काठमाडौं- उद्योग, वाणिज्य तथा आपूर्तिमन्त्रीले मातृकाप्रसाद यादवले ‘ओद्योगिक व्यवसायसम्बन्धी प्रचलित कानुनलाई संशोधन र एकीकरण गर्न बनेको विधेयक- २०७५' संसदमा विचाराधीन छ।
सो विधेयक संसद्बाट जस्ताको त्यसै पारित भए २ अर्बभन्दा बढी पूँजी लगानीमा सञ्चालित पर्यटन उद्योगहरुले ५ वर्षसम्म आयकरमा शतप्रतिशत छुट पाउने भएका छन्।
विधेयकमा उद्योगलाई प्रदान गरिने प्रोत्साहन, छुट, सुविधा वा सहुलियतको व्यवस्था गरिएको छ। ‘२ अर्ब भन्दा बढीको पूँजीमा स्थापना हुने पर्यटन क्षेत्रसँग सम्बन्धित उद्योगलाई कारोबार शुरु गरेको मितिले ५ वर्षसम्म पूर्ण रुपमा आयकरमा छुट हुनेछ,' विधेयकको मस्यौदामा उल्लेख छ।
पहिलो ५ वर्षसम्ममा आयकरमा छुट पाएका त्यस्ता उद्योगहरुले त्यसपछिको थप ३ वर्षसम्म आयकरको दरमा ५० प्रतिशत कर छुट पाउने व्यवस्थालाई विधेयकले समेटेको छ।
त्यसैगरी, १ अर्ब रुपैयाँभन्दा माथिको पुँजी लगानीमा स्थापना हुने र ५ सय जनाभन्दा बढीलाई वर्षभर नै प्रत्यक्ष रोजगारी प्रदान गर्ने उत्पादनमूलक र सेवामूलक उद्योगलाई पनि कारोबार शुरु गरेको मितिले पहिलो ५ वर्षसम्म आयकरमा पूर्ण छुट दिने व्यवस्था विधेयकमा छ।
आयकर छुट पछिको ३ वर्षसम्म यस्ता उद्योगहरुले पनि ५० प्रतिशत कर छुट पाउँछन्।
तर हाल सञ्चालमा रहेका त्यस्ता उद्योगहरुले कम्तीमा २५ प्रतिशत पूँजी वृद्धि गरी दुई अर्ब पूँजी पुर्याई ३ सयभन्दा बढीलाई वर्षभर नै रोजगारी दिनुपर्नेछ। त्यस्ता उद्योगले पनि पहिलो ५ वर्ष शतप्रतिशत र त्यसपछिको तीन वर्ष ५० प्रतिशत छुट पाउनेछन्।
उद्योगहरुले आफ्नो नाफाबाट क्षमता विस्तारमा लगानी गर्न चाहान्छ भन्ने त्यस्तो अवस्थामा पनि सरकारले शतप्रतिशत छुट दिनेगरी विधेयक तयार पारेको छ।
सूर्तीजन्य, मदिराजन्य र क्यासिनोबाहेक अन्य उद्योगले आफ्नो सञ्चित मुनाफालाई सोही उद्योगको क्षमता विस्तारमा खर्च गर्दा त्यस्तो रकममा आयकर लाग्नेछैन।
‘उत्पादनमूलक, उर्जामूलक, वा कृषि तथा वन पैदावारमा आधारित उद्योगको लागि शेयरमा पूँजीकरण गरेको अवस्थामा त्यस्तो पूँजीकरणमा लाभांश वितरण स्वरुप लाग्ने लाभांश करमा शतप्रतिशत छुट हुनेछ,’विधेयकमा भनिएको छ।
मुलुकभित्रकै अविकसित, अविकसित र कम विकसित क्षेत्रमा सञ्चालमा आउने उत्पादन मुलक उद्योगहरुका लागि भने क्रमशः ९०, ८० र ७० प्रतिशत आयकरको छुट विधेयकमा छ।
यसरी छुट पाउने उत्पादनमूलक उद्योगभित्र फलफूलमा आधारित ब्राण्डी, साईडर एवं बाईन उत्पादन गर्ने उद्योगहरु भने पर्दैनन्।
आयकरमा बढी छुट पाउने अन्य उद्योग तथा क्षेत्रहरुमा स्वदेशी चिया उत्पादन र दुग्ध क्षेत्र देखिन्छ। ‘स्वदेशी चिया उत्पादन र प्रशोधन गर्ने उद्योग, दुग्ध पदार्थको कारोबार गर्ने डेरी उद्योग र कपडा उत्पादन गर्ने उद्योगले आफ्नो उत्पादन बिक्री गरी प्राप्त गरेको आयमा लाग्ने आयकरको दरमा ५० प्रतिशत छुट पाईनेछ,’ भनी विधेयकमा खुलाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
