इटहरी- विराटनगरबाट प्रदेश १ को राजधानी नसार्न माग गर्दै हडताल सुरु भएको छ। आइतबार मात्र प्रदेशसभामा 'वृहत विराटनगर'भित्र राजधानी रहने गरी प्रदेश राजधानीसम्बन्धी प्रस्ताव पेस गरिएकाे थियाे। वृहत विराटनगर भित्र इटहरी, सुन्दरहरैचा लगायत ११ वटा स्थानीय तह रहने उल्लेख गरिएको छ।
त्यसमा पनि विराटनगर र इटहरीमा व्यवस्थापिका र कार्यपालिका रहने गरी राजधानी सिफारिस गरिएकाे हो।
विराटनगर बाहिर कुनै पनि कार्यलय जान नहुने माग गर्दै त्यसैको विरोधमा राजमार्ग बन्दको आह्वान गरिएको हाे। स्थायी राजधानी तोक्न माग गर्दै विराटनगर महानगरपालिकामा गएराति रातारात संघर्ष समिति बनेको र त्यसले राजमार्ग बन्द र हडताल आह्वान गरेको हो।
समितिले विराटनगरलाई राजधानी तोकेर सम्पूर्ण संरचना विराटनगरमानै हुनुपर्ने माग राख्दै अनिश्चितकालिन आम हडताल आह्वान गरेको हो।
विराटनगरलाई स्थायी राजधानी बनाउन शान्तिपूर्ण दबाब समितिको पहिलो आन्दोलन नै विराटनगर बन्दको पक्षमा देखिएको छ। प्राध्यापक डाक्टर भेषप्रसाद धमला संयोजक रहेको समितिमा महेश रेग्मी, नागेश कोइराला, मोदराज घिमिरे, राजकुमार यादव र मोहम्मद कादिर सह-संयोजक रहेका छन्।
समितिले एक विज्ञप्ति जारी गरी विराटनगरलाई स्थायी राजधानी बनाई सबै संरचना विराटनगरमा नै हुनुपर्ने माग गरेको छ।
संयोजक धमलाले विराटनगरको महत्वलाई नबुझी राजधानी तोकेर संरचना अन्यत्र लैजान खोजिएपछि आन्दोलन गरेको बताए।
अनिश्चिनकालिन आम हडतालको घोषणासँगै विराटनगरको जनजीवन प्रभावित बनेको छ। सार्वजनिक यातायातका साधनहरु चल्न सकेका छैनन् भने, टंकीसिनवारीदेखि विराटनगरको रानीसम्मको कोशी राजमार्गमा मोटरसाइकल बाहेकका सबै सार्वजनिक तथा निजी दुबै सवारी साधनलाई चल्न दिइएको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
