काठमाडौं- नेपाली आकाशमा उडान गर्ने पाइलट अभाव भएका समाचार नसुन्ने नेपाली विरलै होलान्। पाइलट अभाव भएको भन्दै विदेशी पाइलट ल्याएर उडान गर्ने चर्चा पनि बेलाबेला चल्दै आएको छ। नेपाल एयरलाइन्सले समेत यी विषयलाई बहसमा उतार्ने गरेको छ। तर सोही राष्ट्रिय ध्वजाबाहक नेपाल एयरलाइन्समा १२ जना हवाइ चालक दलका यस्ता सदस्य पनि छन्, जसले जहाज उडान गर्नै नै पाएका छैनन्।
एयरलाइन्सका ७ जना पाइलट र ५ जना को-पाइलटले जहाज लामो समदेखि जहाज उडान गर्न नपाएका हुन्। अन्तर्राष्ट्रिय उडानमा प्रयोग हुँदै आएको जहाज बोइङ-७५७ र वाई–१२ जहाज उडान गर्ने पाइलटले उडान गर्न नपाएको लामै समय व्यतीत भइसकेको छ।
बोइङ उडान गर्ने क्याप्टेनहरु ओमबहादुर गुरुङ, शुक्र शमशेर जबरा, दिपाल शेरचन, राजन मानन्धर र सन्तोष शर्माले जहाज ग्राउन्डेड भएका कारण गत अक्टोबरदेखि जहाज उडान गर्न पाएका छैन्।
यसैगरी वाई-१२ जहाजका पनि दुई जना स्थायी पाइलट सञ्जय वादे र नृपेन्द्र भट्टराईले पनि जहाज उडान गर्न पाएका छैनन्। वाई–१२ जहाजमा नै को–पाइलटका रुपमा काम गर्दै आएका सृजना राउत, लिब्रटी भण्डारी, विजय अवाले रवीन केसी र महेशराज पाण्डे गरी ५ जनाले पनि जहाज उडान गर्न पाएका छैनन्।
जहाज उडान गर्न किन पाएनन् बोइङका पाइलटले?
नेपाल एयरलाइन्सको एउटा बोइङ जहाजले अन्तर्राष्ट्रिय उडान भर्दै आएको थियो। तर, निगमले सो जहाज २८ अक्टोबर, २०१८ मा मर्मतका लागि मलेसिया पठायो। मर्मतपछि सो जहाज १६ जनवरी, २०१९ मा मलेसियाबाट काठमाडौं आउँदै थियो। तर, आकाशमा उडिरहेकै बेला ’विङ स्क्रिन’ बिग्रन पुग्यो। आकाशमा नै समस्या आएको भएपनि सो जहाज काठमाडौं विमानस्थलमा सफल अवतरण गर्न भने सफल भयो।
त्यसपछि यो जहाज केही दिन विमानस्थलमा नै ग्राउन्डेड भयो। ग्राउन्डेड जहाज प्राविधिक टोलीले मर्मत गरेर उडानयोग्य त बनाए तर यतिबेलासम्ममा बोइङ उडान गरिरहेका पाइलटहरुको सिप परीक्षण प्रमाणपत्र (पिपिसी) म्याद सकिइसकेको थियो। यसरी उडान भर्दै आएका केही पाइलट कामविहीन बन्न पुगे।
ग्राउन्डेड भएको सो बोइङ जहाज निगमले बिक्री गर्ने घोषणा गरिसकेको छ। अब यो जहाजबाट निगमले फेरि उडान भर्ने संभावना कम छ। तर, ५ जना स्थायी पाइलटको भने अफिस आउने र हाजिर गरेर घर जाने काम मात्रै भएको छ। स्थायी पाइलटका हकमा निगमले मासिक ४५ घन्टा बराबरको सेवासुविधा ग्यारेन्टी गरेको छ।
यसरी जहाज उडान गर्न नपाएका पाइलटले करबाहेक मासिक २ लाख २५ हजार रुपैयाँ पाउने गर्छन्। अहिले ५ जना पाइलटले जहाज उडान गर्न नपाएपनि न्यूनतम तलब भने पाइरहेका छन्। यी पाइलटले जहाज उडान गर्न पाएका भए उनीहरुको मासिक आम्दानी ५ लाखको हाराहारीमा हुन्थ्यो।
बोइङका ५ जना पाइलटमध्ये दुई जना भने ए-३३० जहाजमा को-पाइलट तालिममा आवश्यक अंक प्राप्त गर्न नसकेर पुनः बोइङमै फर्केका हुन्।
वाई-१२ मा पनि समस्या उस्तै
यसैगरी, नेपाल एयरलाइन्सका वाई-१२ जहाज उडान गर्ने २ जना पाइलट र ५ जना को-पाइलटले पनि जहाज उडान गर्न पाएका छैनन्। निगमसँग ४ वटा वाई-१२ जहाज भएपनि पाइलटको पिपिसी (सिप परीक्षण प्रमाणपत्र) र रुट चेक नवीकरण नहुँदा जहाज उडान गर्न नपाएका हुन्। यसै कारण निगमका ४ वटै वाई-१२ जहाज ग्राउन्डेड छन्।
वाई-१२ जहाज उडानकै लागि करारमा नियुक्त भएका दुई जना फिजियोनाथ नेपाली र केबी लिम्बूको तालिम तथा परीक्षा समेत सुरु भएको छैन। वाई-१२ जहाजका एक मात्र आइपी पाइलट आङनुरी शेर्पा अमेरिका पलायन भएसँगै यी पाइलटहरुले जहाज उडान गर्न नपाएका हुन्।
शेर्पाले आफ्नो पिपिसी नवीकरण गरेपनि सिनियर पाइलट वादेको पिपिसी नवीकरण र भट्टराईको रुट चेक नगरिदिँदा दुबै पाइलटले जहाज उडान गर्न पाएनन्। जहाज उडाउन नपाएका पाइलट तथा को-पाइलटले न्यूनतम तलब भने पाइरहेकै छन्। तर, वादेले पनि पुसदेखिको न्यूनतम तलब पनि पाएका छैनन्।
वाई-१२ जहाज उडान गर्ने पाइलटको मासिक न्यूनतम तलब करबाहेक १ लाख ७५ हजार र पाइलटको मासिक तलब ७५ हजार रुपैयाँ बराबर हुन आउँछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
