कविता : महाशय! नयाँ वर्ष आयो नि!

अर्णव संघारी | २०७६ बैशाख १ आइतबार | Sunday, April 14, 2019 १०:३७:०० मा प्रकाशित

कसैले मेरो कानमा आएर खुसुक्क भन्यो
महाशय, नयाँ वर्ष आयो नि!

मनमा केही उमंग
केही उत्साह
केही आनन्द
केही घबराहट
केही तनाव
यस्तै-यस्तै धेरै कुरा
फेरि लिएर आयो नी
महाशय! नयाँ वर्ष आयो नि!

तर के बदलिएको छ र त्यस्तो
जुन हिजो बदलिन सकेको थिएन
केही भोको पेट
केही नाङ्गो शरीर
केही आँखामा आँसु र रोदन
ती सब हिजो पनि थिए
र आज पनि छन्
त्यस्तो हालत न त हिजो बदलिएका थिए 
न त आज नै बदलिएका छन्
कसैले मेरो कानमा आएर फेरि खुसुक्क भन्यो
महाशय! नयाँ वर्ष आयो नि!

हिजो द्रौपदीलाई नाङ्गो पार्न खोजिएको थियो
आज निर्मलालाई नाङ्गो र लाचार पारियो
हालत र फिक्रीका कारण
जो हिजो थियो त्यही आज पनि छ
दुशासन हिजो पनि हाँसिरहेको थियो
दुशासनहरु आज पनि हाँसिरहेका छन्।
कोही मेरो कानमा आएर फेरि खुसुक्क भन्यो
महाशय! नयाँ वर्ष आयो नि!

साल बदलिए तर हाल अझै त्यही नै छ
समय देश र जनताको चाल त्यही छ
गुनगुनाउँदै
कसैले मेरो कानमा आएर खुसुक्क भन्यो 
महाशय! नयाँ वर्ष आयो नि!