राजविराज– माध्यमिक शिक्षा परीक्षा (एसइई) अन्तर्गत गत १४ र १५ गते भएको विज्ञान र सामाजिक विषयको प्रश्नपत्र प्रदेश २ को सिरहास्थित इलाका प्रहरी कार्यालयबाट बाहिरिएको पुष्टि भएको छ। घटनामा संलग्न २ प्रहरीसहित ६ जनालाई प्रहरीले पक्राउ गरी आज सार्वजनिक गर्यो।
नेपाल प्रहरीको केन्द्रीय अनुसन्धान ब्युरो (सिआइबी) का प्रमुख प्रहरी नायव महानिरीक्षक निरजबहादुर शाहीले बिहीबार जिल्ला प्रहरी कार्यालय सप्तरीमा पत्रकार सम्मेलन गरी घटनाको पुष्टि गरेका हुन्। संलग्न प्रहरीसहित ६ जनालाई नै पत्रकार सम्मेलन मार्फत सार्वजनिक गरिएको छ।
अनुसन्धानका क्रममा दुवै प्रश्नपत्र सिरहाको इलाका प्रहरी कार्यालय कल्याणपुरमा कार्यरत प्रहरी जवान ब्रह्मदेव सुनरैत यादवले उनका साथी प्रहरी जवान दीपेन्द्रकुमार मण्डललाई सहयोग गर्न लगाई निकालेको पाइएको शाहीले बताए। ‘इन्चार्जले राखेको चाबी चोरेर प्रश्नपत्रका पोका ब्लेडको चिर्दै फोटो खिचेर फेरि पोकाभित्र हालेको पाइयो,’ उनले भने, ‘त्यसमा इन्चार्ज (सई) तुलसी भट्टराईसहित अन्य कसैको पनि संलग्नता देखिएको छैन।’
ब्रह्मदेवले प्रश्नपत्र निकाल्ने मात्र नभई सिरहाको वरहथवा मावि विष्णुपुरमा परीक्षा केन्द्र रहेका दीपेन्द्रको ठाउँमा बसेर परीक्षा दिइरहेको पनि पुष्टि भएको छ। ‘प्रवेशपत्रबाट दीपेन्द्रको फोटो झिकी ब्रह्मदेवको फोटो टाँसेर आफै परीक्षामा बसेको अनुसन्धानमा खुल्यो,’ शाहीले थपे, ‘त्यसमा छाप समेत किर्ते गरेको पाइएको छ।’
पक्राउ परेका दुवै प्रहरीमध्ये २२ वर्षीय ब्रह्मदेव सप्तरीको राजविराज नगरपालिका १० र दीपेन्द्र राजविराज नगरपालिका ६ का हुन्।
ब्रह्मदेवले साथीलाई झिकेको प्रश्नपत्र आफ्नै दाजु २८ वर्षीय विष्णुदेव मण्डललाई इमोमार्फत पठाएपछि सप्तरीमा पनि छ्यापछ्याप्ती भएको शाहीले जानकारी दिए। ‘हामीले विद्यार्थीबाट अनुसन्धान सुरु गर्यौं। एकबाट अर्को र अर्कोबाट अर्को गर्दागर्दै विष्णुदेवबाट सबै कुरा खुल्यो,’ शाहीले थपे, 'विष्णुदेववाट मनोज यादव, मनोजबाट राजेश यादव र राजेशवाट उमेश यादव हुँदै प्रश्नपत्र विद्यार्थीको हातहातमा पुग्यो।’
प्रश्नपत्र आउट भएपछि १ हजार देखि १ हजार २ सय रुपैयाँसम्म बिक्री भएको उनले बताए। बाँकी प्रश्नपत्र आउट भए/नभएको विषयमा भने अनुसन्धान भइरहेको शाहीले बताएका छन्। ‘हामीले केही कुरा डिजिटल ल्याबमा परीक्षणका लागि पठाएका छौं। त्यो रिपोर्ट आएपछि मात्र त्यस विषयमा बताउन सकिन्छ।’
शाहीले घटनामा संलग्न कसैलाई पनि नछोडिने र कडा कारबाही गरिने बताए। प्रहरी महानिरीक्षकले नै यस विषयमा कडा कारबाही गरिने सन्देश पठाएको भन्दै उनले प्रहरीलाई विभागीय कारबाही र सामान्य नागरिकसरह पनि कारबाही हुने जानकारी दिए।
प्रदेश २ प्रहरी कार्यालय र जिल्ला प्रहरी कार्यालय सप्तरीको सहयोगमा भएको अनुसन्धानमा प्रहरीले अन्य करिब २० जनालाई पक्राउ गरेको थियो। बाँकीलाई सोधपुछपछि छोडिएको सप्तरीका एसपी राजेन्द्र विष्टले बताए।
प्रदेश २ का २ सय ६२ परीक्षा केन्द्रमा ७० हजार ५ सय ६८ परीक्षार्थी रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
