भ्लादिभोस्तक- रुसी राष्ट्रपति भ्लादिमिर पुटिन र उत्तर कोरियाली नेता किम जोङ–अनबीच रुसको सुदूरपूर्वी तटीय सहर भ्लादिभोस्तकमा भेटवार्ता भएको छ।
दुबै नेताबीचकाे भेटवार्ता कोरियाली प्रायद्वीपमा आणविक अप्रसारका साथै रुस–उत्तर कोरिया सम्बन्धलाई नयाँ आयाम दिने प्रयत्नमा केन्द्रित भएकाे रुसी अधिकारीहरुले जनाएका छन्। यद्यपी दुबै नेताका तर्फबाट संयुक्त वक्तव्य जारी नभएकाे र कुनै नयाँ सम्झौतामा हस्ताक्षर पनि नभएकाे क्रेमलिनले जनाएको छ।
रुसी राष्ट्रपति पुटिनले कोरियाली प्रायःद्वीपमा उत्पन्न तनावका सन्दर्भमा आफ्नातर्फबाट सकारात्मक प्रयत्न जारी राख्ने बताएका छन्। उनले नेता किमलाई स्वागत गर्दै भने, 'तपाइँको भ्रमणबाट द्विपक्षीय सम्बन्धमा अझ सुधार आउनेछ र कोरियाली प्रायद्वीपमा उत्पन्न विविध विषयलाई सम्बोधन गरी उपयुक्त समाधान खोज्नेतर्फ हामी सफल हुनेछौं।'
भेटवार्तापछि पुटिनले काेरियाली नेता किमले आफ्ना सबै आणविक कार्यक्रमकाे अन्त्य गर्न अन्तर्राष्ट्रियस्तरमै सुरक्षाकाे सुनिश्चितता खाेजिरहेकाे बताए। 'त्यस्ताे सुनिश्चिततामा धेरै देशकाे सहभागिता रहनुपर्नेछ', उनले भने।
राष्ट्रपति पुटिनले नेता किम खुला हृदयकाे रहेकाे तथा आफ्ना सबै एजेन्डामा निर्धक्क र खुला तबरमा छलफल भएकाे समेत जानकारी दिए।
उत्तर कोरियाली नेता किमले पनि भेटघाट धेरै अर्थपूण बनेकाे प्रतिक्रिया दिए। दुवै पक्षले आफ्ना विचार तथा एजेन्डाका विषयमा खुलारुपमा छलफल गर्ने वातावरण बनेकाे उनकाे भनाइ छ।
नेता किमले भ्रमणका बारेमा पहिलो प्रतिक्रिया दिँदै कोरियाली प्रायद्वीपका विविध विषयलाई सम्बोधन गर्न रुसी राष्ट्रपति पुटिनसँगको भेटवार्ता अर्थपूर्ण भएकाे बताए। उनले भने, 'अहिले, विश्वकै ध्यान कोरियाली प्रायद्वीपमा केन्द्रित भएको छ।'
क्रेमलिनका अनुसार प्रारम्भमा दुबै नेताबीच मात्र भेटघाट भएकाे थियाे। त्यसपछि प्रतिनिधिमण्डलस्तरीय सामूहिक भेटवार्ता भएकाे थियाे।
किमका साथ उत्तर कोरियाका सैनिक, नागरिक एवं पार्टीका वरिष्ट अधिकारीहरु सहभागी भएका थिए। उता रुसी टाेलीमा उपप्रधानमन्त्री युरी टुटनेभ, विदेशमन्त्री सर्गेई लाभरोभ, यातायातमन्त्री लगायत वरिष्ट अधिकारीहरु सहभागी भएकाे बताइएकाे छ।
याे भेटवार्ता गएकाे फेब्रअरीमा भियतनामकाे हनाेईमा अमेरिकी राष्ट्रपति डाेनाल्ड ट्रम्प र उत्तर काेरियाली नेता किमबीच भएकाे दाेस्राे शिखर सम्मेलनपछिकै महत्वपूर्ण मानिएकाे थियाे। उक्त भेटघाटपछि अमेरिका र उत्तर काेरियाबीच फेरि दूरी बढेकाे बताइएकाे थियाे। साे भेटघाटमा आणविक कार्यक्रम बन्द गरिएकाे हकमा पूर्णरुपमा काेरियामा आर्थिक लगानी भित्रिने ग्यारेन्टी हुनुपर्ने माग राखेकाे थियाे। तर साे मागमा अमेरिका सकारात्मक नदेखिएपछि वार्ता असफल बनेकाे थियाे।
पुटिन र किमबीचकाे याे भेटघाटलाई अमेरिका र उत्तर काेरियाबीच बढेकाे दूरीलाई घटाउने कडीकाे रुपमा हेरिएकाे थियाे। किमले रुसलाई आफ्नाे पक्षमा पार्नका लागि पनि पुटिनसँग भेट गरेकाे बताइन्छ।
रुसी राष्ट्रपति पुटिनको मैत्रीपूर्ण निमन्त्रणामा उत्तर कोरियाली नेता किम बुधबार निजी रेलमा चढेर रुसको भ्लादिभोस्तक पुगेका थिए। उनलाई भ्लादिभोस्तकमा स्थानीय जनताले परम्परागत सांस्कृतिक भेषभुषासहित स्वागत गरेका थिए।
दुबै नेताबीच भ्लादिभोस्तकको रुस्की द्वीपस्थित फार इस्टर्न फेडेरल युनिभर्सिटी क्याम्पसमा भेटवार्ता भएकाे थियाे।
रुसी राष्ट्रपति पुटिन चीनमा आयोजना हुने बिआरआई अन्तर्राष्ट्रिय सम्मेलनमा भाग लिन भ्लादिभोस्तक हुँदै चीनको बेइजिङ आउने क्रममा साे भेटवार्ता भएकाे हाे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771566457.png)
