राजविराज– सप्तरीको बोदेवरसाईन नगरपालिकाबाट अपहरणमा परेका एक व्यक्ति भारतीय प्रहरीको सहयोगमा उद्धार गरिएको छ।
बोदेवरसाईन–१, कविलासाका कपडा व्यापारी ३२ वर्षीय मोहम्मद जियाउल हकको शनिबार राती अज्ञात समूहले अपहरण गरेको थियो। उनी कविलासामा विद्युतीकरणका लागि गठित उपभोक्ता समितिका अध्यक्ष समेत हुन्।
बरसाईन बजारस्थित पसलबाट स ८ प ७४७० नम्बरको मोटरसाईकल चढी घर जाने क्रममा रञ्जितपुरस्थित पम्प नहरको पुलबाट आफूलाई अपहरण गरीएको जियाउलले बताए।
‘मुखमा नकाब लगाएका ८/९ जना व्यक्तिले एक्कासी मोटरसाईकल रोकेर कुटपिट गरे,’ उनले भने, ‘मैले प्रतिवाद गर्न नपाउँदै हातखुट्टा र आँखा बाँधेर २ जनाले मोटरसाईलमा हालेर लगे।’
करिब १५ किलोमिटर दक्षिण भारतीय सिमा क्षेत्र हटैलमा पुगेपछि भारतीय प्रहरी (एसएसबी)ले मोटरसाईकल रोक्न खोजेको र सोही क्रममा आफूलाई छोडेर अपहरणकारी भागेको उनले बताए।
कुटपिटका कारण घाईते भएका जियाउललाई उपचारका लागि राती नै राजविराजस्थित गजेन्द्रनारायण सिंह सगरमाथा अञ्चल अस्पताल भर्ना गरिएको छ।
कुटपिट र अपहरणमा स्थानीय सन्तोष प्रमाणीको संलग्नता रहेको जियाउलले आशंका गरेका छन्। सशस्त्र प्रहरीमा कार्यरत सन्तोष विद्युतीरणका लागि गठित उपभोक्ता समितिकी कोषाध्यक्ष दयावतिदेवी प्रमाणीका छोरा हुन्।
‘कोषाध्यक्षसँग विद्युतीकरणको बजेटका विषयमा असमझदारी भएको थियो। त्यस विषयमा सन्तोषले पटक–पटक धम्किपुर्ण व्यवहार गरेका थिए,’ उनले थपे, ‘कुटाकुटको अवस्था आएपछि हामीले प्रहरीमा उजुरी पनि दिएका थियौं।’
अपहरणकारीले प्रहरीमा उजुरी दिएको र एसपीसँग भेट गरेको विषयमा कुरा उठाएर कुटपिट गरेकाले उनकै संलग्नता हुनसक्ने जियाउलको आशंका छ।
जिल्ला प्रहरी कार्यालय सप्तरीले समेत घटनाको विषयमा पुष्टि गरेको छ।
घट्नाको बारेमा जानकारी पाएपछि डिएसपी भावेश रिमाललाई घटनास्थलमा पठाएर अनुसन्धान सुरु गरिएको सप्तरीका एसपी राजेन्द्र विष्टले बताए। ‘सबै कुरा खुलिसकेको छैन, तर उनलाई जबरजस्ति लिएर गएको चाहि हो,’ विष्टले भने, ‘हामी अनुसन्धान गर्दैछौं। बाँकी कुरा खुल्दै जानेछ।’
अनुसन्धानका क्रममा शंकास्पद ३ जनालाई प्रहरीले नियन्त्रणमा लिएको जिल्ला प्रहरी कार्यालय सप्तरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
