दुबई (युएई)- शुक्रबार बेलुकी यहाँ कन्सर्ट सकिनेबित्तिकै नेपथ्यका अगुवा एवं मुख्य गायक अमृत गुरुङले सामाजिक सञ्जालमा एउटा छोटो भिडियो हाल्दै लेखेका थिए– ‘सबैभन्दा पहिले हामी.., धन्यवाद दुबई, माया र साथको लागि।’
४० सेकेन्डको भिडियोमा एउटा गीतको अधुरो लाइन थियो जसलाई दर्शकहरुले पूरा गरिदिएको दृश्य देखिन्थ्यो।
केही समयदेखि नेपथ्यका कन्सर्टहरुमा सुनिँदै आएको त्यस गीतले भन्थ्यो–
‘तिमी पनि नेपाली, म पनि नेपाली, हामी नेपाली’
गीतका यी हरफहरुलाई अमृत सँगसँगै दर्शक भिडले पनि गाएर साथ दिएको थियो।
यसरी गीतले माहोल तताइरहेकै बेला बीचमा अमृतले चिच्याएर सोधेका थिए–
‘सबैभन्दा पहिले हामी..?’
जवाफमा २५ सय दर्शकले भरिएको हल गुञ्जिने गरी सबैले चिच्याएरै जवाफ दिइरहेका थिए–
‘नेपाली।’
यो प्रश्नलाई अमृतले बारम्बार दोहोर्याएर राखेका थिए। जवाफमा हरेकपटक अझ चर्को स्वरमा उही जवाफ दर्शकले फर्काइदिए।
दुई घन्टा लामो चलेको कन्सर्टबाट त्यो भिडियो केही सेकेन्डको भए तापनि सम्पूर्ण कन्सर्टको माहोल वर्णन गर्ने प्रतिनिधि दृश्य थियो त्यो। दुबईको ‘अल नासेर लिजर ल्यान्ड’मा मञ्चमा बसेका कलाकार र दर्शकदीर्घा पूरै अवधिभर एकअर्काको अन्तर्घुलनमा थिए। अमृतले यसरी सामाजिक सञ्जालमा राखेको भिडियो केही समयमै भाइरल बन्न पुग्यो र एक घन्टाभित्रै विश्वभर छरिएका १० हजार दर्शकले हेर्न भ्याइसकेका थिए भने सयौंले त्यसलाई सेयर पनि गरिदिए।
नेपालीपनको भावनालाई यसरी बलियोसँग जगाइदिएका अमृतले त्यसबाहेक नेपाली डाँडाकाँडाहरुबाट संकलन गरिएका लोकधुनमा आधारित नेपथ्यका गीतहरुलाई क्रमैसँग गाएर सुनाएका थिए। सम्पूर्ण अवधिभर त्यसले दर्शकलाई उत्तेजित बनाइरहेको देखिन्थ्यो।
‘मञ्चबाट हेर्दा हलभरिका दर्शक अनुहारमा जुन उत्साह र उमंग देखिरहेको थिएँ कन्सर्टमा ऊर्जा थप्नेगरि मलाई सबैभन्दा सन्तुष्टि त्यसैले दिइरहेको थियो,’ अमृतले भने, ‘यस्ता माया गर्ने दर्शक पाएकोमा हामी आफूलाई भाग्यमानी ठान्छौं।’
दर्शकदीर्घामा आयुष मान डंगोल पनि देखिन्थे। उनी सारजहास्थित एयर अरेबियाका पाइलट हुन्। आयुषसँगै उनका ‘एयर होस्टेस’ साथी सुष्मिता ताम्राकार पनि थिइन्। नेपथ्यलाई बुधबार संयुक्त अरब इमिरेट्स पुर्याउने वायुयानमा उनीहरु दुवै उडान टोलीमा संलग्न थिए।
‘दुबईमा नेपाली कार्यक्रमलाई खासै महत्वका साथ नहेरिनेगरेको अवस्थामा नेपथ्य यति उच्चस्तरमा प्रस्तुत हुँदा एक हिसाबले राष्ट्रिय गौरव जस्तै महशुस भएको छ,’ आयुषले भने, ‘यहाँ बस्दा आफूलाई नेपाली हुँ भनेर गर्व गर्ने कमै मौका मिल्ने गरेकामा त्यस्तो दुर्लभ एक अवसर शुक्रबारको कन्सर्टले दिएकोमा खुसी छु।’
कार्यक्रमको बेला अल नासेरको पार्किङ थलो कारले टनाटन भरिएको थियो। बहुसंख्य नेपाली मजदुरीको निम्ति आइपुग्ने भनेर चिनिएको यो थलो कसरी सम्पन्न नेपालीहरुले पनि भरिँदै जानलागेको छ भन्ने कुराको यसले संकेत गर्थ्यो।
‘संयुक्त अरब इमिरेट्सभरि छरिएर रहनुभएका नेपालीहरुबाट प्राप्त माया र सद्भावका निम्ति हामी आभार प्रकट गर्दछौं,’ आयोजक कमिटिका सुजन राजाले भने, ‘अबुधाबी, सारजहाँ र रस अल खइमाजस्ता छेउछाउका राज्यहरुबाट पनि बस रिजर्भ गरेरै टनाटन दर्शक ओइरिएका थिए।’
दुबईमा नेपथ्यको यो दोस्रो प्रस्तुति थियो। यसअघि सन् २०१५ को भुइँचालो लगत्तै पूर्वनिर्धारित कार्यक्रम भ्याउन आइपुगेको ब्याण्डले आफूलाई खुलेर प्रस्तुत गर्न सकेको थिएन।
‘अघिल्लोपटक आउँदा हामी खुसीभन्दा पनि शोक बाँड्न र सक्दो सहयोग जुटाउने उद्देश्य मात्र बोकेर दुबईमा प्रस्तुत भएका थियौं,’ अमृत भन्छन्, ‘त्यसै थलोमा यसपाला खुसी, हर्ष र उल्लासको क्षण बिताउन पाउँदा आनन्द महशुस भएको छ।’
दुई घन्टासम्म लगातार चलेको कन्सर्ट राष्ट्रिय भावना र लोकलयमा आधारित आवाजहरुको मिश्रण थियो। शो अवधिमा ‘रेशम’ र ‘तालको पानी’ले जसरी दर्शकलाई उल्लासले बुरुक्क बुरुक्क उफारेको थियो। त्यसैगरी ‘यो जिन्दगानी’, ‘मै मरी जाऊँला’ र ‘कोशीको पानी’ले भावुक बनाएको थियो।
त्यसपछि स्वदेश र आफ्नो समाजलाई सम्झाउँदै ‘हामी नेपाली’, ‘गाउँ गाउँबाट उठ’ र ‘रातो र चन्द्रसूर्जे’ले नेपालीपनको भावनासहित कन्सर्टलाई अन्तिम पाइन चढाएको थियो।
मञ्चमा अमृतलाई ड्रमसेटमा ध्रुव लामा, किबोर्डमा सुरज थापा, बेस गितारमा सुविन शाक्य, गितारमा निरज गुरुङ र मादलमा शान्ति रायमाझीले सघाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
