बनेपा- भूकम्प गएको करिब ४ वर्षपछि यसबाट चर्केका घरको औपचारिक रुपमा प्रबलीकरण गर्ने काम सुरु भएको छ।
राष्ट्रिय पुनःनिर्माण प्राधिकरणको आयोजना र सहयोगी निकाय युकेएआइडी, युएनओपिएस र ब्युल्ड चेञ्जको सहयोगमा शुक्रबारदेखि काभ्रेपलाञ्चोकको नमोबुद्ध नगरपालिका–५ फलाँटेबाट शुरु भएको हो।
प्राधिकरणका कार्यकारी अधिकृत सुशील ज्ञवालीले पुरानो घरलाई बलियो र सुरक्षित बनाउने काम प्रबलीकरणले गर्ने भएकाले यो काम सुरु गरेको बताए। 'हिजो हाम्रो क्षति हुन पुगेका ढुङ्गा, माटो र काठले बनाएका घरहरु केही नयाँ चिजहरु थपेर बनाएको खण्डमा भूकम्पप्रतिरोधी हुन्छन्,' उनले भने, 'यसअघि इञ्जिनियरहरुलाई पनि यससम्बन्धी अध्ययन गर्न समय लागेको कारणले गर्दाखेरी केही समय ढिला हुन गएको हो।'
उनले विभिन्न देशका विज्ञहरुसँग गरेको अध्ययन अनुसन्धान र परीक्षणबाट पास भएका प्रविधिमार्फत यसलाई प्रयोगमा ल्याइएको बताए। 'बन्न लागेको घर कसरी बलियो बन्दो रहेछ हेर्नुहोस् र अरू स्थानीय बासिन्दाले पनि यसरी नै प्राविधिकबाट बलियो बनाउन लाग्नुहोस्,' कार्यकारी अधिकृत ज्ञवालीले भने, 'नमुनाका रुपमा बन्न लागेको घरबाट अरूले पनि सिकेर जानेछन् र यसैबाट प्रशिक्षित भएका प्राविधिकहरुले अरू घरहरु बनाउनेछन्।'
घर बनाउने मात्रै नभई यसलाई ज्ञान केन्द्रका रुपमा स्थापित गर्ने बताउँदै उनले १० हजार प्राविधिक निर्माण गरेर काम अगाडि बढाउने र त्यसका लागि प्राधिकरणले निर्माण सामग्री, निर्माणकर्मी र रु एक लाखसम्म उपलब्ध गराउने जानकारी दिए।
प्राधिकरण जिल्ला आयोजना कार्यान्वयन एकाइ, काभ्रेपलाञ्चोकका प्रमुख लोकनाथ रेग्मीले अनौपचारिक रुपमा यसअघि पनि केही एनजिओहरुले प्रबलीकरणको कार्य सुरु गरेको भए पनि राष्ट्रिय पुनःनिर्माण प्राधिकरणको आयोजनामा पहिलो पटक थालेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
