भैरहवा- देशभर भू-माफियाको जगजगीका समाचार बाहिर आइरहेका बेला रुपन्देहीमा स्थानीय जनप्रतिनिधि (वडाध्यक्षसहित) र मालपोत कार्यालयका कर्मचारीको मिलोमतोमा अशक्त एकल महिलाको जग्गा हडपेको खुलासा भएको छ।
रुपन्देहीको कोटहीमाई गाउँपालिका-४ की कमलावती पालको नाममा सोही गाउँपालिकाको सोही स्थानमा रहेको जग्गा वडाध्यक्ष, वडा कार्यालयका कर्मचारी र मालपोत कर्मचारीको मिलोमतोमा हडपेको खुलेको हो। शारीरिक रुपमा अशक्त समेत रहेकी कमलावती एकल महिला हुन्।
उनको नाममा रहेको एक बिघाहा, १२ कठ्ठा साढे ७ धुर जग्गा झुक्याएर नामसारी गरिएको भन्दै जिल्ला प्रशासन कार्यालयमा उजुरी परेपछि जग्गा हडपेको घटना बाहिर आएको हो।
कोटहीमाइ-४ का वडाध्यक्ष ओमप्रकाश पाण्डेकै मिलेमतोमा जग्गा हडपिएको हो। प्यारालाइसिस कारण हिँडडुल गर्न नसक्ने ४९ वर्षीया कलावतीको सो जग्गा वडाध्यक्ष पाण्डेले छोरासहित ७ जना भूमाफियाको नाममा नामसारी गराई हडपेको खुलेको हो।
.JPG)
कमलावतीको घर
वडाध्यक्ष पाण्डेसहित भू-माफियाको समूहले प्यारालाइसिसका रोगको उपचारका लागि सरकारले पैसा दिएको र सो पैसा पाउन सहीछाप गर्नुपर्ने भन्दै झुक्याएर जग्गा हडप्ने प्रपञ्च रचेका थिए।
त्यही प्रपञ्च लगाएर उनीहरुले जग्गाको कागजमा राजीनामा पास गराएका पीडित पक्षले आरोप लगाएको छ। उनीहरुले कमलावतीलाई औंठाछाप गर्न समेत लगाई सोहीअनुसार मालपोतमा रेकर्ड बनाएका थिए।
सो जग्गाको प्रचलित मूल्य ५० लाखभन्दा बढी रहेको उक्त जग्गा चैत १४, १५ र १७ गते ७ जनाले राजीनामा गराएका र त्यसको केही दिनपछि मालपोतबाट नामसारी गराएको भेटिएको छ।
क-कसले हडपे जग्गा?
वडाध्यक्ष पाण्डेका छोरा राजेशको नाममा ५ कठ्ठा ११ धुर जग्गा नामसारी भएको रेकर्ड छ। रेकर्डमा उनले ०७५ चैत १४ गते मालपोतबाट पास गरेका हुन्।
यस्तै, चैत १४ गते नै मायादेवी गाउँपालिका, गरकट्टीका प्रेमकुमार यादवले ५ कठ्ठा ११ धुर आफ्नो नाममा गराएका छन्। चैत १५ गते कोटहीमाई–३, पर्सियाका सूर्यनाथ अहिरले ५ कठ्ठा १९ धुर आफ्नो नाममा गरेका छन्। उनी मझगाँवा विद्यालयका कर्मचारीसमेत हुन्।
.JPG)
कमलावतीका आफन्त। कमलावतीको घरमा।
यसैगरी, चैत १५ गते नै कोटहीमाइ गाउँपालिका वडा नम्बर ४ का प्राविधिक (कार्यालयका सहायक सचिव) बरहदवा निवासी रामनाथ यादवले आफ्नी श्रीमती प्रमिला यादवका नाममा १ कठ्ठा २ धुर जमिन कायम गराएका छन्।
