काठमाडौं – संचारकर्मी एवम् साहित्यकार दिपक समीरको कथा ‘आहत उजेलीहरु’ मञ्चन हुने भएको छ । वाचनसँगै सुमधुर संगीतका साथ मौन अभिनयसहित समीरको कथा ‘आहत उजेलीहरु’ मञ्चन हुन लागेको हो ।
कथा ‘आहत उजेलीहरु’लाई असोज १८ गते साँझ ५ बजे बत्तिसपुतलीस्थित शिल्पी थिएटरमा मञ्चन गर्न लागिएको हो । लेखक समीरले नै कथाको वाचन गर्नेछन् भने कला निर्देशक सुमन सागरजंग केसीको नेतृत्वमा कलाकारहरुले मञ्चमा मौन अभिनय गर्नेछन् ।
वाचन र अभिनयलाई अझ सशक्त एवम् जीवन्त बनाउन संगीतकर्मी विकल खड्का नेतृत्वको समूहले लाइभ संगीत भर्नेछ, जसले दर्शकलाई मन्त्रमुग्धसँगै भावुक बनाउने छ ।
कथा मञ्चनको बिचबिचमा गायिका सुनिता कार्कीको सुमधुर स्वरमा गीत गुञ्जनेछ । कथालय नाम दिइएको उक्त कथा मञ्चन कार्यक्रमलाई ब्रोडिजी ग्रुपले आयोजना गरेको हो । पत्रकार विमल नेपालले उक्त कार्यक्रमको संयोजन गरेका छन् भने सञ्चारकर्मी भोजबहादुर विश्वकर्माले सल्लाहकारको भूमिका निर्बाह गरेका छन् ।
मञ्चन हुने नाटक ‘आहत उजेलीहरु’ कथाकार दिपक समीरको कथा संग्रह मुना मदनको डिभोर्स पार्टीभित्र संग्रहित कथा हो । उक्त कथाले वैदेशिक रोजगारीका कारण नेपाली समाजमा पारेको प्रभावलाई देखाउन खोजेको कथाकार समीरले बताएका छन् ।
यसअघि कथालाई नाटकको रुपमा प्रस्तुत गरेर मञ्चन गर्ने चलन भए पनि नेपालमा वाचनसँगै संगीत र मौन अभिनयको त्रिकोणात्मक संयोजन भने पहिलोपटक हुन लागेको हो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
