लिलु डुम्रे
काठमाडौं- कानुन व्यवसायीको छाता सङ्गठन नेपाल बार एसोसिएसनको निर्वाचन प्रचारका लागि उम्मेदवारले मतदान परिसरमा विद्यार्थीलाई अघि सारेका छन्।
नयाँ नेतृत्व चयनका लागि आज देशभर नै निर्वाचन भइरहेको निर्वाचनमा प्रगतिशील र लोकतान्त्रिक समूहका उम्मेदवारले कानुन विषय अध्ययनरत विद्यार्थीलाई प्रचारमा खटाएका छन्। काठमाडौं उपत्यकाको सर्वोच्च अदालत बार कार्यालय, उच्च अदालत पाटन र काठमाडौँ जिल्ला अदालतमा जारी निर्वाचनमा विद्यार्थीलाई भ्याइनभ्याइ छ।
मताधिकार नरहेका विद्यार्थीले कालोकोट पहिरिएर लोकतान्त्रिक र प्रगतिशील समूहका प्रत्यासीलाई सघाएका छन्। विद्यार्थीले हातमा पर्चा बोकेर मतदातालाई आफू पक्षीय उम्मेदवारका नाममा मत मागेका छन्।
नेशनल ल कलेजमा अध्ययनरत यशोदा बन्जारा पनि उम्मेदवारको प्रचार प्रसारकै क्रममा भेटिइन्। उनले लोकतान्त्रिक समूहलाई जिताउन चाहन्छिन्। पुरानो पुस्तालाई स्वतन्त्र न्यायपालिकाबारे जानकारी नभएको टिप्पणी गरिन्। उनले भनिन्, ‘स्वतन्त्र न्यायपालिका बोलीमा मात्रै भयो। काममा पनि देखाउनका लागि नयाँ पुस्ता नेतृत्वमा आउनुपर्छ।’लोकतान्त्रिक र राम्रो अधिवक्ता भएकाले पोखरेलले जित्नुपर्ने उनको मत छ।
बारको २५औं केन्द्रीय कार्यसमितिको निर्वाचनमा नयाँ नेतृत्वका लागि देशभर रहेका १० हजार ३१३ मतदाताले मतदान गर्दैछन्।
लोकतान्त्रिक समूहबाट नेतृत्व गरेको सुनीलकुमार पोखरेलको प्रचारमा सर्वोच्च परिसरमा खटेका कानुनका विद्यार्थी सागर अर्यालले सम्पत्ति सार्वजनिक गरेर लोकतान्त्रिक समूहका अध्यक्ष पोखरेलले बारको इतिहासमा नयाँ काम गरेको बताए। नेपाल ल क्याम्पसका विद्यार्थी रहेका उनले भने, ‘अध्यक्षका उम्मेदवारका दुबैको घोषणापत्र पढें। युवा पुस्ता, निष्पक्ष न्यायालय र बार सुधारका लागि सुनील पोखरेल उपयुक्त हुनुहुन्छ।’
न्यायलयको विकृति, भ्रष्टाचार तथा अस्वभाविक मौनताका बारेमा कम जानकार विद्यार्थीहरु आफू पक्षीय उम्मेदवारका गुणगान गाउन भने अघि थिए। नेपाल ल क्याम्पसमा अध्ययनरत समीर रिजाल प्रगतिशील समूहलाई जिताउन हातमा पर्चा बोकेर सर्वोच्च गेटमा तैनाथ थिए।
नेपाल बारमा विगतमा देखिएका विसंगति हटाउन चण्डेश्वर श्रेष्ठले जित्नुपर्ने उनको मत छ। उनले भने, ‘लोकतान्त्रिक समूहल विगतमा बारमा जित्दा बोल्न पर्ने समयमा नबोलेको थियो।’
प्रगतिशील पक्षले बारको नेतृत्व प्राप्त गरे बार सत्तारुढ दलको छाँया बन्ने आरोप लोकतान्त्रिक समूहले लगाएको छ। त्यसको प्रतिवाद गरेका कानुनका विद्यार्थी रिजाल भन्छन्, ‘लोकतान्त्रिक समूहले विगतमा बारको नेतृत्व गर्दा असंवैधानिक कार्यमा बार मौन रह्यो।’
बिहान ८ बजेदेखि अपराह्न ४ बजेसम्म देशभरका ३५ मतदान केन्द्रमा बारको नयाँ नेतृत्वको लागि मतदान भइरहेको छ। मतदानस्थलमा प्रचारप्रसारमा व्यस्त भेटिएकी आस्था लोहनी बार निर्वाचनका लागि मतदातामा नामावली छैन। तर, उनको धपेडी वास्तविक उम्मेद्वारभन्दा कम छैन।
नेपाल ल क्याम्पसकी विद्यार्थी लोहनी प्रगतिशील समूहको प्यानलले जित्नुपर्ने मत राख्छिन्। विगतमा लोकतान्त्रिक समूहले बारमा जित्दा सुधार गर्नै नसकेको उनको आरोप छ।
हातभरि उम्मेदवारको पर्चा बोकेर सर्वोच्च परिसरमा मतदातालाई मुस्कानसहितको पर्चा बाड्ने काममा लागेकी थिइन् नेपाल ल क्याम्पसकी अर्की विद्यार्थी सोनी सिलवाल। लोकतान्त्रिक समूहका अध्यक्षका उम्मेदवार पोखरेलको ‘नयाँ सोच र उर्जाले’ न्यायलयमा सुधार हुने उनको विश्वास छ।
नयाँ नेतृत्वका लागि प्रगतिशील, पेसागत तथा समावेशी समूह र बृहत् लोकतान्त्रिक समूहका उम्मेदवार तय गर्ने क्रममा आफ्नै समूहका कानुन व्यवसायी असन्तुष्ट रहेको बारे प्रचारमा खटेका विद्यार्थीले बुझ पचाए।
अध्यक्षमा प्रगतिशील समूहबाट उम्मेदवारी दिएका वरिष्ठ अधिवक्ता श्रेष्ठलाई नेपाल कम्युनिस्ट पार्टी निकट पूर्वमहान्यायधिवक्ता रमण श्रेष्ठको सहयोग नरहेको बताइन्छ।
अर्को समूहमा पनि असन्तुष्टि उस्तै छ। लोकतान्त्रिक समूहबाट उम्मेदवार बनेका पोखरेललाई असहयोग गर्न उनी पक्षकै वरिष्ठ अधिवक्ताहरु लागेको चर्चा चलेको थियो। कांग्रेस निकट शुभेच्छुक संगठन डिएलएका पदाधिकारी नै पोखरेलको उम्मेदवारीप्रति असन्तुष्ट थिए।
असन्तुष्ट र तटस्थ मत तान्न सक्ने उम्मेदवारले बारको बागडोर सम्हाल्ने आँकलन गरिएको छ।
२५ सदस्यीय बारको कार्यसमितिका लागि ६३ जनाको उम्मेदवारी परेको छ।
तीन वर्षका लागि हुने कार्यसमितिमा एक अध्यक्ष, एक महासचिव, एक कोषाध्यक्ष, महिला उपाध्यक्ष एक र सातै प्रदेशबाट एकएक गरी आठ उपाध्यक्ष निर्वाचित हुनेछन्।
देशभरबाट मतपेटिका सङ्कलन गरेपछि मतगणना सोमबारदेखि काठमाडौंमा मतगणना हुने बताइएको छ।
अध्यक्षका लागि छ जनाको उम्मेदवारी परेको छ। चुनावी भिडन्त मुख्यतया लोकतान्त्रिक र प्रगतिशील समूहबीच हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
