काठमाडौं- प्रधानमन्त्री केपी शर्मा ओलीले हमला गर्ने स्वभाव नै ऋषि धमलाको स्वभाव भएको बताएका छन्। रिपोर्टर्स क्लबको २१औं वार्षिकोत्सवको अवसरमा काठमाडौंमा आयोजित कार्यक्रममा बोल्दै प्रधानमन्त्री ओलीले धमलाको प्रशंसामा आफ्ना शब्दहरु खर्चिए।
'बिहान उठ्नेबित्तिकै मन परे पनि नपरे पनि ब्रस गर्नैपर्छ,' प्रधानमन्त्री ओलीले भने, 'ऋषिलाई कसैले मन पराओस्, नपराओस्, पत्रकारितामा ऊ चाहिन्छ।'
धमलासँग जबर्जस्त स्वभाव भए पनि त्यो नै उनको पहिचान भएको प्रधानमन्त्री ओलीले बताए। 'यति जबर्जस्ती नगर्ने हो भने उहिले नै उनलाई कुन कुनामा फालिसक्थे,' प्रधानमन्त्री ओलीले भने।
टिभीको स्क्रिनमा जहाँसुकै देखापर्ने आरोप लाग्ने गरेका धमलाप्रति पनि प्रधानमन्त्रीले प्रस्ट्याउन खोजे। 'पहिले टिभीमा ऋषि देखियो भनेर आरोप लाग्ने गरेको थियो। अब त ऋषिको पछि टिभी लाग्नुपर्ने अवस्था छ,' प्रधानमन्त्रीले भने, 'उनले गरेको संघर्षले नै यो सबै प्राप्त भएको हो।'
धेरै मुर्धन्य पत्रकारहरु भए पनि धमला जतासुकै छाइरहेको उनको भनाइ थियो। रिपोर्टर्स क्लब पत्रकारितामा सशक्त गाइड र धमला यसको ब्रान्ड भएको भन्दै प्रधानमन्त्रीले उनको थप प्रशंसा गरे।
सोही कार्यक्रममा यस वर्षको मदन भण्डारी स्मृति पत्रकारिता पुरस्कार रिपब्लिका अंग्रेजी दैनिकका प्रधानसम्पादक सुवास घिमिरे र वरिष्ठ पत्रकार हरिप्रसाद जोशीलाई संयुक्त रुपमा प्रदान गरिएको थियो। रिपोर्टर्स क्लबको उक्त पुरस्कारको राशि एक लाख रहेको छ। घिमिरे र जोशीलाई जनही ५०/५० हजार रुपैयाँ प्रदान गरियो।
यस्तै यो वर्षको वीरेन्द्र साह स्मृति पत्रकारिता पुरस्कार कान्तिपुर दैनिकका सहायक वरिष्ठ उप–सम्पादक राजेश मिश्रलाई दिइएको छ। पुरस्कारको राशि २५ हजार रुपैयाँ रहेको छ। कृष्णसेन इच्छुक स्मृति पत्रकारिता पुरस्कार क्रान्तिकारी पत्रकार संघका संस्थापक अध्यक्ष एवम् प्रेस सेन्टरका अध्यक्ष महेश्वर दाहाललाई प्रदान गरियो।
यसैगरी यस वर्षको सहिद जगतजंग शाह स्मृति पत्रकारिता पुरस्कार पत्रकार डिल्ली बसेलले पाए। रिपोर्टर्स क्लब नेपाल उत्कृष्ट युवा पत्रकारिता पुरस्कारबाट पत्रकार सन्तोष न्यौपाने पुरस्कृत भए।
यो वर्षको क्रियाशील युवा पत्रकारिता पुरस्कार भने राजधानी दैनिकका समाचार सम्पादक ध्रुव लम्सालले पाए।
क्रियाशील महिला पत्रकारिता पुरस्कारबाट उषाकिरण कँडेल पुरस्कृत भइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781591850-1781592603.jpg)
-1764146706.png)
