काठमाडौं– रोजगारीका लागि युरोपियन मुलुक टर्की पुगेर करार अवधि अगावै फर्किएका १३ सयभन्दा बढी श्रमिकलाई उनीहरु कार्यरत कम्पनीले प्रतिव्यक्ति ७ सय अमेरिकी डलर पठाउने भएको छ।
दुई वर्षको करार अवधिका लागि भन्दै पठाइएका श्रमिकलाई ७/८ महिनामै कम्पनीले नेपाल फिर्ता गराएको थियो। स्काप फोल्डर कामका लागि भन्दै टर्कीको आइजिए कम्पनीमा पठाइएका श्रमिक क्लिनर लगायतका कठिन काम गर्न बाध्य थिए। मासिक ५ सय अमेरिकी डलर तलब र अन्य सेवा सुविधा देखाइए पनि ३ सय डलर मासिक तलब मात्रै दिइएको पीडितहरुले बताएका छन्।
अलपत्र परेर फर्किएका उदयपुरका चन्द्र खड्काले आफूहरुलाई टर्कीको कम्पनीले फ्रि भिसा फ्रि टिकटमा ल्याएकाले ७ महिनासम्म रोजगारी दिएपछि कुनै पनि समस्या नपर्ने भन्दै नेपाल पठाएको बताए। उनले भने, ‘हामीसँग म्यानपावर कम्पनीले फ्रि भिसा, फ्रि टिकटमा पनि ३ देखि ५ लाखसम्म असुल गरे।’
टर्कीको कम्पनीले फ्रि भिसा, फ्रि टिकटमा कामदारको माग गरेको भए पनि नेपालका म्यानपावर कम्पनीले टर्कीमा राम्रो काम र कमाइको प्रलोभन देखाएर ३ देखि ५ लाख रकम असुलेको पीडितहरु बताउँछन्।
युवाहरुलाई टर्की पठाउनेमा युरोनेपाल म्यानपावर कम्पनी, डेल्टा म्यानपावर कम्पनी, अवसर म्यानपावर कम्पनी लगायतका केही म्यानपावर कम्पनी रहेका छन्।
विभागमा १७० भन्दा बढी उजुरी
रोजगारीका लागि टर्की गएका १३ सयभन्दा बढी श्रमिकहरु भनिए पनि अलपत्र परेर फर्किएका १७० युवाहरुले मात्रै वैदेशिक रोजगार विभागमा म्यानपावर कम्पनीलाई कारबाही र क्षतिपूर्तिको माग गर्दै उजुरी गरेको विभागका सूचना अधिकारी तथा निर्देशक भोलानाथ गुरागाईले जानकारी दिए। 'पीडितलाई क्षतिपूर्ति दिलाउन विभागले सक्दो पहल गरिरहेका छौं,' उनले भने।
पीडित युवाहरुको बिगो रकम भराउन म्यानपावर कम्पनीको धरौटी रकमले समेत नपुगेकाले कसैलाई पनि क्षतिपूर्ति उपलब्ध गराउन नसकेको विभाग बताउँछ।
विभागको आनाकानी : पीडित
आफूहरुलाई कम्पनीले प्रतिव्यक्ति ७ सय डलर पठाइसकेको र त्यो रकम आफूहरुले नपाएको पीडित युवाहरुले गुनासो गरेका छन्। विभागमा भेटिएका मोरङका डम्मरबहादुर मगरले आफूहरुलाई विभागले बेवास्ता गरेको बताए। उनले भने, ‘कम्पनीले पनि हामी अलपत्र परेर फर्किएका सबैलाई प्रतिव्यक्ति ७ सय डलर पठाइसकेको भनेको छ तर हामीले पाएका छैनौं।’
अर्का पीडित खोटाङका सजित राईले पनि विभागले क्षतिपूर्ति उपलब्ध गराउन त ढिला गरेको गुनासो गरे।
तर, कम्पनीले पठाउने भनेको प्रतिव्यक्ति ७ सय डलर नेपाल आइनसकेको विभागको भनाइ छ। विभागका निर्देशक गुरागाईले उक्त क्षतिपूर्ति रकम आउनेबारे आफूहरुले चासो राखेर बुझिरहेको बताए।
टर्कीमा भनेजस्तो काम र कमाइ नभएपछि ७/८ महिनामा नै फर्किएका श्रमिकहरुले क्षतिपूर्ति पाएका छैनन्। निकै ठूलो संख्यामा श्रमिक ठगिएकाले क्षतिपूर्ति दिन म्यानपावर कम्पनीको धरौटी रकमले समेत नपुगेपछि समस्या परेको विभागले बताएको छ।
युरोनेपालका सञ्चालक अझै फरार
टर्कीमा रोजगारीका लागि सबैभन्दा ठूलो संख्यामा युवाहरु पठाउने युरोनेपाल म्यानपावर कम्पनीका सञ्चालक लालबाबु कवाडी भने अझै फरार छन्। टर्कीबाट अलपत्र परेर युवाहरु फर्किएको ३/४ महिनासम्म पनि उनी सम्पर्कविहीन छन्।
युरोनेपाल, डेल्टा र एचआर म्यानपावर कम्पनीमार्फत टर्की पुगेका श्रमिकको क्षतिपूर्ति १५ दिनभित्र बेहोर्ने भन्दै डेल्टा म्यानपावर कम्पनीका सञ्चालक राजन केसीले कागज गरेको विभागका निर्देशक गुरागाईले जानकारी दिए।
डेल्टा म्यानपावर कम्पनीका सञ्चालक राजन केसीलाई प्रहरीले पक्राउ समेत गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
