काठमाडौं– भारतीय प्रधानन्यायाधीश रञ्जन गोगोईमाथि यौन दुर्व्यवहारको आरोप लगाएकी महिलाले सर्वोच्च अदालतको छानबिन समितिमा उपस्थित हुन अस्वीकार गरेकी छन्।
उनको यो अस्वीकारसँगै यो प्रकरण नयाँ मोडमा प्रवेश गरेको छ।
उनले आफ्नो वकिल पनि साथै राख्न माग गरेकी थिइन्। तर यो एक संवेदशील विषय भएको भन्दै जाँच समितिले वकिल राख्न अनुमति नहुने बताएको थियो। लगत्तै उनले उक्त निर्णयप्रति आपत्ति जनाउँदै समिति समक्ष उपस्थित नहुने घोषणा गरेकी हुन्।
उनले आफू असुरक्षित भएको दाबी समेत गरेकी छन्। उनले अदालतबाट बाहिरिँदै गर्दा दुईदेखि चार जनाले आफूलाई पछ्याएको दाबी गरेकी छन्। न्यायाधीश एस ए बोबडेको अध्यक्षतामा बनेको तीन सदस्य समितिले आफूलाई न्याय नदिने उनले प्रेस विज्ञप्ति जारी गर्दै बताएकी छन्।
सर्वोच्चकी पूर्वकर्मचारी रहेकी उनले जाँचमा अडियो र भिडियो रेकर्डसम्मको तयारी नभएको भन्दै आलोचना गरेकी छन्। उक्त समितिमा सर्वोच्च अदालतका बहालवाला तीन न्यायाधीश सदस्य रहेका छन्। न्यायाधीश बोबडेसँगै न्यायाधीशहरु इन्दु मलहोत्रा र इन्दिरा बनर्जी सदस्य रहेका छन्। यसअघि भावी प्रधानन्यायाधीशको रोलक्रममा रहेका न्यायाधीशको नेतृत्वका समिति गठन भएको भन्दै उनले आलोचना गरेकी थिइन्। लगत्तै उनको स्थानमा समितिमा इन्दिरा बनर्जीको राखिएको थियो।
प्रधानन्यायाधीश गोगोईलाई ती महिलाले केही हप्ता पहिले उक्त आरोप लगाएकी थिइन्।
३५ वर्षीया ती महिलाको उजुरीमा गोगोईले प्रधानन्यायाधीश नियुक्त हुनेबित्तिकै गत अक्टोबरमा उनलाई दुई पटक यौन दुराचार गरेको दाबि गरेकी थिइन् । उनले यौन उत्पीडन गरेको र त्यस्तो गर्न नमान्दा परिवारलाई विभिन्न किसिमले यातना दिएको गरेको दाबी गरेकी थिइन्।
आफूमाथि गम्भीर आरोप लागेपछि ६४ वर्षीय गोगोईले आरोपलाई पूर्ण रूपमा अस्वीकार गर्दै त्यसलाई ‘गलत र न्यायपालिकाको स्वतन्त्रता विपरीत’ आरोप आएको टिप्पणी गरेका थिए।
उक्त आरोपलाई उनले न्यायपालिकाको स्वतन्त्रतामाथिको गम्भीर खतरा पुर्याउनुका साथै अदालत अस्थिर बनाने षड्यन्त्र भएको टिप्पणी गरेका थिए। आरोप लगाउने महिलाले एउटा उजुरीपत्र सर्वोच्च अदालतका सबै २२ जना न्यायाधीशहरूलाई पठाएकी थिइन्। उक्त कुरा सञ्चारमाध्यममा आएपछि बैसाख ११ गते सर्वोच्चले तीन सदस्य समिति गठन गरेर छानबिन थालेको थियो।
उक्त छानबिनका लागि बयानमा आरोप लगाएकी महिला आउन नमानेपछि समितिले के गर्ने भन्नेमा अन्योल देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791869951.jpg)
-1786602170.png)
