बेइजिङ- युक्रेनी जनतालाई रूसी नागरिकता प्राप्त गर्न सहज बनाउने विषयमा ‘सोचिरहेको’ रूसी राष्ट्रपति भ्लादिमिर पुटिनले शनिबार बताएका छन्। पूर्वी युक्रेनका पृथकतावादी समूहका सदस्यलाई रूस छिर्न सहज राहदानीको व्यवस्था गरेको भन्दै किभमा विरोध भइरहेका समय रूसी नेताले नागरिकता प्राप्त गर्नका लागि सहज कानुनको निर्माण गर्ने बताएका हुन्।
'हामीले पूर्वी ‘लुगान्स्क र डोनेस्क गणतन्त्र’ का नागरिकलाई मात्र होइन आवश्यक परेमा र चाहेमा युक्रेनमा बसोबास गर्ने वा युक्रेनको नागरिकलाई पनि सरल तवरले नागरिकता दिने विषयमा सोचिरहेका छौँ', बेल्ट एण्ड रोड (बिआरआई) सम्मेलनमा सहभागी हुन चीन आएका रूसी राष्ट्रपति पुटिनले भन्नुने।
यस हप्ता पुटिनले टुक्रिएका क्षेत्रमा रहेका युक्रेनी नागरिकले रूसी पासपोर्टका लागि निवेदन दिएमा तीन महिनाभित्र राहदानी उपलब्ध गराउने आदेशमा हस्ताक्षर गरिसकेको बताइएको छ।
सन् २०१४ मा किभको क्रिमियालाई रूसमा जोड्न क्रिमियाली विद्रोहीले गरेको आन्दोलनका कारण रूस र युक्रेनबीच ठूलो युद्ध नै भएको थियो। युक्रेनले रूसले क्रिमियाली समूहलाई विद्रोहका लागि उक्साएको आरोप युक्रेनले लगाउँदै आएको छ भने रूसले यसमा आफ्नो कुनै प्रोत्साहन नरहेको दाबी गर्दै आएको छ।
करिब पाँच वर्ष पहिले यसै विवादमा भएको युद्धका कारण १३ हजार व्यक्तिको ज्यान गएको थियो। रूसको पछिल्लो घोषणाको युक्रेनी क्षेत्रमा व्यापक आलोचना हुँदै आएको छ।
“युक्रेनी पक्षले रूसले युक्रेनमा थप तनाव उत्पन्न गर्न चाहेको र यसै अनुरूप नागरिकतासम्बन्धी कानुनमा सुधारतर्फ अग्रसर रहेको छ', किभको तर्फबाट काउन्सिल अफ युरोपका लागि स्थायी प्रतिनिधि दिमिट्रो कुलेबाले शनिबार ट्वीटमा उल्लेख गरेका छन्।
पुटिनको निर्णय युक्रेनको नयाँ राष्ट्रपतिमा हास्यकलाकार भोलोदिमिर जेलेन्स्की निर्वाचित भएको केही दिनपछि आएको हो। जेलेन्स्कीले आगामी जुनमा पदभार ग्रहण गर्दासाथ यस समस्याले उनलाई सताउने देखिएको छ। रासस/एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
