काठमाडौं- बारा र पर्सा जिल्लाको हावाहुरी पीडितका लागि आवास पुनर्निर्माण कार्यक्रम सुरु भएको छ। नेपाली सेनाको व्यवस्थापनमा आवास निर्माण शुभारम्भ गरिएको हो।
उपप्रधान एवं रक्षामन्त्री श्री ईश्वर पोखरेललगायतले एकसाथ १२ स्थानमा आवास निर्माणको शिलान्यास गरेका छन्।
आवास पुनर्निर्माण छिटो सक्न एकसाथ १२ ठाउँमा १२ समूह बनाएर एकैपटक घर निर्माण गर्ने नेपाली सेना जानकारी दिएको छ।
फेटा गाउँपालिका-६ पुरैनियामा उपप्रधान एवं रक्षामन्त्री पोखरेल, परवानीपुर-४ चैनपुरमा उपप्रधान एवं स्वास्थ्य तथा जनसंख्यामन्त्री उपेन्द्र यादव, प्रसौनी गाउँपालिका- ४ खटुवाजग्दीमा गृहमन्त्री रामबहादुर थापाले, वीरगञ्ज महानगरपालिका-२२ जगरनाथपुरमा उर्जा, जलस्रोत तथा सिँचाईमन्त्री वर्षमान पुन र सुवर्ण गाउँपालिका-४ हर्दियामा भौतिक पूर्वाधार तथा यातायातमन्त्री रघुवीर महासेठले शिलान्यास गरेका छन्।
यसैगरी, पचरौता नगरपालिका-७ बेनौलीमा संघीय मामिला तथा सामान्य प्रसाशनमन्त्री लालबाबु पण्डित, फेटा गाउँपालिका-४ भलुहीमा महिला, बालबालिका तथा जेष्ठ नागरिकमन्त्री श्रीमती थममाया थापाले, वीरगञ्ज महानगरपालिका-५ उदयपुर घुर्मीमा खानेपानीमन्त्री बिना मगर, फेटा गाउँपालिका-४ भरवलीयामा सहरी विकासमन्त्री मोहम्मद इश्तियाक राईले, महागढीमाई नगरपालिका-७ तेलगाईमा भूमि व्यवस्था, सहकारी तथा गरिबी निवारणमन्त्री पद्मा कुमारी अर्याल, कलैया उपमहानगरपालिका-१३ छोट्कीफुलबारिया र देवताल गाउँपालिका-७ रामपुर्वामा प्रदेशका २ मुख्यमन्त्री राउतले आवास निर्माणको शिलान्यास गरेका हुन्।
हावाहुरी प्रभावित क्षेत्र पर्सामा ९१ र बारामा १ हजार ३ सय ६२ घर गरी जम्मा १ हजार ४ सय ५३ घर निर्माण हुने बताइएको छ। आवास निर्माण तीन चरणमा सम्पन्न गर्ने लक्ष्य नेपाली सेनाको छ।
पहिलो चरणमा ४८२ घरहरु जेष्ठ २६ गते भित्र, दोस्रो चरणमा ४८२ घरहरु आषाढ २८ गते भित्र र तेस्रो चरणमा ४८९ घरहरु श्रावण ३० गते भित्र निर्माण कार्य सम्पन्न गर्ने लक्ष्य नेपाली सेनाले लिएको छ।
कार्यक्रममा रक्षामन्त्री पोखरेलले नेपाली सेनालाई दिइएको जिम्मेवारी समयमा नै सम्पन्न गर्नेमा आफू विश्वस्त रहेको बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
