जाकार्ता- इन्डोनेसियामा बाढीपहिरोका कारण कम्तिमा ६३ जनाको मृत्यु भएको छ।
घटनामा परी अन्य धेरै जना बेपत्ता भएका र खोजी कार्य जारी रहेकाले मृत्यु हुनेहरुको संख्या अझै बढ्नसक्ने अधिकारीहरुले बताएका छन्।
पपुआ प्रान्तमा पर्ने जयपुरा जिल्लामा घटना भएको खोजी तथा उद्धार कार्यालयका प्रान्तीय प्रवक्ताले आइतबार जानकारी दिए।
शनिबार अत्यधिक वर्षाका कारण जिल्लाका धेरै ठाउँमा प्राकृतिक प्रकोपका घटनाहरु भएको जनाइएको छ।
प्रकोपमा परी २१ जना गम्भीर घाइते भएका छन् भने १८ जना सामान्य घाइते भएका प्रान्तीय प्रकोप व्यवस्थापन निकायको आपतकालीन इकाइका प्रमुख कोरी सिम्बोलोनले जानकारी दिए।
'दर्जनौं अझै पनि बेपत्ता छन्, स्थानीय समयानुसार बेलुका ६ बजे बाढी आएको थियो', उनले भने। बाढीबाट प्रभावित भएकाहरुमध्ये ३ हजार जनालाई सुरक्षित स्थानमा स्थानान्तरण गरिएको उनले बताए।
बाढीले दर्जनौं घर, पुल, सडकलगायतका भौतिक संरचनामा पनि क्षति पुर्याएको सिम्बोलोनले जानकारी दिए। घटनाबाट प्रभावितहरुलाई खोजी तथा उद्धार र राहत वितरण कार्य भइरहेको सरकारी अधिकारीहरुले जनाएका छन्। रासस/सिन्ह्वा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
