भैरहवा- प्रदेश ५ का मुख्यमन्त्री शंकर पोखरेलले विश्वविद्यालयहरुले संविधानविपरीत आंगिक क्याम्पसहरुलाई सम्बन्धन दिएको बताएका छन्। उनले उच्च शिक्षाको जिम्मेवारी प्रदेश सरकारको रहेको बताउँदै संबिधानविपरीत सम्बन्धन दिने कार्य बन्द गर्नुपर्ने जिकिर गरे।
मुख्यमन्त्री पोखरेलले भने, 'उच्च शिक्षाको सम्बन्धन दिने जिम्मेवारी संविधानले प्रदेश सरकारलाई दिए पनि केन्द्रिय विश्वविद्यालयले धमाधम सम्बन्धन दिइरहेको छ। यो संविधानविपरीतको कार्य हो।'
उनले संविधानले दिएका अधिकार प्रदेश र स्थानीय तहलाई प्रत्यायोजन गर्न ढिलाई गर्न नहुने विचार पाेखे। उनले पुरानो संविधानको मानसिकता त्यागेर अघि बढ्नुपर्नेमा जाेड दिए।
अहिले पनि आंगिक क्याम्पसहरु केन्द्रीयस्तरबाट नै सञ्चालन गर्ने मनसायमा रही प्रदेश सरकार मातहत आउन आनाकानी गर्नु दु:खद पक्ष रहेको पाेखरलकाे भनाइ थियाे। उनले केन्द्रमा रहे आफ्नो विकास हुने प्रदेश/स्थानिय तहमा रहे विकास नहुने गलत मानसिकताले शिक्षा क्षेत्र ओझेलमा परिरहेको तर्क गरे।
भैरहवा बहुमुखी क्याम्पसको स्वर्ण महोत्सवको बुधबार उद्घाटन गर्दै मुख्यमन्त्री पोखरेलले शिक्षाकै माध्यमबाट राष्ट्र र समाजलाई बदल्न सकिने दाबी गरे। उनले नयाँ संविधान अनुसार मनोविज्ञान तयार हुन आवश्यक रहेको र त्यसका लागि पनि शिक्षकहरुले केन्द्रिकृत मानिसिकता त्याग्नुपर्नेमा जोड दिए। उनले क्याम्पसहरुमा आर्कषण नभएको विषय हटाएर आर्कषण भएको विषयको अध्यापन गराएमा विद्यार्थी र क्याम्पस दुबैलाई फलदायी हुने बताए।
मुख्यमन्त्री पोखरेलले समाज बदल्न शिक्षालाई प्राथमिकता दिनु पर्नेमा जोड दिए। उनले अरु क्षेत्रमा गरेको लगानी तत्काल देखिए पनि शिक्षामा गरेको लगानी दीर्घकालमा बिस्तारै देखिने र त्यसबाट फाइदै-फाइदा हुने बताए।
मानविकी संकायका डिन प्रा डा शिव भुसालले नेपालको उच्च शिक्षामा ८० प्रतिशत योगदान त्रिविले गरेको दाबी गरे। उनले बाह्य मुलुकमा विद्यार्थीहरुलाई उच्च शिक्षा अध्ययन गर्न नजान आग्रह गर्दै उत्कृष्ट शिक्षा त्रिविले नै प्रदान गर्ने जिकिर गरे।
२०२५ साल भदौ ४ गते स्थापना भएको भैरहवा बहुमुखी क्याम्पस यस क्षेत्रको त्रिभुवन विश्वविद्यालयको एकमात्र आङ्गिक क्यामपस हो। क्याम्पसमा अहिले स्नातक तहमा शिक्षा, मानविकी, विज्ञान तथा प्राविधिक र व्यवस्थापन शंकायमा गरी बिए, बिएड, बिबिएस, बिएससी, बिबिएम, बिबिए, बिसिएसलगायत कार्यक्रम सञ्चालनमा छन्।
स्नाकोत्तर तहमा शिक्षा, मानविकी र व्यवस्थापन शंकायमा विभिन्न विषयहरु पठनपाठन हुँदै आएको छ। क्याम्पसमा हाल १ हजार ७ सय विद्यार्थी अध्ययनरत छन्। पहिलेको तुलनामा यो क्याम्पसको धेरै विकास भइसकेको छ।
स्वर्ण महोत्सवको अवसरमा क्याम्पसले सप्ताहव्यापी कार्यक्रम गर्दैछ। उद्घाटन सत्रअघि बाजागाज र झाँकीसहित प्रभातफेरी निकालिएको थियो। र्याली नगरका विभिन्न ठाउँको परिक्रमा गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768212196.png)
-1768207138.png)
-1764146706.png)
