काठमाडौं– प्रधानमन्त्री केपी शर्मा ओलीले आफ्नो निर्वाचन क्षेत्रका लागि योजनाहरुको सूची राष्ट्रिय योजना आयोगलाई थमाएका छन्।
प्रधानमन्त्री कार्यालयका सहसचिव विनोदबहादुर कुँवरले हस्ताक्षर गरेको पत्र आयोगमा पुगेको हो। 'आगामी आर्थिक वर्षको बजेट तथा कार्यक्रममा प्राथमिकतामा राखी समावेश गरिदिनका लागि त्यहाँ पठाइएको व्यहोरा निर्देशन अनुसार अनुरोध गर्दछु', पत्रमा भनिएको छ।
.JPG)
पत्रमा विभिन्न मन्त्रालय अन्तर्गतका आयोजनाहरुलाई छुट्टाछुट्टै बुँदागत रुपमा लेखिएको छ।
पत्रको बोधार्थ झापास्थित ५ नम्बर क्षेत्र सांसद सम्पर्क कार्यालयलाई समेत दिइएको छ। प्रधानमन्त्री ओली सोही क्षेत्रबाट निर्वाचित सांसद हुन्।
प्रधानमन्त्रीको चासोमा सडक कालोपत्रे तथा पुल निर्माणको बाहुल्य देखिन्छ। त्यसका साथै सानातिना आयोजनाहरुमा पनि प्रधानमन्त्रीको चासो देखिन्छ।
विश्वकै अग्लो बुद्धको मूर्ति
दमक ३ बेलडाँगीमा विश्वकै अग्लो मूर्ति बनाउने योजना प्रधानमन्त्रीको पत्रमा उल्लेख छ। सो योजना पर्यटन बोर्डमा समेत समावेश भइसकेको पत्रमा सूचित गरिएको छ। संस्कृति, पर्यटन तथा नागरिक उड्डयन मन्त्रालय अन्तर्गत भुटानी शरणार्थी संग्राहलय रिसर्च सेन्टर, आदिवासी स्मृति पार्क, सुरखानी पार्क निर्माण जस्ता योजना पनि छन्।
दमकमा भ्युटावर
सहरी विकास मन्त्रालय अन्तर्गत प्रधानमन्त्रीले भ्यु टावरको माग गरेका छन्। पत्रमा उल्लेख भए बमोजिम सो योजना दमकमा रहनेछ। त्यस्तै, दमककै आधुनिक र बहुतले बसपार्क तथा दमक अस्पतालको भवन निर्माण पनि रहेका छन्।
दमक चोक बेलडाँगी हुँदै भृकुटीचोक पुरानो सल्लीबजारसम्म बाटाको दुवैतर्फ सडक पेटी र रेलिङ निर्माण पनि समावेश गरिएको छ।
प्रधानमन्त्री कि दमकको मेयर : कांग्रेस प्रवक्ता
पत्र सार्वजनिक भएसँगै प्रमुख प्रतिपक्षी दल नेपाली कांग्रेसका प्रवक्ता विश्वप्रकाश शर्माले पनि प्रधानन्त्रीलाई प्रश्न गरेका छन्। 'तपाईं देशको प्रधानमन्त्री कि दमकको मेयर', ट्विटरमा उनले प्रश्न गरेका छन्।
‘प्रधानन्त्रीलाई के हेक्का रहोस् भने उहाँ दमकको मात्रै प्रधानमन्त्री होइन। नेपाल देशको प्रधानमन्त्री हो,’ नेपाल लाइभसँग कुरा गर्दै उनले भने।
आफ्नो निर्वाचन क्षेत्रलाई मात्रै महत्व दिएर योजना पार्नका लागि राष्ट्रिय योजना आयोगलाई पत्र काटेकोमा शर्माले आपत्ति जनाए। ‘१६५ निर्वाचन क्षेत्रमा झापा क्षेत्र नम्बर ५ र ७५३ निकायमा दमक मात्रै स्थानीय निकाय होइन,’ उनले भने।
बुद्धको सबैभन्दा अग्लो मूर्ति दमकमै किन बन्नुपर्ने भन्दै उनले प्रश्न गरेका छन्। दमक नगरपालिकामा ५ हजारभन्दा बढी सुकुम्वासी रहेको उल्लेख गर्दै शर्माले भने, ‘तिनको लागि एउटा सानो छानो बनाउने भन्दा देशको ढुकुटीको अर्बौं रुपैयाँ लगेर सपिङ मल र भ्युटावर बनाउन लागिएको छ।’ संसारका श्रमिक एक हौं भन्ने प्रधानमन्त्रीले दमकका श्रमिकका हितका बारेमा नसोचेको भन्दै असन्तुष्टि व्यक्त गरे। ‘यो सुकम्वासी र गरिबीमाथिको व्यंग्य हो कि होइन?’ उनको प्रश्न छ।
भूकम्प संग्रहालय मुख्य प्रभावित जिल्लामा नबनाई दमकमा बनाउन लागिएको प्रति भने शर्माले आपत्ति जनाएका छन्।
.JPG)
प्रधानमन्त्री कार्यालयले राष्ट्रिय योजना आयोगलाई थमाएको योजनाको सूची
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778309656.png)
-1764146706.png)
