जनकपुर- बजेट सम्बन्धी विवादमा धनुषाको वटेश्वर गाउँपालिकामा निर्वाचित वडाध्यक्ष र फोरमका नेता बीच कुटाकुट भएको छ।
बजेट सम्बन्धी विवादमा संघीय समाजवादी फोरम नेपालका नेता राजकिशोर महतो र वडा ३ का वडाध्यक्ष हिरालाल महतो बीच कुटाकुट भएको हो।
धनुषा ४ (ख) बाट प्रदेश सांसदको उम्मेदवार बनेका राजकिशोर महतो र वटेश्वर गाउँपालिका-३ का वडाध्यक्ष हिरालाल महतोबीच कुटाकुट भएको गाउँपालिका अध्यक्ष डम्बरबहादुर राउतले बताए।
अध्यक्ष राउतले प्रदेश सरकारले गाउँपालिकामा पठाएको ५० लाख सशर्त अनुदान तर्फको बजेटका विषयमा विवाद उत्पन्न हुँदा कुटाकुट भएको बताए।
प्रदेश सरकारले पठाएको बजेटबाट फोरमका नेता महतो कवीर मन्दिर निर्माण गराउने बताउँदै आएका थिए। उनले प्रदेश सरकारको योजनामा भनसुन गरेर कवीर मन्दिर निर्माण शीर्षकमा बजेट खर्चिने उल्लेख गराएको गाउँपालिका अध्यक्ष राउतले बताए।
अध्यक्ष राउतले भने, ‘स्थानीय सरकारले प्रथामिकीकरण गरेको शीर्षकमा प्रदेश सरकारले बजेट कार्यान्वय गराउनु पर्छ।’
वडा अध्यक्ष, गाउँपालिका अध्यक्ष र स्थानीयबीच वडा कार्यालयमा छलफल चलिरहेको बेला फोरमका नेता महतोले प्रदेश सरकारको बजेटबारे कुरा निकाले। त्यसपछि फोरमका नेता र वडा अध्यक्षबीच ठूलो वादविवाद भएको थियो।
विवाद दुबैबीच कुटाकुटको अवस्थामा परिणत भयो। वडाअध्यक्षको हातमा चोट लागेको छ भने फोरम नेताको पनि खुट्टामा चोट लागेको छ। वडा अध्यक्ष र फोरम नेता दुबै एकअर्काका छिमेकीसमेत हुन्।
प्रदेश सरकारको बजेटमा सत्य श्री कवीर आश्रम तथा धर्मशाला र वडा नम्बर २ स्थित मावि वटेश्वरमा चारकोठे भवन निर्माणको लागि २५/२५ लाखको योजना परेको छ। ‘ प्रदेश सरकारले मलाई सोंधेपछि दुई वटा योजनाको नाममा बजेट छुट्याइयो,’ कुटाकुट गरेका फोरमका नेता भन्छन्, ‘बजेट फ्रिज गराइदिने भनेपछि विवाद भएको हो।’
बजेट कार्यान्यवनमा आफ्नो कुनै स्वार्थ नरहेको उनले बताए। ‘वडा अध्यक्ष र गाउँपालिका अध्यक्षविरुद्ध प्रहरीमा उजुरी हाल्छु,' उनले भने , 'दुबैजना मिलेर मलाई कुटपिट गरेका छन्।’
यता गाउँपालिका अध्यक्ष डम्बबहादुर राउतले आफूले झगडा छुट्याएको बताए। ‘हामी यहीँ बसेर छलफल गरी दोषीलाई जरिवाना गरौँ,' उनले भने, 'यदि हामीबाट विवाद समाधान नभए अर्को बाटोबाट अघि बढ्नुपर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
