काठमाडौं- अर्थमन्त्री डा युवराज खतिवडाले बहुवर्षिय आयोजनामा देखिएका समस्या समाधानका लागि प्रदेश सरकारसँग छलफल आवश्यक रहेको बताएका छन्।
संघ, प्रदेश र स्थानीय तहको भूमिकामा असन्तुलन भएको भन्दै मन्त्री खतिवडाले तत्काल अन्तर प्रदेश परिषद् बैठक आवश्यक रहेको धारणा मंगलबार बसेको विकास तथा प्रविधि समितिको बैठकमा राखेका हुन्।
संघियता कार्यान्वयनको सुरुवाती वर्ष भएका कारण तीन तहबीचको समन्वय र सहकार्य हुन नसक्दा त्यसले विकासको कामलाई पनि प्रभावित पारेको उनको भनाइ छ। उनले गत पुष ३ गते बसेको अन्तर प्रदेश परिषद्को बैठकले धेरै समस्या समाधान गरेपनि सोही प्रकृतिको बैठक जतिसक्दो चाँडो पुन: बस्नुपर्ने आवश्यकता औंल्याए।
तीन तह बीचको समन्वयकै अभावमा बहुवर्षीय तथा ठूला आयोजनाको कामले अपेक्षित गति लिन सकेका छैनन्। चालू आर्थिक वर्षको बजेटमार्फत संघले प्रदेशलाई हस्तान्तरण गरिसकेका आयोजनालाई प्रदेशले सञ्चालन गर्न नसकेपछि अधिकांश आयोजना संघमा फर्किन थालेका छन्। प्रदेश सरकारले बहुवर्षीय आयोजना बनाउन आफूसँग बजेट र जनशक्ति दुबैको अभाव रहेको भन्दै त्यस्ता आयोजनाहरु संघलाई नै फिर्ता गर्न थालेका हुन्।
‘प्रदेशले ठूला आयोजना बनाउन नसक्ने भन्ने तर आयोजना निर्माणका लागि छुट्याएको रकम विभिन्न शीर्षकमा तल्लो तहमा जाँदा संघसँग पैसा अभाव हुने समस्या देखिएको छ। कति आयोजना प्रदेश आफैंले बनाउन सक्छन? कति संघको मातहत ल्याउनुपर्ने हो? यी विषय आगामी बजेट अगावै टुंग्याउन जरुरी छ,’ खतिवडाले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