०७५ चैत १७ गते लुम्बिनी सांस्कृतिक नगरपालिका धुपहीका जितबहादुर यादवले ३ कठ्ठा १४ धुर जमिन आफ्नो नाममा गराए। सोही दिन साविक कम्हरिया–७ का विश्वनाथ पालले ५ कठ्ठा १२ धुर जमिन आफ्नो नाममा गराएका छन्। यी सबै जग्गा कमलावतीकै हुन्।
छोराको नाममा जग्गा दर्ता गरेका वडाध्यक्ष पाण्डेले १० लाख ५० हजार थैली दिएको दाबी गर्दै आएका छन्। भू-माफियासहित वडाध्यक्षको समूहले कमलादेवीलाई औषधि उपचारका लागि पैसा दिएको दाबी गर्दै आएका छन्। जग्गासमेत पैसा दिएर खरिद गरेको दाबी उनीहरुको छ। तर कमलावतीले भने कसैबाट पैसा नलिएको बताएकी छन्।
.JPG)
वडाध्यक्षलगायतको समूहले हडपेको कमलावतीको जग्गा देखाउँदै उनका आफन्त। उनी उभिएको ठाउँको जग्गा वडाध्यक्ष र भू-माफिया मिलेर हडपेका छन्।
पति हरिप्रसाद पालको मृत्यु भएपछि मात्रै नागरिकता बनाएकी कमलावतीका सन्तान छैनन्। ४९ वर्षीय कमलावतीका श्रीमान् गत वर्ष मृत्यु भएको थियो। सन्तान समेत नभएकी उनको श्रीमानकै नाममा जग्गा थियो।
श्रीमानको नामबाट तपाईँको नाममा जमिन नामसारी गरिदिन्छौं भनेर वडाअध्यक्ष पाण्डेको मिलेमतोमा कमलावतीको घरमै आएर राजीनामामा हस्ताक्षर गराई ढाँटेर ७ जनाले जमिन मालपोतबाट आफ्नो नाममा पास गराएको स्थानीयको दाबी छ।
बिरामी भएर बोल्न र हिँडडुल गर्न समेत नसक्ने एकल महिलाको जमिन अर्कैले झुक्याएर हडपेपछि स्थानीय आक्रोशित बनेका छन्।
.JPG)
कमलावतीको रेखदेख गर्दै आएका सुवास लोनियाले विवाहदर्ताका आधारमा कमलावतीको नागरिकता बनेको बताए। तर सो समयमा जग्गाको नामसारी गर्न नसकिएको भन्दै लेखनदास मनोहर यादवले कमलावतीलाई सहीछाप गराएका थिए।
जग्गा नामसारी भएको पत्तो पाएपछि कमलावतीले तीन दिनअघि जिल्ला प्रशासन कार्यालय रुपन्देहीमा उजुरी दिएकी छन्।
जग्गा नामसारीबारे वडाध्यक्षले प्रतिक्रिया दिन मानेनन्।
.JPG)
झुक्याएर अरुको नाममा जग्गा दर्ता गराएको कुरा थाहा पाएपछि स्थानीयको सहयोगमा कमलावतीले जिल्ला प्रशासनका ठगी मुद्दा दर्ता गरेकी हुन्। प्रशासनले यसबारे आवश्यक प्रक्रियाअघि बढाएको रुपन्देहीका सहायक प्रमुख जिल्ला अधिकारी कल्पना घिमिरे (नेपाल)ले जानकारी दिइन्।
एकल महिलाको जमिन भू-माफियासँग मिलेर आफैंले निर्वाचित गरेको जनप्रतिनिधिले नै हडपेपछि स्थानीय आक्रोशित छन्। २ सय बढी स्थानीयले जिल्ला प्रशासनमा आएर ठगी गर्नेलाई कडा कारबाहीको माग गरेका छन्।
सबै तस्बिर : दीपक घिमिरे
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
