काठमाडौं- नेपाल उद्योग वाणिज्य महासंघका पूर्वअध्यक्ष चण्डीराज ढकाल आर्थिक रुपमा टाट पल्टिने अवस्थामा पुगेका छन्। ढकालले आफ्ना विभिन्न व्यवसायका नाममा फरक–फरक बैंकबाट लिएको ऋण तिरेको छैनन्।
उनले राष्ट्रिय वाणिज्य बैंकको मात्र १ अर्ब रुपैयाँ बढी ऋण तिर्न बाँकी छ।
कर्जा सूचना केन्द्रको कालोसुची नंम्बर ४१९६, ४२०४, ४२४२, ४२५४, र ३७५४ सँग व्यवसायी चण्डीराज ढकालको नाम जोडिएको छ।
ढकालले आफ्ना विभिन्न व्यवसाय र कम्पनीको नाममा बैंकबाट लिएको ऋण चुक्ता नगरेका कारण उनलाई कालोसूचीमा राखिएको हो।
पछिल्लो समय राष्ट्रिय वाणिज्य बैंकलाई ढकालले तिर्नुपर्ने १ अर्बभन्दा बढी ऋणका विषयमा सरकारले नै चासो देखाएपछि ठुलो रकम बराबरको भाका नाघेको ऋण ढकालको नाममा रहेको वास्तविकता बाहिर आएको छ।
कर्जा सूचना केन्द्रको तथ्याङ्कले ढकालका हरेक व्यवसाय ऋणमा रहेको देखाएको छ। मोमेन्टो एपेरल्समार्फत् चण्डीराज ढकाल, भगवानदास बी रेहेजा र रजनीगोपाल रेहेजाले लिएको राष्ट्रिय वाणिज्य बैंकको ऋण चुक्ता नगरेको भन्दै केन्द्रले २०६७ मंसिर १७ गते पहिलोपटक ती व्यक्तिको नाम कालोसूची राखेको छ।
त्यसपछि ढकाललाई २०६९ असार १९ गते, २०६९ असार १५ र २०६९ साउन १४ गते फरकफरक कम्पनीका नाममा बैंकबाट लिएको ऋण तिर्न बाँकी रहेको भन्दै केन्द्रले कालोसूचीमा राखेको छ।
जसमध्ये, मोमेन्टो एपेरल्सको नाममा चण्डीराज ढकाल, रचना आचार्य ढकाल, टिकाराज ढकालले कर्जा लिएका छन्। यसैगरी, रेडियन्ट फन वेयर फेसनका नाममा चण्डीराज ढकाल र टिकाराज ढकालले ऋण लिएका छन्। बेङजिङ रोस्ट डक रेस्टुरेन्टका नाममा चण्डीराज ढकाल र रचना आचार्य ढकालले लिएको ऋण तिर्न बाँकी रहेको छ।
मोमेन्टो एपेरल्स, रेडियन्ट फुटवयेर फेसन प्राईभेट लिमिटेड, र बेईजिङ रोस्ट डक रेस्टुरेन्टका अध्यक्ष ढकाल नै हुन्।
मोमेन्टो एपेरल्सका नाममा ढकालले राष्ट्रिय वाणिज्य बैंकबाट ऋण लिएको दूई दशकभन्दा बढी समय भइसकेको छ। पछिल्लो एक दशकदेखि उनले ऋण तिर्नै छाडेका छन्। जसका कारण उनको ३० करोड रुपैयाँबराबरको ऋण रकम साँवा र ब्याज गरेर १ अर्ब नाँघेको देखिन्छ।
ढकालबाट दशकौं देखि नउठेको ऋण असुलीका लागि राष्ट्रिय वाणिज्य बैंकले पछिल्लो पटक सरकारकै सहयोगमा पहल गरिरहेको छ।
अर्थ मन्त्रालयले वाणिज्य बैंकलाई ऋण असुली गर्न परिपत्र गरिसकेको छ भने बैंकले पनि ढकाललाई ऋण तिर्न ताकेता गर्न थालेको छ।
उद्योग वाणिज्य महासंघमा प्रभावी मानिने ढकाल महासंघ र माथिल्लो निकायकै आडमा वर्षौंसम्म कर्जा नतिरी बसेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
