काठमाडौं– प्रधानमन्त्री एवं नेपाल कम्युनिस्ट पार्टी (नेकपा)का अध्यक्ष केपी शर्मा ओलीले पार्टीभित्र गुट उपगुट नचल्ने बताएका छन्।
बिहीबार नेकपाको प्रदेश ३ कमिटीका पदाधिकारीहरुको सपथ ग्रहण तथा प्रथम बैठकलाई सम्बोधन गर्दै ओलीले नेतृत्वले कसैलाई पनि काखा र पाखा नगर्ने स्पष्ट पारे।
'दुई पार्टीको एकताको अर्थ यो हो कि हामीमा गुट उपगुट छैनन्', उनले भने, 'हामी वैचारिक रुपमा स्पष्ट र सांगठनिक रुपमा बलियो पार्टी हौं। त्यसैले यहाँ अन्तकुन्तरबाट गुट सञ्चालन गरेर पार्टीलाई कमजोर र कार्यकर्तालाई अन्यौल पार्ने काम कसैले पनि गर्नु हुँदैन। पार्टी कमजोर हुँदा नेताहरु कोही जेलमा थियौं, कोही भूमिगत अवस्थामा थियौं तर सबल हुँदा हामी सरकारमा छौं। त्यसकारण पार्टीलाई एकताबद्ध बनाएर लैजानुपर्छ।'
ओलीले नेकपाको एकता भवितव्य नभएको बताए। लामो बहस, छलफल र देशप्रतिको जिम्मेवारीका कारण पार्टी एकता सम्भव भएको प्रधानमन्त्री ओलीको भनाइ छ।
'नेकपा भवितव्य भएर ठूलो पार्टी भएको होइन, पानी बर्से जसरी बहुमत बर्सेको होइन', उनले भने, 'यसमा जनताको विश्वास, पार्टीको दृष्टिकोण र देश बनाउने प्रतिबद्धतालाई जनताले अनुमोदन गरेका हुन्।'
वर्तमान सरकारलाई कम्युनिस्ट नेतृत्वको मात्र नभई कम्युनिस्ट पार्टीको सरकार भएको प्रधानमन्त्री ओलीको भनाइ छ। 'विगतमा हामीले कम्युनिस्ट नेतृत्वको सरकार मात्र बनाउन सक्यौं तर अहिले नेतृत्व मात्र होइन सरकार नै कम्युनिस्ट पार्टीको छ। त्यसकारण हामीले चुनावमा गरेको प्रतिबद्धता अनुसार जनताको पक्षमा काम गर्छौं।'
ओलीले पार्टी एकताका कारण कतिपय क्षमतावान कार्यकर्ताहरुले जिम्मेवारी नपाए पनि धैर्य गर्न सुझाए। 'पार्टी एकताका कारण कतिपय सक्षम नेता कार्यकर्ताहरुलाई पनि जिम्मेवारी दिन सकिएको छैन', उनले भने, 'पानीले आफ्नो आकार आफैं ग्रहण गरे जस्तै सक्षम कार्यकर्ताहरुले पार्टीमा आफैं स्थान बनाउनुहुनेछ। निराश नहुनुहोस्। कामलाई निरन्तरता दिनुहोस्।'
ओलीले पार्टी एकताको काममा केही ढिलाइ भए पनि अब प्रतिक्षाको घडी सकिएको बताए। 'पार्टी एकताका लागि केही बिलम्ब भएकै हो', उनले भने, 'तर, अब प्रतीक्षाको घडी सकिएको छ। चाँडै तल्ला तहका कमिटीको एकताले पनि पूर्णता पाउनेछ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
