नयाँ दिल्ली (एजेन्सी)- बलिउड अभिनेता नवाजुद्दीन सिद्दीकीले व्यापक विवाद भएपछि आफ्नो आत्मकथा 'एन अर्डिनरी लाइफ' फिर्ता लिएका छन्।
नवाजुद्दीनको आत्मकथाको किताब केही दिनअघि सार्वजनिक भएको थियो । किताब प्रकाशनपूर्व नै केही अंश छापिएपछि विवाद आएको थियो । सो अंशमा नवाजुद्दीनले आफ्नो विगतको प्रेम प्रसंगबारे कुरा गरेका थिए, त्यसबारे उनले निकै खुलेर लेखेका थिए।
नवाजले ‘मिस लभ्ली’ फिल्मकी को-स्टार निहारिका सिंहसँगको उदांगो पारेका थिए र त्यसप्रति निहारिक कडा रुपमा प्रस्तुत भएकी थिइन् । निहारिकाले नवाजमाथि आत्मकथामा मनगढन्ते कथा हालेको आरोप लगाएकी थिइन् । उनले मात्र होइन, नवाजकी पूर्व प्रेमिका सुनीता रजवारले पनि किताबमाथि आपत्ति प्रकट गरेकी थिइन् । उनले फेसबुकमा लामो पोस्ट लेखेर आफूहरुको सम्बन्ध टुट्नुको असली कारण खोलेकी थिइन् । त्यसपछि किताबबारेको विवाद अझ चर्किएको थियो।
किताबको विषयमा बढेको विवादलाई ध्यान दिँदै नवाजुद्दीनले सबैसँग माफी मागेर किताब फिर्ता लिने निर्णय ट्विटर मार्फत गरेका छन् । उनले ट्विटमा भनेका छन्- 'म उनीहरु सबैसँग माफी माग्छु, जसको भावनामाथि मेरो किताबले चोट पुर्यायो । किनकि यी संस्मरणका कारण धेरै हंगामा भइरहेको छ, यसप्रति मलाई खेद छ र यस कारण मैले आफ्नो किताब फिर्ता लिने निर्णय गरेको छु।'
नवाजुद्दीनले आत्मकथा पत्रकार ऋतुपर्णो चटर्जीसँग मिलेर लेखेका थिए । किताबमा नवाजको उत्तर प्रदेशको मुजफ्फरनगरस्थित बुढानादेखि मुम्बईमा अभिनय कलाबाट पाएको सफलतासम्मको यात्रा समेटिएको छ । तर, उनको प्रेम प्रसंगसँग जोडिएको ‘रिलेशनसिप्स’ खण्डका कारण विवाद निस्कियो र किताब छायामा पर्यो।
नवाज सधैं विवादबाट टाढै रहने कलाकारका रुपमा चिनिन्छन् । यसैले उनले बढ्दो विवाद देखेर आखिरमा आत्मकथा फिर्ता लिने निर्णय लिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
