जनकपुर- शिक्षामा छोरीको पहुँच वृद्धि गर्न प्रदेश २ सरकारले ल्याएको छोरी शिक्षा बिमा कार्यक्रम प्रभावकारी भएको प्रदेश सरकारले दाबी गरेको छ।
‘मुख्यमन्त्री बेटी पढाउ, बेटी बचाउ’ कार्यक्रम बनाएर शिक्षामा छात्राको पहुँच वृद्धि गर्ने योजना अन्तर्गत यो कार्यक्रम अघि सारिएको हो।
योजना अन्तर्गत प्रदेशका ८ वटा नगरपालिकाबाट सुरु भएको छोरी शिक्षा बीमा कार्यक्रम प्रदेश भरी लागू भएपछि अहिलेसम्म ४६ जना छोरीहरुको बिमा भइसकेको बताइएको छ।
प्रदेशले यसका लागि ५ करोड ६० लाख बजेट छुट्ट्याएको थियो। विशेष अनुदानपछि यसको बजेट ५५ करोड ६० लाख पुगेको छ। ‘प्रदेश २ का सबै छोरी अब बिमा कार्यक्रममा समावेश हुने प्रदेशका प्रमुख सचिव दिपक सुवेदीले बताए। ‘बेटी पढाउ, बेटी बचाउ’बिमाअन्तर्गत प्रदेश सरकारले १३ हजार ६ सय ४६ रुपैयाँ छोरीका नाममा जम्मा गर्छ। उक्त रकममा प्रभु बैंकले १ हजार थप गरिदिने सम्झौता गरेको छ।
२०७५ साल माघ १ गतेपछि जन्मिएका छोरीले शिक्षा बिमा तथा मुद्दती बचतस्वरूप बिमा गरिएको २० वर्षमा १ लाख २५ हजार रुपैयाँ प्राप्त गर्नेछन्। तर शिक्षाको लागि रकमको आवश्यकता परे प्रदेश सरकारको सिफारिसमा बीचमा समेत केही रकम झिक्न पाउने व्यवस्था गरिएको छ।
बीमाको लागि नवजात छोरीको फोटो, आमा वा बुबाको नागरिकता, जन्मदर्ताको प्रमाणपत्र र वडा सिफारिस आवश्यक रहेको छ। छोरी बीमा कार्यक्रमलाई सफल बनाउन प्रदेश सरकारले स्वयंसेवकसमेत परिचालन गरेको छ। यस कार्यक्रमका लागि संघीय सरकारले ५० करोड विशेष अनुदान उपलब्ध गराएको छ।
छोरी बीमा कार्यक्रम प्रभावकारी बन्दै गएपछि प्रदेशभरि नै लागू गरिएको हो। प्रदेश २ को महत्वकांक्षी योजना छोरी शिक्षा बिमा कार्यक्रम फागुन १० गते औपचारिक रूपमा शुरुवात गरिएको थियो।
मुख्यमन्त्री तथा मन्त्रिपरिषद् कार्यालयले आयोजना गरेको एक कार्यक्रममा राष्टूपति विद्यादेवी भण्डारीले छोरी शिक्षा बिमा र मुद्दती खाताको शुरुवात गरेकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
