ने प्रयास विचौलियाका कारण असफल भएको छ।
जनतासँग प्रत्यक्ष सरोकार राख्ने मालपोत र नापी कार्यालयलाई डिजिटल प्रविधिमा स्तरोन्नति गर्न कार्यालयलाई स्थानान्तरण गर्न मन्त्री पद्मा अर्यालले २१ माघमा निर्देशन दिएकी थिइन्।
चाबहिलस्थित गोपिकृष्ण हलसँगै रहेको मालपोत कार्यालयलाई डिजिटल प्रविधिमा स्तरोन्नति गर्न स्थान अभाव भएकाले तत्काल कार्यालय सार्न मन्त्रीको निर्देशन थियो। मन्त्रीले निर्देशन दिएको ३ महिना पुग्न लागिसक्दा पनि कार्यालय सारिएको छैन। सेवाग्राहीलाई काममा प्रभावकारिता ल्याउनका लागि उक्त मालपोत कार्यालय साँघुरो रहेको बताइएको छ।
कार्यालय सार्न नसक्नुको प्रमुख कारण विचौलियाहरुको हस्तक्षेप भएको बुझिएकाे छ। मालपोत कार्यालय सरेसँगै विचौलियाको कमाई घट्ने भएकाले उनीहरुले अवरोध सिर्जना गरिरहेका बताइएकाे छ। कार्यालयसँगै जोडिएर लेखापढी गर्ने व्यवसायीका दर्जनौं कार्यालयहरु छन्। साथै, सेवाग्राहीलाई सहयोग गर्ने नाममा ‘ठगी’धन्दा गर्नेहरु पनि कार्यालय वरपर सक्रिय छन्।
सर्वसाधारणसँग प्रत्यक्ष जोडिएको कार्यालयबाट ‘कमाउ धन्दा’ गरिरहेका विचौलियाका कारणले कार्यालय सार्न नयाँ भवन समेत नपाएको मन्त्री अर्यालले गुनासो गरिन्। कार्यालय सारेसँगै विचौलियाहरुले पनि कार्यालय सार्नुपर्ने, डिजिटल प्रविधिले उनीहरुको कमाइमा धक्का लाग्ने भएकाले सार्न नदिइएको बताइएको छ।
विचौलियाहरुले मालपोत कार्यालय सार्न नयाँ स्थानमा तय भएकाे भवनका घरधनीलाई भड्काएर स्थानान्तरण गर्न दिएका छैनन्। मन्त्री अर्यालले भनिन्, ‘समयमा ठेकेदारले भवन बनाइदिएनन्। निजी भवनमा सार्न विचौलियाले दिदैनन्।’
मालपोत कार्यालय रहेको क्षेत्र अर्थात् काठमाडौं-४ बाट प्रतिनिधिसभा निर्वाचनमा तत्कालीन नेकपा (एमाले)बाट उम्मेदवार बनेका डा राजन भट्टराईलाई घर खोजी दिन मन्त्रीले आग्रह गरेकी थिइन्। प्रधानमन्त्रीका परराष्ट्र सल्लाहकार रहेका भट्टराईले निजी घर पाउनै नसकेको जवाफ दिएको उनले बताइन्।
माघमा अनुुगमनको क्रममा कामको प्रकृतिअनुसार कार्यालय उपयुुक्त नभएकाले स्थानान्तरण गर्न निर्देशन दिएको मन्त्री अर्यालले स्मरण गरिन्। सरकारी भवनमा मालपोत कार्यालय सार्न तत्काल असम्भव भएकाले निजी भवन खोज्न उनले निर्देशन दिएकी थिइन्।
ठेकेदारले समयमा भवन निर्माण नगरिँदिदा चाबहिलस्थित मालपोत कार्यालय प्रर्याप्त स्थान नभएपनि सञ्चालन गर्नुपर्ने बाध्यता बनेको छ।
मालपोत कार्यालयलाई नमूना बनाउने अभियानअन्तर्गत पहिलो चरणमा काठमाडौं उपत्यकाका मालपोत तथा नापी कार्यालयबाट अभियान सुरू गरिने बताइएको छ। कलंकी मालपोत कार्यालयबाट सुरुवात गरिने डिजिटल कार्यालय क्रमशः डिल्लीबजार र चाबहिल हुँदै देशैभरका २ सय ४४ वटा मालपोत र नापी कार्यालय एकवर्ष भित्र डिजिटल बनाउने मन्त्रालयले स्पष्ट पारेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
