काठमाडौं- लिच्छविकालमा निर्माण भएको ऐतिहासिक, धार्मिक, सांस्कृतिक र पुरातात्विक दृष्टिले महत्वपूर्ण गोकर्णेश्वर महादेव मन्दिरकाे जीर्णोद्धार एवं छाना फेर्ने काम सुरु भएको छ।
तीनतले प्यागोडा शैलीको मन्दिरमा दुई तला झिँगटीले छाइएको छ। तलका ठूला दुई तला झिँगटीले छाएको मन्दिर जीर्ण बनेको थियो। मन्दिरमा रहेका पुरातात्विक महत्वका काठ बिग्रन थालेको थियो। टुँडाल झर्न थालेका थिए। मन्दिर संरक्षणका लागि पुरातत्व विभागले १ करोड रुपैयाँको लागतमा जीर्णोद्धार गर्न लागेको गोकर्णेश्वर नगरपालिका-४ का अध्यक्ष श्रीकुमार श्रेष्ठले जानकारी दिए।
नगरपालिका र स्थानीयवासीको सक्रियतामा मन्दिरमा तामामा सुनको लेप लगाई छाना फेर्ने काम पनि सुरु भएको छ। यसका लागि गत वर्ष श्रीमद्भागवत महायज्ञ आयोजना गरिएको थियो। महायज्ञबाट ३ करोड रुपैयाँ संकलन भएकाे थियो। जीर्णाेद्वारका लागि नगरपालिकाले १ करोड रुपैयाँ बजेट विनियोजन गरेको छ। छाना फेर्न १७ करोड रुपैयाँ बजेट लाग्ने प्रारम्भिक अनुमान गरिएको छाना पुनर्निर्माण समितिका संयोजक कोमलबहादुर विष्टले बताए।
मन्दिरको छाना फेर्न २४ लाख ५१ हजार १ सय ११ सहयोग गर्ने गोकर्णेश्वर नगरपालिका-४, तालिञ्चोकका उत्तमकुमार थापालाई शनिबार मन्दिर आयोजित विशेष कार्यक्रममा नगर प्रमुख सन्तोष चालिसेले सम्मान गरे। हालसम्म बीचको तलाको छाना फेर्ने बजेट प्राप्त भएको जनाइएको छ।
कार्यक्रमलाई सम्बोधन गर्दै उनले नगरपालिकाको नाम समेत मन्दिरकै नामबाट राखिएकाले जीर्णोद्धार एवं छाना फेर्ने कामलाई प्राथमिकतामा राखिएको जनाए। काम सम्पन्न गर्न अझै स्रोत अपुग हुने भएकाले फेरि महायज्ञ आयोजना गर्ने विषयमा छलफल भइरहेको नगर प्रमुख चालिसेले बताए।
मन्दिरमा भाद्र कृष्ण औँसी अर्थात् बाबुको मुख हेर्ने दिन दिवङ्गत पिताको सम्झनामा श्राद्ध गर्न भक्तजनको भीड लाग्छ। भाद्रकृष्ण औँसीका दिन गोकर्णेश्वरमा पुगी जल, पिण्ड र सिदादान गरेमा घर, मामाघर र ससु्रालीतर्फका २१ पुस्ता तर्छन् भन्ने पौराणिक मान्यता छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
