जनकपुर- सातै प्रदेशमा एक/एक वटा कृषि कलेज खोल्ने सरकारको निर्णयअनुसार प्रदेश २ मा स्नातक तहकाे कृषि विषय अध्यपन सुरु भएकाे छ। महोत्तरीको बर्दिवासमा स्थापना भएको प्राकृतिक श्रोत व्यवस्थापन कलेजले कृषि स्नातक प्रथम वर्ष प्रथम शैक्षिक सत्रको पठनपाठन सुरु गरेको हाे।
कृषि तथा वन विज्ञान विश्वविद्यालयको आङ्गिक कलेजको रुपमा सरकारले २०७३ असार २९ गते प्राकृतिक श्रोत व्यवस्थापन कलेज बर्दिवासमा स्थापना गर्ने निर्णय गरेको थियो।
महोत्तरीको बर्दिवास नगरपालिका ६, किसाननगरको ६ विघा ४ कठ्ठा जग्गामा भौतिक संरचना निर्माण हुने भए पनि अहिले कलेजले जनजागृति मावि किसाननगरको भवनमा पठनपाठन सुरु गरेको छ।
भौतिक संरचना निर्माण प्रक्रिया अघि बढिरहेको र पठनपाठन अहिलेनै सुरु गर्नुपर्ने भएकाले जनजागृति माविमा समन्वय गरी पठनपाठन सुरु गरिएको कलेज व्यवस्थापन समितिका अध्यक्ष राजन ढुङ्गानाले बताए।
अहिले प्राकृतिक श्रोत व्यवस्थापन कलेजको प्रथम वर्षको प्रथम शैक्षिक सत्रमा देशभरका विभिन्न जिल्लाबाट ५४ जना विद्यार्थिहरुले नाम निकालेर अध्ययन गर्न महोत्तरी आएका अध्यक्ष ढुङ्गानाले जानकारी दिए।
कृषि तथा वन विज्ञान विश्वविद्यालयले बर्दिवासमा सञ्चालित कलेजको आन्तरिक व्यवस्थापनका लागि ३५ लाख रुपैयाँ बजेट छुट्याएको जनाएको छ।
कृषि तथा वन विज्ञान विश्वविद्यालय कृषि संकायका डिन जयप्रकाश दत्तले देशभरमा सञ्चालनमा रहेका ५ वटै आंङ्गिक कलेजहरुलाई कुनै पक्षपात नगरी एउटै गतिमा अघि बढाउने स्पष्ट पारे।
कृषिप्रधान देश भएर पनि पछि पर्नुपरेको यथार्थ बदल्नुपर्ने सोचसहित कृषि क्रान्ति गर्ने लक्ष्य लिएर विश्वविद्यालय अघि बढेको डिन दत्तले जनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
